手機股要回歸基本步
2017/06/12 10:11:53 網誌分類: 經濟
蘋果急插拖跌納指
上周五晚杜瓊斯工業平均指數早段最多升過131點，高見21,305點，再創歷史高位，全日收報21,271點，升89點。雖然杜指連續第3日上升，但標準普爾500指數收報2,431點，跌咗2點，最值得留意係代表科技股嘅納斯達克指數收報6,207點，勁跌113點或1.8%，當日蘋果公司曾急挫5.8%，全日跌3.88%，報148.98美元，是2016年1月以來最大單日跌幅。其他科網股都受累，微軟跌2.3%，是跌幅第二大杜指成份股，股王亞馬遜股價跌3.2%，facebook跌3.3%，谷歌母公司Alphabet跌3.4%。受科網股急跌影響，恐慌指數VIX由逾23年低反彈，收升5.3%至10.70。
外圍科技股大幅波動，唔多唔少都同佢哋今年累積升幅大有關。上個星期香港嘅科技股就分開兩路發展。阿里上周四晚舉行投資者日時預期2018財年收入最少增45%，消息帶動騰訊向好，收升1.46%報277.4元，基本上係單天保至尊，撐住咗當日嘅恒指。另一邊廂，俾人狙擊嘅手機設備股就係周末策動反攻，主角之一嘅瑞聲科技（2018）係公司管理層澄清後復牌，股價連日夾淡友，去到早前遭狙擊的上周五繼續收復失地，升3.38%報99.5元，成表現最佳藍籌，連帶部份手機設備股都造好。
沽空機構吼準天時地利
瑞聲被沽空機構葛咸城發表報告質疑後股價由118元高位回落，現在已經收復一半失地，看好看淡雙方向自大打口水戰。對於散戶嚟講，大家唔係專家，亦都無咁多資源去了解公司運作，所以好難搞得清楚誰是誰非。有中環茶友話，作為一個買賣寧靈活嘅普通投資者，轉倉換貨話咁易，佢就唔會落場抽注嘞。如果叫佢焗賭，佢就睇高淡友一線多啲。
茶友無沽空，但佢點解話睇高淡友一線呢？佢覺得呢班造淡嘅沽空機構夠膽出手，係睇準天時地利。地利就係做咗個別公司嘅調研，覺得目標公司至少有表面傷痕，講出嚟起碼似層層，令人半信半疑。天時就係佢睇準呢啲公司基本上股價都係升到好高，估值處於行業高位，而且盈利好可能接近周期頂部，咁即係話就算盤數係真，佢哋係咪值得咁貴都好難講。係呢啲狀況，好多時就會有股東出嚟配股套現抽吓水，市場供應多咗之後，如果業績稍為放緩，估值唔可以維持咁高，股價就慢慢回落。沽空機構係股東未出手抽水時，就跳出來搶閘借貨沽空，等機會再回補，所以就算佢盤數無問題，可能識計數嘅基金，都一樣會沽空佢哋賺錢，如果真係搵到佢哋盤數有問題，唔好話造假咁離譜，就算係粉飾吓，一無咗呢啲化妝，咁就隨時變番十二點鐘係嘅灰姑娘，無咁省鏡之餘，身價自然都大跌啦，所以茶友覺得，呢排咁多沽空機構出嚟搵食，而且唔少係搵手機設備股做目標，唔係咁簡單嘅個別事件。
估值唔低貴股不宜買
睇番外圍情況都差唔多，科網股係半年結前出現急插，唔排除係基金見佢哋升得多，食胡計吓數，如果係咁呢類股份就有可能短期見咗頂。香港嘅科網股走勢其實都幾受外圍影響，所以呢而間公司同沽空機構打交，你夾我、我又夾番你，短期邊個大力就邊個贏，但中長期就要睇番公司嘅基本因素，如果以值博率嚟講，股市去到年幾高位，基本上貴股嘅風險就大咗，就算覺得個市仲未跌完，想炒吓股，都係買啲估值平啲，累積升幅無咁大嘅股價穩陣啲，好過走去博手機設備股嘞。
九龍城廣場料易手難忘毓民牛肉麵
內資來港掃物業之風似乎未歇，最新目標指向商場。上個星期就傳出九龍城廣場獲買家以五十億元洽購，業主蔡志明回應傳聞時說，已與準買方達成口頭承諾。今次的買家在內地經營大型超級市場，很有興趣來港插旗開超市，有興趣買入全幢商場作自用。中國人牙齒當金使，看來交易成事機會頗高。
九龍城廣場落成以來，經營都經過不少起伏，這個項目是由最近新聞人物、百利保主席羅旭瑞打造，當年政府推出九龍城這幅地皮起商場，由於區內沒有同類物業，加上有停車場，食正九龍塘一帶的中高檔消費，經營相當成功，九七後羅旭瑞一度財政緊絀，遂把商場出售，輾轉落入蔡志明手上，當時買入價不足十五億元。
最先靠「大婆」起家
九龍城廣場面積唔係好大，加上蔡志明投資物業主要是博升值，多年來在呢個場開過檔嘅舖頭，較多人留意嘅可能係黃毓民曾經係度搞嘅牛肉麵，當年開張仲有好多名人到賀。有中環茶友想當年，黃毓民從政做名嘴，多年來大起大落，有段時間佢太座做咗間大婆牛肉麵，成為佢嘅強力後援，呢間舖仲改埋名做毓民牛肉麵，後來進駐九龍城廣場，變身私房菜，一度人氣十足。當時茶友都去捧過場，記得除咗牛肉麵唔錯，其他台灣名食都唔錯，主人家仲專誠整咗條湯煮海斑俾佢試。不過，早幾年毓民因為家事同埋人工、食材係咁加，終於決定離場，呢間食堂終於落幕。
陸羽仁
回應 (0)
我要發表