你加我又加

2017/06/19 08:41:54 網誌分類: 經濟

19 Jun

        六月份港股上上落落，有點位高勢危危哋嘅感覺。六月踏入下半個月，開始有啲敏感，除咗外圍美國加完息，科技股呢排表現飄忽，稍後大摩又會公佈會唔會將A股納入指數，遲啲就輪到七一領導人來港，傳言中嘅股市維穩期會唔會隨之結束。

        兩萬六千點阻力重重

        喺不明朗消息下，港股兩萬六千點阻力重重，借於美國加息恒指一度單日大跌逾300點，周五於匯控及多隻重磅內銀股力托下雖然回升，恒指反覆向上，最多升154點，全日升61點，收報25626，國企指數報10384，升38點。美股上周五就個別發展，杜指收市報21384點，升24點。納斯達克指數收市報6151點，跌13點。標普500指數收市報2433點，升不足1點。

        去到七月，香港就回歸咗二十年，有中環茶友話過咗咁多年，好多公司都面目全非，但能夠壯大者，似乎都係地產同做獨市生意嘅公用事業好似兩電、港鐵（066）等，好似中華煤氣上個星期就宣佈，由8月1日起調整煤氣收費，實質煤氣費（包括標準收費及燃料調整費）增幅為4.3%，呢個幅度相信多過好多打工仔今年嘅人工加幅。

        今次調整後，煤氣承諾未來兩年不會加價。煤氣公司常務董事陳永堅對於加價解畫，強調公司對調整收費一向十分謹慎，充份考慮客戶之承受能力，過去20年只調整收費5次，上次調整是2015年8月1日，距今已相隔兩年。佢又話，過去兩年經營成本不斷上漲，包括工程材料、員工開支及店舖租金等，而同期通脹亦達到5.5%。公司不斷積極開源節流，控制支出，但仍然未能抵銷成本的增加。再加上公司每年投資於管網及供氣設施動輒超過10億元，以維持安全可靠的供氣，因此有需要調整收費。

        茶友聽完陳老總咁講，就話佢講漏咗一樣嘢，就係佢預見到未來兩電嘅電費都唔慌平，既然係咁就不妨加定先。

        多謝環境局送大禮

        口依家本地能源公司主要係兩電一煤，當中煤氣唔受管制，皆因客戶可以選擇用電代替，包括煮食同煲水。近年煤氣增長步伐明顯減慢，除咗因為本地人口增長慢，電力公司不斷改善爐具鼓勵無火煮食，都帶來好大競爭，所以今年煤氣盈利增長似有若無，公司派紅股都有啲勉強，所以如果未來電價唔上升，煤氣生意都好難做。不過，早前兩間電力公司同政府達成協議，雖然降低咗回報率，但未來就可以大舉投資配合增加用氣發電，正路估將來電費可能稍減，跟住就會上調，最筍係佢攞正牌可以做足15年，日後唔理邊個做特首或者有無普選，都無人可以叫佢減低回報率。煤氣見到負責談判嘅環保局咁樣送大禮，畀兩電攞咗個咁正嘅條件續牌，仲唔放膽先加為敬咩。

        送股唔夠加價咁實際

        煤氣今年宣佈業績，都有維持10送1紅股，茶友話，佢留意到煤氣呢排派完股就跌，呢個情況呢兩年都出現，好多時跌番晒派股嘅升幅，咁樣反映佢增長動力唔夠，支持唔到派股。相反，佢阿媽恒基（012）呢兩年派完股，明年每股派息都可以維持，證明盈利同資金狀況好好多，所以佢對煤氣嘅投資價值都有啲懷疑，口依家管理層終於出手，以佢加幅嚟講都唔少，對保持業績增長有正面作用，最緊要係日後兩電加價，佢可以搭順風車齊齊伸手，所以話派股唔緊要，加價最實際。

        高銀中心食壽司感受大款嘅氣場

        內地大款行事同香港富豪唔同，其一是作風。內地大款普遍都係海派，同本地財主有錢要計住點使唔同。好似食嘢，唔少富豪都鍾意自己搞餐廳當飯堂，但一搞搞幾間兼唔論賺蝕，就唔係人人做得到。好似呢期財金圈成日講嘅九龍灣高銀中心幾間食肆，皆因大老闆潘蘇通係天津大業主，佢嘅飯堂不惜工本，早排佢搞酒會，有議員就專程過海一試，既然咁多人講，中環茶友都相約友好一試。

        試味菜單千元有找

        九龍灣話就話係商業區，晚上都係水盡鵝飛，高銀中心未租得晒，夜間只得幾家餐廳依然燈光火猛。茶友當晚光顧咗日本餐廳。當晚點了唔使一千銀嘅試味菜單，聽講如果用貴賓房，仲可以安排即席落鍋鮮炸的天婦羅和日本師傅現場製作的手握壽司。

        雖然唔係睇住佢炸，茶友當晚試嘅即炸天婦羅都做得幾好，有味紫菜加魚子，用嚟送冰凍清酒最好。該店嘅手握壽司都唔錯，食呢啲壽司毋須添加醬汁直送入口，最緊要係整好後要適時進食。

        食完一餐，茶友點評價？佢話以千元有找嘅價錢，同佢老闆咁勁嘅氣場比，就真係唔講得貴，畢竟九龍灣仲係新區，價錢唔可以太離地。不過，印象最深刻，講到底仲係餐廳嘅寧願同埋一入大廈門前嘅巨型四面佛囉。

        陸羽仁