有水唔抽會後悔
2017/11/06 08:42:09 網誌分類: 經濟
賣大廈長實套巨款
股票市場跟紅頂白，着重短線消息不令人奇怪。閱文（772）集團上市有得炒，大家自然起哄，長實賣中環中心，地產股水波不興，公眾關注就下降，畢竟有能力炒寫字樓者始終是極少數有銀之人也。不過，有中環茶友話，長實是本港龍頭地產商，一舉一動曾經好矚目，呢次賣出重大物業，點都有啲嘢值得留意。
呢次中環中心賣出，長實股價反應唔大，主要係消息傳咗差唔多成年，成交價由300億一直加上去，呢次交易作價402億元，以約122萬方呎計，呎價約3.3萬元，而且呢個價仲唔包大廈的命名權。有消息買家考慮會拆售，呎價介乎3.5萬元至5.6萬元。從交易細節安排，雙方會以六個月完成交易，咁即係話如果買家可以係呢段時間拆售，咁樣過一過手就可以賺一筆。
長實係大企業，當然唔會鼓勵炒風，佢俾咁長成交期買家去完成交易，主要係成交價唔平，涉及總金額唔少，要籌組融資都要相當時間。睇番海航早前買啟德地皮，事後都被金管局照肺。中環中心雖然係商用物業，但無人保證如果炒風熾烈嘅話，金管局會唔會關注。中環近日的物業成交，最矚目當然係美利道停車場以近五萬元一呎成交，仲有就係啱啱市建局嘅重建項目，中環中心成交價同呢啲項目嘅價錢比有啲折讓，但唔好忘記中環中心拆散咗業權，價值會打啲折扣，加上本身落成咗一段時間，所以接貨買家點樣造成個勢吸引下一手，都幾考功夫㗎。
呢次長實高價沽貨，有人關心管理層係咪睇淡後市。正常嚟講，長實係地產公司，只要有人肯俾得起錢，手頭物業都會考慮出售。至於係咪睇淡後市，而家地價咁貴，外圍又開始縮表，下個月美國有可能加息，對樓價照計好難睇得好好。長實係過去幾年，基本上買地唔多，反映佢哋對高價投地有保留，集團手頭仲有唔少農地，而家政府傾農地補地價似乎容易咗，估計未來佢哋高價投地嘅興趣依然唔大，呢單交易賺咗過百億元，小股東當然關心會唔會派吓特別息啦。
獨角獸估值偏高
茶友話，好似長實出售大型商廈套現。其實最近科網公司紛紛上市，可能都同佢哋擔心銀根漸漸收緊有關。過去十年，各國政府大力泵水，搞到通街都係平錢，好多創科公司都輕易可以融到大筆資金，不少初創企業未曾點樣賺到錢，就宣稱成為身價達到10億美元嘅獨角獸，所以最近都有批評，出嚟話好多獨角獸公司估值偏高，獨角獸估值貴，照計科網新股都唔會平。
呢排華爾街科網股狂升，開始有啲2000年科網股熱潮嘅味道。當年好多巨型科網股無穩住股票有價抽水集資，事後都大呻老襯，個別仲因為無集資又燒錢快而倒閉收場，所以而家科網股估值咁高，點解唔上市集吓資呢？從呢個角度睇，炒科網股最實際都係當自己係投機者，唔好太過諗得長線。
科網股抽水，呢排最勇嘅都係騰訊（700），佢有份嘅眾安（6060）先上市，跟住到閱文，下個星期又傳佢有股權嘅易鑫會上市，跟住有音樂業務，最新外電仲引述消息，話騰訊有份投資的荷里活製片商STXEntertainment，已聘請高盛及摩根大通，就來港上市事宜提供顧問服務，計劃最快明年首季IPO，或集資約5億美元，估值或介乎25億至45億美元。
騰訊動作多多谷高股價
騰訊消息多多，摩根士丹利上周就唱響摩笛，上調佢嘅目標價，由370元上調至420元。大摩唱好嘅理由係，騰訊第三季遊戲收入將再創紀錄，由「王者榮耀」及其他主要遊戲推動，該行預測第三季遊戲收入按年升40%，及按季升7%，其中流動遊戲收入達創紀錄的170億元人民幣，按年升72%，按季升15%。該行亦看好其廣告收益，估計第三季廣告收入達112億元人民幣，按年升50%，及按季升10%。此外，預期騰訊也將因眾安保險（6060）上市錄得一次過收益。420元目標價為2018市盈率39倍，該行訂定最「牛」目標價526元，為2018市盈率47倍，最「熊」價259元，為2018年市盈率29倍，摩笛從來都係亂咁吹，跟佢炒無所謂，最緊要係唔好太認真！
維港泳明年喺新世界名廈登陸？
早兩日中環茶友坐埋，有人手背有個黑印，座中人問起，原來係游完維港泳嘅號碼痕未褪。
改由灣仔游去尖沙咀
維港泳今年渡海路線由過去鯉魚門到鯉景灣，改為尖沙咀到灣仔，現今路線與昔日同樣由尖沙咀到灣仔相比已經因為填海大為縮短，較鯉魚門路線亦短近五百米，差不多等如少游三分之二路程。茶友游完話路程好輕鬆，早前佢應該係海中間影吓相，兜吓圈，因為係維港暢泳機會始終唔多。
喺尖沙咀落水同鯉魚門落水，最大分別係新線可以睇到兩岸唔同嘅名廈。今年有人教路話因應水流，望住IFC游就自然會沖到去灣仔上岸地點（結果證明係流料），但係茫茫大海，大家都係望住灣仔會展做目標。
今年新線運作順利，兼且口碑唔錯，來年估計繼續用新線機會好大。不過，有消息就話明年可能會掉轉方向，首度喺港島落水、九陸登陸，實行由灣仔游番去尖沙咀，皆因贊助商係尖沙咀嘅新世界中心重建明年好大機會落成，喺新廈上岸可以順便增加人氣，咁仲唔係一舉兩得？
陸羽仁
http://www.bastillepost.com/hongkong/article/2577845-特朗普孫女唱中文歌的微言大義
http://pop.stheadline.com/content.php?vid=66854&cat=d
20171105低買高賣
上周內銀在周一衝上波段高位後, 全線在周五跌至波段低位, 又是一次入貨的好時機。
如果想問哪一個價是波段高位及低位, 只要拿出日線圖一看就知。
各大內銀在過去這兩個月都在一個很整齊的長方形空間內波動。
只要在接近低位時買入, 在接近高位時沽出就可以了。(而且已買賣多次了)
說簡單是很簡單, 只要不貪心就可以賺到錢。
所以剛過去的周五, 小貓又100%持倉了。
雖然, 可能這遊戲會突然結束, 但因為相信內銀長線仍有上升空間, 所以風險有限。
短線可暫以買入價-5%作為止蝕。
但這裡要提示一點, 就是如要突破現在的上落市, 在啟動新一輪升市前, 很大可能會先跌穿這個箱型波動市的底部。
所以要是真的止蝕了, 要有心理準備隨時追貨。
若中長線投資者, 暫時仍然安全, 不用太擔心, 都係那一句:恒指守住27900就別亂走, 坐定定等過年吧