上半年買大股已夠贏
2017/07/03 08:42:02 網誌分類: 經濟
納指領漲後有壓力
美股方面，上周杜指同標普反彈，納指就續跌，總結上半年杜指同標指上升近8%，納指就升足14%，明顯跑贏，所以去到年結咁多基金食胡。其他資產石油下跌、金價上升，美元係第二季就明顯回軟。
睇番今年上半年，分類指數中地產指數升咗近6000點，幅度接近20%；金融分類指數升咗5000點，幅度大約係15%；公用指數升近6500點，接近12%；工商分類指數升咗2400點，幅度約19%。
地產股唔容易再放贏
睇番各類指數，國企指數明顯跑輸大市，呢個反映咗國企股份係經濟減速同內地A股表現平平下受嘅影響。地產分類指數上半年表現理想，壓倒其他指數，若然同樓價指數比，上半年樓價指數升破咗160點，累積升幅有一成，呢個速度可以話都幾癲，如果年輕人要儲首期買樓，咁上半年樓價咁升法，肯定佢哋距離上車係會愈嚟愈遠。雖然好多人話樓價創新高，地產股好多都同歷史新高有距離，但如果只係睇番上半年，地產股升幅一啲都唔差，幅度跑贏買樓，主要係地產股手頭有土地儲備，加上有借貸，所以對樓價比較敏感。正常嚟講，樓價係上半年升咗咁多，下半年照計都好難維持，放係地產股走勢之上應該都係一樣。
至於跑第二嘅係工商分類指數，呢個指數嘅成份好好多人都唔係好知。佢咁叻主要係有隻重量級飛象騰訊（700），騰訊半年差唔多升咗一半，加上佢嘅市值去到2.65萬億元，拖起晒成個指數。其他工商分類成份股，仲有另一隻猛料嘢係吉利（175），佢雖然市值細好多，只有1500億元，但升幅就130%。吉利市盈率而家去到25倍，已經係一隻增長股嘅水平。汽車係一個成熟市場，如果吉利未來唔能夠擊敗其他對手搶到更大市場，或者成功開發其他新市場，壓力其實都幾大。其他成份股好似國泰（293）、中石油（857）、中海油（883）都唔係咁靚仔，所以呢個板塊表面風光，實際都幾參差。
匯控季尾表現轉強
金融分類指數主要係由跨國同本地銀行股帶動，中資金融股就偏弱，當中匯控（005）升幅同指數接近，但上個星期佢表現強勢，係周五跌市中只係微軟，若然大市反彈，佢有機會繼續領前。友邦（1299）由43元升上57元，升幅超過三成，表現大強勢。
至於公用股指數，係美息上升同大市整體向好下，都幾難跑贏大市，能夠有近一成升幅，其實已經飲得杯落。美國利率向上，對公用股唔算有利，好彩係政府送大禮，畀兩電有十五年專利，兼且回報率唔係減得咁多，加上內地容許提高售電價，令華潤電力（836）係第二季殺上，先至推番高表現。
上半年基本上買大股或者指數基金已夠贏。睇番第三季表現，指數差唔多升咗一成幾，已經進帳唔算，應該算係交到貨。第三季風險風險高咗。由於內地入摩成功，如果A股短期做番好啲，帶動番國企股追吓落後，咁個市或者仲會借勢再借多轉，但錢唔可以賺到咁盡，去到兩萬六樓上高位，有機會就可以食啲胡。
負責習大大訪港晚會電視廣播隨時OVERRUN
上個星期國家主席習近平訪港，活動之一係出席慶祝晚會。今次晚會交咗畀電視廣播承辦，最後順順利利完成，電視廣播叫做無失禮。
下死命令播到尾
聽電視廣播嘅高層講，為咗安排呢次活動，佢哋花咗唔少工夫，皆因每個參與製作的人都要經過安檢，而且要預錄大量節目，好多大星都要遷就時間入廠。今次活動壓軸係大合唱，主席習近平都會上台，聽聞高層已經下咗死命令，就算OVERRUN犧牲廣告都要播到尾。
電視廣播負責回歸晚會雖然多嘢做，但比起呢排搞出唔少風雨嘅同股不同權風波，已經係濕濕碎。呢單嘢當中涉及電視廣播主要股權的華人文化基金董事長黎瑞剛，被指以同股不同權方式持有股權。為咗平息事件，黎瑞剛最近頻頻訪港。
黎瑞剛的華人文化基金在上海揚名立萬，之後再收購中外不少媒體或創意文化產業，很多人還以為他是上海人，說起原來他是廣東人，祖籍中山，父母都講廣東話，有個弟弟都是講廣東話，唯獨他早年到了上海受教育，變成能聽講上海話，卻不懂說而廣東話。
黎瑞剛做過記者，很明白記者需要金句，說到投資TVB，就話「有錢、有才、有熱誠，投奔香港希望做點事」，才情兼備。除咗電視廣播外，六嬸的邵氏兄弟公司都找了他做主席，有人話除咗錢之外，可能都同黎瑞剛嘅三寸不爛之舌有關。
佢打骰嘅華人文化基金，股東有騰訊同阿里巴巴，已經證明咗佢把口幾厲害。
陸羽仁
回應 (0)
我要發表