炒恒指換馬防損手
2017/12/04 08:41:49 網誌分類: 經濟
借住通俄門引起政治不隱憂慮，杜指上周五一度下瀉350點，收市跌幅收窄至40點，報24,231點。杜指全日高低波幅400點，為去年六月廿四日英國脫歐以來最大，「恐慌指數」的VIX曾爆升29%，三個月最激。至於納指收報6,847點，跌26點；標指收2,642點，跌5點。以全周計美指就靚仔嘞，其中周四勁升331點，錄得今年最大升市兼升穿24,000點。
上周五波動市中，科技股沽壓特別大，有「FANG」之稱的四隻科技股，包括facebook（Fb）、亞馬遜、Netflix及Google母公司Alphabet，上周三市值合共蒸發600億美元，歷來最傷。以全周計，標指半導體股跌逾5%，廿三個月來最差。港股美國預託證券低收，騰訊控股（00700）收報383.06元，跌1.94元。若按比例計相當於恒指跌91點。
兩新股板塊已大幅炒高
港股11月急急爆上3萬點，跟住回返落嚟，同騰訊快快手爆上400元，跟手又碌番落嚟一樣。近日股民謔稱恒指做「騰指」，皆因大市升跌好受佢影響。現時騰訊佔恒指比重，受到指數計算封頂影響，只能去到上限10%，上周佢股價連插幾日，相信同佢係恒指權重封頂都有啲關係。連同手機設備股瑞聲科技（2318），恒指受科網股影響無疑係大咗。恒指變騰指，主要係呢排騰訊進銳退速，波動性大，所以對指數影響特別明顯。
對於騰訊前景，當佢上升之時，好多人話有買貴、無買錯，呢個講法未必係錯。係新經濟模式底下，騰訊未來仲好有發展，無人夠膽話佢已經見大頂，但以佢由近排高位439元插番落上周收市價385元，足足有12%，買貴咗都咪話心理上唔痛苦。若然係炒輪波幅仲大，加上炒輪要計時間值，若然佢調咗落嚟攤係度1、2個月，單係蝕時間值都已經蝕到暈。
有中環茶友話，恒指服務公司呢次換馬，換出咗弱勢嘅國泰（293）同昆侖能源（135），換入炒到興烚烚嘅瑞聲同碧桂園（2007）。手機設備股同內房股今年真係升到你唔信，估值去到歴來少見的高水平，若然佢哋大炒之後真係見頂，咁對恒指影響都幾不利！
國泰競爭漸趨白熱化
恒指公司揀成份股有本身的機制，部份指數基金好似盈富（2800）要跟住換馬，無論你認同與否都好，都唔能夠否認其影響力。過往，茶友就會趁換馬研究吓被踢出局的股份，係基金換貨沽出時，會唔會有執平嘢機會，好似之前佢趁恒指服務公司踢走中煤能源（1898），就執咗一筆。今次恒指換出兩隻股份，茶友認為質素一般，若然要揀，佢就寧取昆能而不取國泰。
茶友近年一直唔睇好國泰，事實證明呢隻傳統藍籌有波幅無升幅，而家仲被人踢出恒指。本來，大市升咗咁多，國泰嚴重落後，加上佢基本盈利仲有賺，主要受期油合約拖累，到咗明年期油合約逐步到期，影響應該減少，依家都令人有買吓落後的興趣。
不過，茶友聽航空界行尊講，近年本地航空競爭激烈，過往國泰主要係東南亞受廉航衝擊，但今年長途航線開始受中資航空公司搶生意威脅，呢個挑戰只係啱啱開始，仲未去到白熱化。國泰出局當日股價難免有沽壓，收跌1.5%報11.82元。聽完行尊咁講，茶友當然唔敢咁快去低撈。
鴻騰入指數炒味濃
至於昆能過去受能源價格急跌打擊盈利大跌。今年中期業績，集團錄得期內股東應佔溢利24.2億元人民幣，每股基本盈利0.2997元人民幣，數字叫做見得吓人。佢呢排股價已經回勇，由於佢近年表現一般，相信基金揸貨唔多，所以拋售壓力唔大。
恒指以外，國企指數呢輪亦有變動，新貴廣汽（2238）升1.22%收報19.84元；遭剔出的龍源電力（916）則升1%收報5.31元。獲加入恒生綜合大中型股指數的眾安（6060）收升0.6%報71.65元；同樣獲納入的鴻騰（6088）收升6.6%報6.3元。鴻騰本來已經見有鑊氣，借住呢個消息就炒得仲積極。
食丁麵有感情炒新股要理性
港人鍾情的即食麵公司日清上市，有傳日清6間券商借出近13.26億元孖展額，相當於公開發售集資1.13億元計，超額認購逾10.7倍。日清的出前一丁向來甚受消費者歡迎，近年茶餐廳還流行加錢可以轉食丁麵的規矩。不過，炒股唔可以睇外表，鍾意食日前嘅即食麵，唔等如就要睇好佢嘅股票。
歌神教煮芝士公仔麵
多年來，日清發展策略都好積極，一直不以擁有出前一丁滿足，先後收購了多年來的對手公仔麵和福字麵。有公仔麵之父王清熙就爆料，日清一面打價格戰、一面多番斟盤，務求一統本地即食麵市場。在品牌統一後，即食麵價格即開始加價策略。現時三個品牌都有本身的特色和粉絲，近年好多茶麵餐廳有賣撈丁，又有賣埋炒公仔麵。最記得好多年前，歌神許冠傑曾經教人煮芝士公仔麵，可見港產公仔麵幾深得民心。
本來，日清差不多一統港產即食麵市場，但近年本地群雄雲集，在市場角逐的還有韓國的辛辣麵和印尼的印尼麵，兩者都有大集團背景，再加上台灣等地形形色色的產品，令日清近年增長有限。日清係香港發展好難有大增長，好自然要北望神州，但內地強手仲多，最多人識當然係上市多年的康師傅（322），康師傅以重口味喺內地市場大受歡迎，出前一丁同公仔麵似乎唔係咁易同佢比，而且從康師傅呢幾年表現，內地即食麵市場似乎都已經過咗高增長時期，所以買唔買日清，就要理性計吓數。
陸羽仁
http://www.bastillepost.com/hongkong/article/2652813-戰鬥民族借北韓插美國佬一刀
http://www.bastillepost.com/hongkong/article/2650089-獨家康宏金融爆驚天「穿櫃桶底」-被走資逾31億料
http://www.bastillepost.com/hongkong/article/2650192-特朗普在中東投彈-另有所圖
http://www.bastillepost.com/hongkong/article/2646901-加煙稅-無反對
http://www.bastillepost.com/hongkong/article/2644399-香港不應染紅
陸sir 有無考慮過選人大？
http://www.bastillepost.com/hongkong/article/2641454-沒有低端人口-只有低端施政