擁抱粵語發揚本土音樂街頭歌手誓要唱好廣東歌

2016/10/20 08:41:45 網誌分類: 生活

20 Oct

        曾幾何時，我們都是聽廣東歌長大的，直至近年吹完日風，再吹韓風，新世代歌迷只追韓星，廣東歌不復當年勇。不過，在主流樂壇之外，有一班鍾情音樂的年輕人，創立音樂品牌JLMusic，誓要唱好廣東歌，「大家開始唔係好擁抱自己語言歌曲的音樂，自己語言嘅歌曲係應該賦予價值。」

        記者麥凱淇攝影林金展

        走過街頭，聽到街唱的聲音，幾個年輕人彈簡單樂器，唱出經典廣東歌或自創歌。在這班人之中，就有JLMusic成員，這個四年前成立的音樂品牌，從街頭唱起，漸漸舉行各樣不同類型的音樂活動，唱出一首首親情、愛情、自我、理想等不同題材的廣東歌，可謂主流音樂之外的「小清新」。

        「大專拾回十大」重新演繹金曲

        JLMusic發起人李冠傑（JL）說，廣東歌是他們的堅持：「點解要做其他語言嘅歌先？大家都好容易墮入一個迷思，就係廣東歌等於陳腔濫調，我哋就係要用自己語言去發展音樂，有好嘅音樂，就係將自己嘅地方發展緊，將本土音樂發揚光大。點解做粵語？就算你做英文歌，做得再好，都唔係你嘅語言、你嘅文化。」

        最近JLMusic籌備「大專拾回十大」，發起投選十大最喜愛的廣東歌，活動分幾個階段，現時至本月底是提名期，先由大專生提名金曲，十月底至十一月底舉行投票，最後選出的十大金曲，並會在十一月底至十二月予提名入選金曲的隊伍重新演繹金曲。

        這班年輕人用心推廣廣東歌文化，因為他們堅持廣東歌魅力不死。二十四歲的成員趙嘉愉說，「我長大都係聽容祖兒、陳奕迅、鄭秀文」，雖然廣東歌漸漸「做嚟做去都咁」，「韓國、日本、歐美，呢啲市場不停進步緊、發展緊，我哋未必退步呀，我哋不停行緊情歌、少女組合，我哋未必退步呀，沉醉係自己個階段」，但她說「物極必反」，近年已少有誠意及新鮮感的廣東歌出現。

        冀「毋忘初衷」

        另一位二十歲的成員黃進林，立志成為全職音樂人，他說「我本身鍾意聽台灣歌，入咗JLMusic發現廣東歌都可以好吸引。香港唱歌嘅人都需要多元化。」

        JLMusic成立之初，是希望大專生告別校園，加入社會，仍可堅持發展音樂，JL說，希望一直「毋忘初衷」，「我係抱正面態度，因為物極必反，有一班聽得太多太悶嘅人，轉去聽其他嘢，佢哋就吸收到新嘢，佢掌舵話事時，就可改變番個時代，我哋就係期待緊呢件事。」他又說：「我唔敢話可做到啲咩偉大嘅嘢，我哋做嘅好多嘢其實都係好簡單想法，投選十大廣東歌，大家關注多啲囉，重新認識囉，鍾意多啲自己成長嘅嘢，先會諗方法令佢更加好，我哋做音樂都係想滿足自己滿足人，Keep住自己原本想做嘅精神，Keep住努力。」

        粵唱粵愛（二之一）