低撈利豐教訓大
2017/12/18 12:31:35 網誌分類: 經濟
沽售主要業務要見紅
賺咗錢想去歎世界，若然生意麻麻，咁就唯有繼續拼搏，好似呢兩年受到網絡帶動去中介化影響的利豐，就趕喺年尾前宣佈出售業務同宣派特別股息的計劃，睇嚟係好想喺過年前先做好呢次賣產。
根據安排，利豐會將家具、美容和毛衣產品業務，以總現金代價11億美元，即約85.36億港元出售。買家為大股東馮氏控股（1937）、馮氏投資及聯想控股（3396）的弘毅投資組成的公司，馮氏佔股55%，出資46.948億元，餘下由弘毅持有。出售資產後，利豐公佈派發5.2億美元特別股息，相當於每股47.6港仙。以大股東馮氏家族持有26億股計，即可收取特別息合計12.4億元。收息後大股東購回產品業務55%，實際出資是34.52億元。
賣產後利豐除咗派息，剩餘約5.8億美元將為利豐提供額外的財務實力和靈活度，增強未來的供應鏈。利豐行政總裁馮裕鈞解釋，呢次交易能讓公司業務繼續簡化，所得金額將為未來發展增加彈性。不過，利豐要為商譽減值，交易將要承擔6.1億美元終止經營業務虧損，明年完成交易時，則可能要為1.06億美元外匯虧損入帳。佢仲強調，出售產品可讓利豐集中核心的供應鏈解決方案、物流業務以及在岸批發業務，認為未來利豐餘下的業務仍然有利可圖。
賣仔摸頭眼淚流
利豐呢次賣產派息，市場算係受落，股價由公佈前低位3.4元連日彈升，收市報4.43元。不過，呢個只係係呢一年半載嚟講，因為如果拉長啲去睇，利豐股價跌幅慘烈，呢次出售咗主要資產之一，只係套現唔夠一百億元，高位買咗貨的投資者，真係有啲賣仔莫摸頭、摸頭眼淚流、欲哭無淚的感覺。
曾幾何時，利豐係市場神仙股，股價升個不停，2001年佢股價唔夠3元，之後反覆上升，10年之後2011年初見過最高25.47元，升幅達7.4倍。帶動利豐股價迭創新高係當時大為流行的物流概念。由於成為中國工廠，利豐在內地做買手賺到笑，在當時吹到天下無敵的供應鏈管理下，借住高增長同高估值，股價可以迭創新高，當時利豐再透過併購買入低估值公司去締造增長推動股價。不過，隨著科技發展，全球零售業開始去中介化，加上收購業務刺激增長的策略無法維持，開始有大行吹淡風，令佢股價喺2011年見頂，跌到今年幾乎打回原形。呢次佢公佈賣產交易雖然獲得市場接納，視為重組簡化業務的一步，兼且重有「高息派發」，但對於高位接貨的股民來說，「高息」只是糖仔一粒。
高估值跌起嚟唔得了
87股災後，馮氏家族曾經喺低價私有化利豐，之後重新上市，展開股價大升的神奇之旅。今次夥拍聯想將部份業務變相私有化，會否重塑傳奇要下回分解，不過就算成咗，同而家股東都已經無關。當日利豐由高位回落，好多投資者見佢跌得咁多，不斷追入，有人買咗蝕錢加注再溝，佢哋主要係從股價見過的高位去睇，覺得跌咗咁多抵買啦，無睇佢股價同派息水平，結果愈溝愈淡，所以利豐最殺人唔係佢高價之時，而係跌到中途吸引入低撈。
陸羽仁過去不時強調買股準則之一，係貴股唔買，經常舉的例子之一就係利豐，認為佢之前咁高估值，好嘢都全部反映晒，一有唔兌現的時候，跌幅好厲害，不過，近兩年都已經少提咗呢隻股，皆因佢喺高位跌到咁殘，手頭揸咗的股東，已經買咗雞肋，揸之無味、沽之已經太遲。今日講和呢個故事，主要係提醒投資者，買啲高估值股票要好小心，特別喺佢哋跌落嚟時去低撈，真係要睇清楚係咪抵買，否則大升之時無賺過錢，反覆下跌時就貪平招，咁就加倍唔抵嘞。
慶日皇壽辰酒會歎靚和牛
日本農產品優質味美，是港人至愛，當日出席慶祝日皇誕辰日本領事館酒會的主禮嘉賓張建宗坦言，香港過去十年是日本出口農產品最多的地方，可見港人對日本食物的偏愛。
由於深明香港人民以食為天的性格，所以每年酒會都會預備不同日式名食款待來賓，堪稱是城中最多美食的酒會。單是和牛，當日就有岩手縣和佐賀縣的食材，現場即煮即食，肉香四溢，而且廚師出手豪爽，每份和牛都有相當份量，吸引賓客大排長龍。另外，又有攤檔介紹不同縣市的特色旅遊節目，氣氛猶如小型嘉年華。
陸羽仁
回應 (0)
我要發表