內房愛搞刁
2017/07/17 08:41:39 網誌分類: 經濟
恒指升足5個交易日，好大程度係受惠美股向好。美股升勢停不了，在公用股和科技股帶動下，杜指及標普500指上周五收市齊破頂，杜指漲84點，收報21637點；標指升11點至2459點。港股在美國的預託證券（ADR）都跟隨造好。美股帶動慢牛向上，MSCI全球指數上周升咗超過2%，係今年最大升市，全球股市年初至今市值進帳15%，合共創造咗近600萬億元財富，都咪話唔勁。
中海外周末發力炒上
港股連升5個交易日，唔同行業輪流發力，周末炒到內房股。獲大摩唱好的中海外（688）在上周最後一個交易日成為升市火車頭，收市勁升7%報25.4元，為表現最佳藍籌；潤地（1109）升3.5%收報23.4元。中海外大升，連帶其他內房股亦普遍造好，越秀地產（123）當日升咗5%報1.44元；龍光地產（3380）升近6%報6.55元；龍湖地產（960）升4.8%報18.88元；升5%至6%嘅內房亦有好多，大股恒大（3333）就升2.5%，收報15.82元。
上星期爆出嘅大交易，有國企中遠海控（1919）收購東方海外（316）；融創（1918）收購萬科（2202）嘅酒店資產，周末再爆一單，就係萬科參與收購新加坡嘅物流巨企普洛斯（GlobalLogisticProperties）。由於普洛斯唔係香港上市公司，本地投資者未必留意。呢家公司係全球最大物流地產商之一，業務遍及中國、日本、巴西和美國等117個城市，擁有並管理約5500萬平方米的物流基礎設施，旗下客戶包括阿里巴巴及京東。早前呢家公司嘅股權展開競購，唔少大財團都有興趣，密密部署，最終勝出的財團由厚樸投資、高瓴、萬科、中行（3988）以及普洛斯首席執行官梅志明持有的SMG組成，將會以每股3.38新加坡元，向普洛斯股東提出私有化，作價較股份上星期三停牌前有溢價25%。
萬科出手斥千億併購
根據公佈，交易完成後萬科將持有普洛斯21.4%股權，為最大單一股東；厚樸投資佔21.3%；高瓴資本及SMG分別約佔股21%；中行則持股15%。消息公佈後，萬科AH股上周五午後雙雙停牌，涉內幕消息。萬科H股停牌前報23.2元，升2.4%；A股報24.59元人民幣，升0.65%。外界估計，普洛斯在中國經營多年，今次以中資為主嘅財團對其背景有充份了解，加上內資走出去嘅趨勢，海外優質資產都會成為佢哋嘅獵物。
萬科過去一年備受管理層同股東間角力嘅困擾，最近股權問題終於有定案，深圳地鐵成為大股東之餘，管理層都換血。本來萬科係中國最大嘅房地產公司，由於受外敵狙擊，搞到俾行家過晒頭，現在局面稍定，佢就搞單「大刁」出嚟。萬科董事會主席兼首席執行官郁亮表示，此次交易若完成，將是萬科城市配套服務商戰略的重要舉措，有助萬科在物流地產領域完善佈局，進一步擴大影響力。
變相增市場資金供應
中環茶友話，中國房地產市場競爭激烈，能夠跑出嘅內房商性格都係好進取，加上佢哋積聚咗資本，所以係最有能力搞作嘅內資之一。
最近中國經濟穩番啲，中新網引述國家信息中心經濟預測部估計，上半年出口回穩向好，對推動經濟增長起到正面作用，預計第二季度經濟按年將增長約6.8%，高於官方設定約6.5%的全年經濟增長目標。
中國經濟增長有利人仔匯價壓力減輕，唔排除未來中資都會繼續「搞刁」，咁變相會令市場流動嘅資金多咗。呢個狀況如果出現，對大市有利好作用，內房都有機會炒作。睇番現時嘅內房股，如果從佢哋過去嘅估值睇，部份已經唔平，主要係市場長期都擔心中國物業供過於求，加上中央不時打壓，令呢個行業嘅估值唔高。當大股嘅估價炒高咗之後，資金有可能流去炒吓啲折讓大或者市盈率低嘅二線股。
有錢有辦法退休要理財
呢個星期就係書展，唔少名人都趁機出書，做過電台同名嘴嘅曾智華仲打孖一齊嚟，出齊兩本書。
佢第一本書名為《快樂退休》，目標讀者非常清晰，就係點樣在退休時做到財務自由。曾智華係港台做節目經常訪問成功猛人，相信從中偷了唔少師有不少體驗，書中應有大量貼地的理財貼士。
有中環茶友話，曾智華做過高級公務員，生活有長俸保障，仲使乜搞理財。其實退休時如何選擇長俸，都有唔少理財智慧。公務員夠鐘退休，一次過攞大筆退休金可以免稅，有人就貪呢個便宜攞咗大筆錢，跟住手痕痕去做生意或炒股，結果就搞到損手爛腳，所以退休人士點理財，唔係表面睇咁簡單。
香港搵錢台灣使錢
退休有銀用，當然就要吃喝玩樂，佢第二本書就教人去台中食、住、遊。近年好多人都話移民台灣，但稍明經濟嘅人都知，台灣近年經濟唔係好掂，呢啲地方只宜使錢，不宜賺錢，皆因銀紙見使，代表搵錢艱難，所以話移民台灣，不如得閒去玩吓就算，搵錢就點都要留喺香港。至於點樣玩得精明，買本書就唔使花腦筋去諗嘞。
陸羽仁
回應 (0)
我要發表