升市理由特別多
2017/07/24 08:41:33 網誌分類: 經濟
對於呢排個市大漲小回，升勢浪接浪，陸羽仁同位身家百億嘅有錢佬傾起，佢認為道理只得一個，就係資金多，啲錢無地走，於是流入股市，所以股市愈升，愈多人買股。
辣招迫有錢佬炒股
有錢佬咁講，相信佢唔係理論分析，而係自己咁做緊。佢而家咁多身家，主要係兩條路，一條路係做本行零售生意，早幾年自由行嚟香港乜到掃，佢豬籠入市賺到笑。呢兩年無呢支歌仔唱，好彩係佢係零售賺咗錢，就開始買磚頭，佢係尖沙咀買落嘅舊樓重建，成幢起好身價唔少，加埋其他一層層嘅商場同散舖，就算本業賺少咗，但物業升值就令佢身家繼續漲。
雖然資產不斷升值，但佢發覺?家樓市好難玩，皆因政府不斷加辣，短期畀稅都畀到怕，商廈又升得咁高，所以樓都無乜好炒。有錢佬啲資產係平價買落，而家負債唔高，正行生意無乜好做、買樓又被辣招綁住，咁有乜好做呢？不如就攞番多少出嚟炒吓股啦，所以佢估啲資金會繼續留係股市，趁到爆煲為止。至於幾時爆煲，佢就話你問我、我問邊個？佢咁多年投資經驗係，股市平就無人買，升先多人買，如果個市升得旺啲，咁啲人見賺錢易，就會加注入市，所以股票同樓市一樣，都係愈貴愈多人買。
電能為搞刁大派水
有錢佬咁講，多少都講出而家投資者嘅心態，去年呢個時候，大市仲係兩萬點徘徊，當時成交唔算好大，有興趣買股票嘅人唔多，到而家恒指創咗兩年幾高位，開始逼近2015年A股大時代嘅水平，大家成交反而多咗，有興趣買股嘅人多咗之餘，市場大大小小嘅「刁」，都隨住市況活躍增加咗。最明顯係電能實業（006）繼今年初派發每股特別息5元之後，上周中期業績再豪派特別中期息每股7.5元，每股中期息則加碼10%至每股0.77元，即每股派息8.27元，相當於共派出現金176.5億元。電能主席霍建寧指出，派發特別息是用以滿足股東期望，同時亦考慮到公司需保留資金作未來併購用途。派息有驚喜之餘，電能仍持有242.73億元可供調動投資，有機會加碼派特息，或用於收購。電能（006）股價在公佈後急漲11%，報75.4元，成表現最佳藍籌股。連帶其他長和系股份亦造好，長江基建（1038）升6％，報69.7元；長實地產（1113）升1％，報61.95元；長和（001）升0.4%，報100.8元。
呢次電能大派水，大股東長建共可收取68.6億元。最大的基金股東CapitalGroup持有1.9238億股，即9.01%，今次中期可以收息共計15.91億元，大小股東可以話都咁歡喜。瑞信發表研究報告，指電能上半年業績表現強勁，且出乎意料地宣派特別息，故上調電能每股盈利預測2%，目標價由78.5元上調至82元，評級「跑贏大市」，仲話算到電能仍持有170億元淨現金，可支撐其作進一步收購，或再派特別息。另一大行花旗都話派特別息屬驚喜，若下半年集團未有重大併購行動，有機會再次派發特別息。電能坐擁巨資，一直係私有化同派息間思想鬥爭，?家決定派水，可能係想搞吓嘢，所以唔想再花時間搞私有化。呢個反映美歐市場回暖後，大企業併購興趣增加，所以動作多咗。
保華套現大過公司市值
大公司有水派，股仔都一樣不甘寂寞。個市升到而家都主要係大股身上，四、五線好多仲係低位發呆，一有動作反映出嚟嘅價值仲誇張。好以保華集團（498）啱啱公佈，公司就向南通國有資產投資出售南通港口集團之45%股權，訂立有條件協議，代價為16.13億元人民幣（相當於約18.54億港元），睇番佢本身有幾個港口權益，規模比南通港少啲，呢次出售完成，基本上公司已經無乜負債，而佢而家嘅市值只係9億元。呢個項目去年貢獻盈利6000萬元，可以話係高資產、低收益，所以一宣佈股價即時爆升8%，報收0.18元。不過，股價係咪可以繼續好，都要睇公司有無嘢益吓小股東。
市場上好多三、四線公司，都係有家底但唔知幾時會賣，好似橙天嘉禾（1132）宣佈用32億元出售內地業務，話明會將所得部份用嚟派息。隨着交易上周獲得批准，橙天嘉禾股價升上0.91元，市值去到26億元，仍然比套現嘅金額為低。
利物浦訪港沖喜渣打股價一年高
幾支英國球隊訪港掀起熱潮，由於有勁旅利物浦坐鎮。比賽一票難求，有中環茶友撞到恒隆董事總經理陳南祿，佢笑言一早撲定飛同太座拍拖入場睇波。
紅軍嘅贊助商係渣打銀行，今次佢來港都分到門票，茶友同銀行素來有交情，所以都搵到入場券，佢笑言好彩初賽前，本港暴雨連場，接連掛起紅雨、黃雨警報，但首日比賽放晴，賽事無爆冷，星期日決賽由李斯特城對紅軍，戲碼都夠吸引力。
講起渣打銀行，茶友都係佢股東，佢留意到渣打集團（2888）行政總裁溫拓思（BillWinters）早輪接受《星島日報》訪問嘅內容。佢認為銀行股獲重新評級係有道理嘅，相信銀行股股價有望再升。
等派息有憧憬
據溫拓思嘅講法，?家美國銀行因可向股東展示其回報，股價遂以輕微溢價或接近帳面值交投，大部份亞洲銀行在高回報下是溢價交投，但歐洲銀行股仲係有好大折讓，對此他也感到疑惑，但認為銀行要重返正常的回報及股價仍有漫漫長路，但已有進展。佢不諱言看好銀行股，因為美國經濟持續向好、中國亦能過渡艱難期、亞洲經濟復甦、商品價格回穩、美國總統特朗普支持放寬銀行監管，以及美國加息等，都可以令銀行股獲重新評級。
渣打先前因為資本壓力暫停派息，外界成日問佢何時恢復派息，佢亦坦言有部份投資者就此施壓，重申派息視乎集團嘅資本係咪足夠，以及能否持續賺錢。茶友話，渣打如果恢復派息，咁就回復有型有款，但買股要買憧憬，所以佢雖然未報佳音，但上周股價已升番去63.4元嘅一年高位。
陸羽仁
回應 (0)
我要發表