買股售後服務差
2017/06/05 08:42:00 網誌分類: 經濟
加息前銀行股發力
內地一直以嚟被詬病係搞到地球污煙瘴氣嘅世界工廠，點知突然之間特朗普話佢唔想牽頭搞環保，仲要做番開礦呢啲經濟，佢嘅作為令人真係大開眼界。
雖然特朗普出怪招，但無阻美股強勢，上周各類股份向好下，美股爆上創出高位，周五美股三大指數收市再升，杜指收市報21206點，升咗62點，納斯達克指數收市報6305點，升58點，標普500指數收市報2439點，升9點。港股周五受帶動，再創今年高位。港股上周僅四日市，恒指收報25924，以全周計累積上升285點；國企指數收報10666，國指累積上漲87點。
藍籌股上周普遍向上，周末開始炒起金融股，內銀嘅建行（939）及工行（1398）齊創一年新高，建行曾見6.65元，收升1.07%報6.6元；工行升1.89%高收5.4元；另外匯控（005）升0.74%報收68.4元；友邦（1299）升0.09%報55.35元。美國呢個月加息，理論上對銀行股有利，如果大市要衝破兩萬六關口，可能都要銀行股出番一分力。
港交所變落後股
呢次港股小登高，港交所終於發力，單日抽高衝破200元水平，收升4.17%報205元，為全日最高位，為恒指帶來29點升幅，但就同佢一年新高213元仲有啲距離。過往大市向好，港交所多數會跑贏，特別係北水南下，內地股民最愛買獨家生意嘅佢，但呢輪港股回升，就見到佢有小小失寵。陸羽仁請教市場猛人，佢覺得同近年港股交投不振，港交所條水愈食愈窄有啲關係。
猛人話，港交所嘅黃金期係2015年中大時代創出嘅298元，當時佢同300元心理關口只差一步，但若論氣勢，最勁仲係2007年造出嘅高點265元，當時有王牌分析員話睇500元，有財經名嘴真係瞓身去買ACCUMULATER，結果輸到甩褲，由此亦可見當時佢概念幾得、幾咁惹起憧憬。事隔八年佢再重遊高峰雖然創咗歷史高價，但已經無咗呢種令人聯想嘅無限魅力。睇番佢嘅盈利，由2012年嘅40億元，升到去15年嘅79億元，增長都算強勁，但去年就跌番落去58億元，今年上半年佢嘅業績應該都唔靚仔，下半年就睇成交同上市公司數量多唔多嘞。由於佢而家市盈率有成40倍，遠遠高過同樣做獨家生意兼有利潤保障嘅兩電，所以佢必須維持相當嘅增長，先至可以頂住股價。
未來港交所增長係邊度嚟呢？?家佢收入最多都係股票買賣，其他倫敦商品交易所、人仔期貨都未係好得。至於股票買賣前景點呢？猛人話，佢最好做係H股初來上市時，國企個個求係香港掛牌，現在此情不再，而家國企來港搵番自己人做保薦人，上咗市就算，好多國企一掛牌就插，交投甚少，所以新股「錢景」係咁上下。
錢景瓣數唔夠多
至於二手股票買賣，同樣交投不振，皆因現在好多公司都銀彈充足，唔需要集資，自然無乜興趣搞公司活動，股民無癮者眾。最近仲有一個不明朗因素，就係港交所就監管改革同證監會交手，最後好可能中間落墨，但證監以後好可能意見多多，莊家活動都收斂埋。
猛人形容，港交所而家要好努力四圍兜生意至頂得住條數，但做得生意嚟就無乜時間搞售後服務，所以近年上市新股乏善足陳，大家炒嚟炒去得隻騰訊（700），其他就係傳統藍籌，老散就輸到有啲怕，所以而家投行難做、經紀難做，個市係咁升，但市場人士就過緊夏日寒冬，係咁環境隻港交所上得番200元已經算叻啦。
市旺短炒仲可以
聽完猛人講，覺得佢嘅分析略嫌負面，反正宜家行行難做，唔單係證券業。不過，佢有樣講得啱嘅係，港交所市盈率咁高，交出好增長係應該嘅，而家佢嘅挑戰唔止，生意已經唔係咁易做，所以趁市旺買佢短炒可以，但死攬長揸又係另一回事。
岳少都要避貴租名下日菜搬咗竇
最近係上環營業嘅懷石料理KaisekiDen搬咗竇，聽聞係業主要大幅加租，最近遷址到灣仔，呢間日本菜館老闆係出名識食嘅旅發局主席林建岳嘅，而家搬番去老闆物業其實仲方便。
懷石料理以精緻見稱，有中環茶友去試過。佢話品嘗懷石料理，眼福多過口福。成個菜擺設、食材配搭和精美餐具都好精緻。不過，佢最欣賞係當日十多人用餐，出動安排了七、八名店員貼身服務，在餐飲業人手極短缺下，搵到咁多人服侍，茶友又點會唔留低深刻印象。
講開岳少，茶友話佢呢排真係有人搭埋枱等佢開餐，咁講唔係講食飯，係講緊最近政府賣地嘅成績。早排，恒基李四叔以內地大款出手嘅價位買咗中環塊地王，當時大家都吃咗一驚，仲估會唔會出高咗，點知跟住上星期九龍灣地王開標，南豐用咗246億銀嚟買，當區呎價半年升咗一倍，大家先感覺到原來麵粉咁搶手，反證恒基唔係唯一清兵。
中環商廈有價一掃烏氣
恒基吾道不孤，係佢隔籬海景仲靚嘅兩幢大廈，岳少名下嘅麗新都有五成業權。如果用地王成本價計，粗粗哋都應該值一、二百億銀。岳少係九七年買入其中一幢，當時每呎成本價萬幾銀，而家睇番就一啲都唔係貴，證明買靚嘢最緊要有實力守。資產升值咁多，所以佢隻股麗國（0191）一年間由0.9元爆上咗2.45元，對佢嚟講，升值只係帳面富貴，最緊要係一吐烏氣嘛。
陸羽仁
回應 (0)
我要發表