有閒錢等入「賣產股」
2017/07/10 08:41:40 網誌分類: 經濟
美股上周收市就造好，杜指先升後穩，收市報21414點，升咗94點，納斯達克指數收市報6153點，升63點，標普500指數收市報2425點，升15點。
港股七月無好似傳統市況打翻身仗，主要係同全球氣候有關。美股高位乏力，特別係科技股顯得壓力重重，石油能源類股份就有波幅、無升幅，所以無乜火車頭帶動指數向上。呢啲市況基本上都係食少多覺瞓，如果要細細哋玩吓保持住熱身，都係搵啲有特別情況，譬如醞釀賣產嘅股份。
東方海外證賣盤
呢排炒賣產炒得勁嘅股份之一，係前特首董伯伯嘅東方海外（316）。有關佢賣產嘅消息係幾個月前開始傳出，當時外媒話中遠集團考慮收購，公司方面其後公開否認。不過，有熟悉航運界嘅人就話，?家全球航運界不斷整合，只有巨無霸才有生存空間，中國有幾個獲國家支持嘅航運集團，其他公司好難陪玩，東方海外賣盤俾佢哋係正路選擇，董伯伯係國家領導人，買賣價錢應該唔會失禮。
東方海外昨晚正式宣佈，中遠海洋控股集團（1919）出價492億元收購東方海外全數股份，每股出價78.67元，溢價高出31%。係消息刺激下，東方海外成為淡市奇葩，股價上周升抵60元的歷史就高，已經升破咗佢嘅資產淨值56元，市值去到375億元，若然早前入貨博賣產，?家已經可以等收割。
SOHO中國想沽嘢
至於仲有無其他賣產公司？中環茶友話而家有幾間公司已經打咗開口牌話準備賣產，包括和記香港（215）、冠君信託（2778）同內房股SOHO中國（410）。當中少啲人談論同認識嘅係SOHO中國。
SOHO中國董事長係潘石屹，但佢太太張欣都有唔少人認識。
呢間公司主要做寫字樓，係外資眼中有一定知名度。SOHO中國一向都有興建寫字樓收租，部份出售，潘石屹日前就宣佈一個較大的售產計劃，準備出售北京光華路SOHO2及上海凌空SOHO兩個項目，項目可整售商業辦公面積合計22.25萬平方米。佢仲話，低買高賣是做生意遵循的永恒不變的規律，公司會根據市場變化和走勢不斷優化產品組合。如果以售價每不方呎1000元計，就套24億元，簡單計算好易就有過百億元資金回籠。
睇番SOHO中國嘅數，佢?家市值208億元，資產折讓4成左右，數字唔係咁吸引，特別係內地寫字樓收租回報慢，增值前景未必有香港咁好，但若然佢賣產套現，佢過去兩年都有派特別息，咁條數又唔同計法。
急追要防會坐艇
茶友話，吼買產套現股，若然買唔中可能會「坐艇」，所以落注首要係評估成事機會，再評估股東作風慷唔慷慨，然後先後候機買進。由於賣產唔一定成事，高追風險就高，有閒錢等到靚位先入貨，咁先符合財不入急門嘅搵食之道。
遼寧艦上歎冷餐醉翁之意不在食
回歸二十周年，中港兩地都舉辦了不少活動慶祝。呢兩日最熱鬧哄動嘅當然係大陸第一架航空母艦遼寧艦訪港。今次遼寧艦訪港上船參觀一票難求，所以城中部份名人獲得邀請上船，仲有機會在艦上進餐，就特別威水。
一票難求身份象徵
遼寧艦訪港掀起熱情，一票難求，城中一班政經界仲獲得安排上船食冷餐，睇表演，最緊要呢個係首度安排，獲邀係身份象徵。
有出席嘅中環茶友話唔知係咪怕風浪，上船嘅以政界同紀律部隊嘅人多啲，反而唔係好見商界。佢笑言，佢哋今次身先士卒上船，之後先輪到向公眾開放，佢哋變咗試驗各種安排嘅白老鼠，果然上艦時拋盡浪頭，有驚無險，而且上船時間夜，所以無得上甲板。若論暢快程度，攞飛上船嘅公眾或者玩得仲盡興。
呢次政經名人上船，主人家啱啱到埗，都火速搞咗個冷餐招呼吓大家，講食雖然唔算得好味，但呢個唔係重點所在，而主人家安排咗唔少表演，仲有軍政歌舞團表演，之後又可以合照，都令到嘉賓好盡興，成個過程都變咗中環話題。
除咗上遼寧艦食嘢，國家主席習近平早前訪港，特區政府安排了多項活動接待，包括最後公佈安排的環節是與各界會見和拍照留念。聽聞有兩個特色，一個就係有嘢食，另一個就係有得坐。
有到過北京人民大會堂同領導拍照者話，係首都影呢啲集體照，事前最多安排飲杯茶，不會有點心招待，但特區政府今次安排合照，早了近兩小時集合，好彩係預備了茶水和少量點心供出席小憩時食用。
雖然出席人數和界別眾多，但多數人都會遇到相識，輪候時間就變相成了交誼時間。有人仲見到長和主席李嘉誠都有去，佢好精神好好笑容，仲坐低咗飲杯茶?。
至於另一個安排，就係用嚟拍攝的長板每級有兩層，可以作為座位，同時方便後來者入場，比全程站立舒適多矣。
陸羽仁
回應 (0)
我要發表