搞洗衫app食腦又食力太子爺創業不靠父幹

2016/09/15 08:41:06 網誌分類: 生活

15 Sep

        潮語有云「成功靠父幹」，但偏偏有富家子棄家族生意，辛苦儲錢創業，一腳踢做「洗衫仔」。八十後Kelvin看準洗衫有市場，與朋友開發洗衫app，提供一站式洗衫服務。原本可以輕輕鬆鬆繼承父業，他卻為創業，曾到洗衣工場打工，坦言好辛苦，只因不想營營役役，希望做一件屬於自己的事。記者麥凱淇

        「直至?家都有呢種感覺，到底係咪應該咁做？係咪有條簡單啲嘅路，無論返屋企做嘢，又或出去搵份工，如果單純為錢，就唔創業，搵錢有好多途徑，真係有個諗法，想做屬於自己嘅嘢！」Kelvin說，他今年初與朋友創辦網上洗衫平台「BONI」，可預約上門收集污糟衫，洗乾淨後上門歸還，看準一站式服務方便繁忙都市人。

        自言出身小康之家的Kelvin，原本可繼承家族生意，但他卻不想「成功靠父幹」：「好好彩無經濟包袱，咁問自己係咪要做啲嘢，insteadof（代替）走一條好簡單嘅路」。他畢業後曾做過白領，但穩定的工作模式令他更希望創業，尋找「存在感」：「真係好苦悶，無乜存在感，日日都係咁返工，但我自己做一樣嘢，雖然辛苦，但有價值，亦都係因為咁，我想做洗衫，呢樣嘢每個人都需要，大家都有用，好似做緊一樣嘢幫到世界。」

        談到洗衫app的由來，Kelvin指意念源於不方便的洗衫經驗：「有次冬天去完旅行，好多褸要拎去洗，但袋衫放咗喺度好耐都無拎，唔係唔想拎，永遠放工返嚟洗衫舖就收咗，出街又唔知舖頭有無開，於是就諗，有無啲嘢可以做呢？」

        扮中五畢業應徵洗衫工場

        為了創業，Kelvin展開四五個月的「臥底生涯」，扮中五畢業應徵「洗衫仔」。他憶述在各大洗衫工場及運輸公司吸取經驗：「原來根本無人入行，其實洗衫好辛苦，工場好熱，尤其乾衣，有蒸氣、化學物料，唔好話夏天，冬天都好熱，啲衫幾污糟都要洗……做運輸嘅，朝早六點幾出車，返到夜晚八點。」

        「辛苦唔緊要，最難頂覺得自己點解咁辛苦，自己做老闆唔係一件開心事，做完我先知，當你成功又會諗緊聽日會唔會失敗呢，你話後唔後悔創業？唔後悔嘅，但辛苦過打工好多！」

        但他說當「臥底」好值得，除了熟悉行情，他更明白行業存有缺點：「洗衫唔同區域唔同價，洗件皮褸，普通地方可能二三百，但中環可以收千八蚊……洗衫係海鮮價，有牌子嘅褸又唔同價錢……我哋（平台）就統一價錢。」

        「BONI」今年初試業，Kelvin說反應不俗，換季時更做到不停手，他又重拾「送貨仔」生涯，親自送貨。他勉勵創業同路人，最緊要是堅持，笑言「最大壓力係要同人交代，面子問題，如果試過真係行唔通，無人會怪你，但一開始遇到困難或辛苦就放棄，咁就唔啱！」