A股成股海窪地
2018/01/08 08:41:54 網誌分類: 經濟
美股今年1月效應勁
美股今年1月效應強勁，成為全球升市火車頭。上周杜指繼突破25,000點後，周五晚進一步抽高，杜指收報25,295點，再創紀錄新高，單日勁升220點或0.88%；。美國稅改通過，變相等如政府袋錢入企業同納稅人荷包，加埋數字顯示美國薪酬增長加快，市場大炒再膨脹效應持續。單是上周指數累漲2.3%，成為2003年來最強開局。除咗杜指，標準普爾500指數收報2,743點，升19點或0.7%；納斯達克綜合指數收報7,136點，升58點或0.83%。三項主要指數連續第三日同創收市新高。總結本周，標普500指數周升2.6%，納指升3.4%。
大市急升，從投機角度有智慧不如趁勢，要短炒仍然係科技股當炙手可熱，成為推升美股的主要動力，互聯網設備製造商思科升1.4%，互聯網公司谷歌母公司Alphabet升1.3%，微軟升1.2%，蘋果公司升1.1%。另一個有利炒再膨脹的因素係克利夫蘭聯儲銀行總裁梅斯特估計，就業數據強勁，聯儲局今年可能加息四次。費城聯儲銀行總裁哈克則預期，聯儲局今年只加息兩次。
美股大炒1月效應，港股呢鋪唔蝕底，恒指九連升下，股份輪流炒。周末中港地產股齊齊跑出，有大追落後之勢。信置單日升近5%收報14.42元，為表現最好的藍籌股；新世界（017）升3.5%收報12.4元；恒隆地產（101）收升3.3%報20.2元；九龍倉置業（1997）則漲3.1%收報53.9元。
上證距高點大把水位
今年1月效應唔單止對美股靈驗，對全球股市都發揮作用，內地A股同日本股市都同步向好。內地A股去年底係高位回落，上證綜指曾經插穿3,300點，今年開局就回升。有投資銀行家認為今年A股可吼，皆因內地股市可能係全球最安全的大型股市。
投資銀行家咁講，理據有兩個，最直接係因為內地A股相比全球股市落後，上證綜指係2015年6月曾經見過5166點，用高位計仲係低咗34%，同一時間港股已經打破咗大時代的高位，美股更加係迭創新高，所以用高位比，內地股市形同內地人所講的「價值窪地」。
中國的經濟數據，最近表現唔錯，好多分析家估計，2017年內地增長可能比官方預定目標6.8%稍高，今年增長速度會略為放慢，但以6%以上的增速仍然係大國中比較靚仔的一員。最新公佈內地服務業活動加快擴張，2017年12月，財新中國服務業採購經理指數（PMI）升至53.9，同樣高於市場預期，是近3年半以來最高，主要是需求轉強，企業的新業務明顯增長，上月新定單創逾兩年半最高；業界的經營信心亦升至6個月以來最高。去年11月為51.9。期內，中國綜合PMI由51.6升至53，是去年最高位。財新智庫首席經濟學家何帆係解讀數據時認為，內地服務業經營活動增速加快，原因是新業務量增加，約14%的受訪企業均表示新定單上升。雖然內地近年希望減少倚賴出口嚟拉動經濟，但全球市場景氣回暖，都成為內地增長利好因素。
另一個有利A股因素，係去年MSCI指數已經納入咗A股。係入摩初期，A股所佔比重唔大，不過，內地而家講緊加強非流通股轉做流通股，若然內地流通股比重增加，應該有利調升比重。前兩年內地曾經炒作A股入摩，去年好事成真，個市反而無點炒，呢樣嘢反而畀咗外資一個入貨機會，若然美國股市續上，估值逐步扯高，外資對A股興趣應該增加。從風險回報去計，買A股下跌空間細啲，但上升空間大啲，所以投資銀行家覺得佢係最安全的大型股市。
希瑪隨時超額千倍
內地股市相對偏低，本港投資者若然想買A股，而家可以返內地投資或透過滬港或深港通入市，較簡單方法係買同A股掛鈎的指數基金（ETF）。去年A股基金好似南方A50（2828）升幅都唔錯，但就跑輸咗盈富基金（2800）小小，而家A50派息率有2厘，盈富基金就有3厘。除咗買A股基金，若然鍾意炒個股，就可以留意A股掛牌或準備分拆公司上A股嘅公司。
大市向好，新股紛呈，焦點股眼科醫生林順潮創辦的希瑪眼科醫療（3309）熱爆，估計將會大超額。希瑪今日中午截止公開發售，本月15日在主板掛牌。有證券行表示，大市氣氛良好，希瑪眼科醫療首日掛牌有望升30至40%。不過，對散戶嚟講，最關心的是分配辦法，以佢超額情況隨時近千倍，想一人畀一手都唔容易。
港樓200呎價扺東南亞萬呎豪宅
本港樓價貴，不少人改到海外買樓。以前買海外樓多數係英國、加拿大，近年就好多人會買東南亞，好似泰國、馬來西亞。
最近有中環茶友去過馬來西亞睇樓，包括係新加坡隔鄰的新山的森林城市，同埋檳城。大馬近年受油價滑落等因素影響，幣值跌咗好多，唔少新加坡人都去新山買業。茶友睇過的別墅樓盤，大約四、五百萬有交易。
至於檳城近年好似澳門，一樣係舊城區獲取了世遺金漆招牌，年前同樣吸引不少新加坡人買入舊區的物業。大馬政府對於外地人購買土地業權有限制，但仍無限鄰國買家吸納舊樓的使用權。
最近，大馬的樓盤吸引不少海外買家，早前娛樂版報道了本地藝人姜浩文在大馬置業。現時香港連新界二手居屋都要賣四百萬，同一個價錢在當地已可買豪宅。茶友睇過一間排屋，五千呎四個套房，只係賣五百萬港元。如果有一千萬，在港島只可以買200呎新樓，在當地可買這幢豪宅一梯只有兩伙的萬呎巨宅，還附送四百呎的泳池，呢啲價錢計起嚟仲平過返內地買樓。
陸羽仁
http://www.bastillepost.com/hongkong/article/2750987-一個月10的員工流失率，代表什麼？
http://www.bastillepost.com/hongkong/article/2747758-公私營合作-搵地要承壓
http://www.bastillepost.com/hongkong/article/2744321-為什麼聰明人會犯低級錯誤？
http://www.bastillepost.com/hongkong/article/2741241-開放社會缺少一點人性
http://www.bastillepost.com/hongkong/article/2738128-我住在僭建居所的歲月