港交所唔易食大茶飯
2017/06/26 08:41:51 網誌分類: 經濟
上周末國家發改委發佈《關於加強配氣價格監管的指導意見》,燃氣股受追捧,昆侖能源(135)周五升3%,為表現最好藍籌。其他燃氣股受追捧,華潤燃氣(01193)飆升10%,收26.75元;新奧能源(2688)升6%,報收46.25元;中國燃氣(384)上升5.5%,收報14.98元,港華燃氣(1083)仲創52周高,收市升1%,報5.22元。
同股不同權再惹議論
呢排港股係咪應該容許同股不同權再掀爭議,觸發點之一係TVB大股東的公司結構係同股不同權,作為大股東話事人之一的黎瑞剛上個星期訪港,就話自己入鄉隨俗,點都會守規矩,但同時就奉勸香港要諗吓點同國際接軌,皆因外國好多創科公司,都係同股不同權,若然死抱呢條規矩,可能就會錯失好多機會。
黎瑞剛打骰嘅華人文化基金,股東之一係阿里巴巴,大家都知阿里因為同股不同權嘅分歧擺唔平,最後阿里去咗美國掛牌。今年,阿里的螞蟻金服準備上市,本來傳出都係想嚟香港掛牌,但消息遲遲未落實,唔知係咪再遇到同一個問題。如果係嘅話,睇證監對TVB嘅態度,似乎都係唔會放鬆。咁螞蟻金服嚟香港掛牌,就隨時節外生板。
靜候螞蟻金服來港
市場靜候螞蟻金服多時,最後若果唔來香港,股民無得買固然有啲失望,但最大損失可能係港交所(388),因為香港好耐都無大型又夠號召力嘅新股上市,如果連呢個機會都泡湯,咁就相當無癮。無咗大型新股上市賺少筆之外,長遠都對交投有影響,想像吓如果香港無咗騰訊(700)係度買賣,成交會少咗幾多,再加埋對港股知名度的無形打擊,都真係好傷。而家雖然有騰訊頂住,但有人話螞蟻金服係繼百度、騰訊同阿里外第四隻最勁嘅科網股,如果呢件到口肥肉食唔到,港交所係咪好揼心先?
上個星期,港交所提出「創新初板」嘅諮詢,成為股價炒作嘅概念。根據建議,呢個板風險比創業板高,但參與「創新初板」的專業投資者或機構投資者,能自行承擔及評估風險。有人話咁創新板係咪可以容許同股不同權呢?若然可以嘅話,必要時咪叫螞蟻金服去呢個板上市囉。如果你係馬雲,聽到呢個「建議」,你又會唔會感興趣呢?
靠慳交數難為長久計
港交所係香港股票做獨市生意,的確係好好做,只係經過咗一輪高增長,呢幾年就開始遇到瓶頸,所以管理層要搵方法開源,當中包括去英國收購倫敦金屬交易所,呢單交易之後撞正商品跌價潮,至今仲未有係大茶飯,所以呢兩年港交所多少都要靠慳去交數,只係慳錢始終有盡頭,點樣搵到新水最重要,所以佢哋都好想搵多啲巨企嚟香港,當中科網股就最「性感」嘅目標,但點樣能夠闖過股權嘅限制,就唔係佢能夠話事。從監管角度,同股不同權有違保障小股東利益,過去證監被怡和大佢除牌都拒絕妥協,面對科企同一請求,過去已SAY過N0,將來遇到同樣情況係咪肯變就唔知,牌面睇港交所想食大茶飯都唔係咁易。
友好協進會擺酒奉送茅台送西餐
呢個月友好協進會上周舉行成立二十八周年晚會,好多證劵界都有捧場,好似有殼后稱號嘅朱太、仲有金融界議員張華峰。
張華峰豪送兩手港交所
友好協進會高層有唔少大孖沙,所以獎品十分豐富,除咗枱獎多之外,仲有抽獎,頭幾個都好實惠,有現金獎,又有金融界議員張華峰送出的兩手港交所股份,以當日收市價計接近兩萬元。回歸以來,港交所先有H股上市,近年又有滬港通、深港通,稍後應該還有債券通,用來作為禮品除了價值不菲,還特別有意思。張華峰是港交所的長期大好友,低位已經買進不少,係倉底擰啲出嚟送只係濕濕碎而已。
友好協進會雖然係本地社團,成晚氣氛好本地化,不過用餐就係西式,食完頭盤上湯,跟住就主菜甜品,然後就已經係咖啡或茶,十點左右已經散席。過去呢啲過百圍大龍鳳若然食中式,隨時食到十一點都未完,所以好多人見到食西餐都拍手叫好。當晚枱獎之一係國酒矛台,有中獎者好慷慨咁即中即開,與各人分享,實行茅台送西餐。雖一美中不足係,茅台飲唔晒想擰走,問起侍者佢就話唔知丟咗去邊囉。
陸羽仁
回應 (0)
我要發表