坐住大象衝浪
2018/01/15 08:41:50 網誌分類: 經濟
港股呢排強到無朋友，上周五創出14連升，主要係強勢股唞咗一排後又再發力。「股王」騰訊（700）再獲大行唱好發威，高位上落消化的平保（2318）都發力，恒指以全日高位收市，收報31412點，經過14連升後，指數已經14連升，累積上漲2178點。單以上周計，恒指累積上升597點。
摩通股價高收
港股高收之後，又輪到美股帶動美國上市的預託證券。周五杜瓊斯指數收報25,803點，勁升228點；納斯達克指數收報7,261點，升49點；標準普爾500指數收報2,786點，升18點。近排炒港股要睇中美兩個市場興炒乜。美股周五爆升，好多傳統大股都郁，杜指成份股傳統藍籌波音升咗2.5%，思科升1.9%，摩通升1.65%。美國銀行股呢排表現唔錯，大笨象匯控（005）上個星期扮演咗托塔天王的角色，係強股唞氣下，佢就力頂指數，成為港股得以連升的功，借住外圍銀行股造好，預託證券曾經衝破咗85元。
fb辣招搞到股價跌
大笨象過去係本地股民視為最穩陣的股，但經過近10年低迷，好多長期擁躉都開始心淡。呢輪佢股價回勇，主要喺因為有北水入貨。平保係過年前披露買入5%股權，唔排除會吸引其他內資增持。陸羽仁係過年前18年頭穩選，係北水對港股定價話語權增加下，手頭有匯控股份者，就算唔增持，都可以坐定啲，睇睇呢次個浪衝得幾高。
上個星期五美國科技股普遍造好，唯獨facebook宣佈調整訊息流，優先傳遞個人及朋友間的訊息，然後才是商業機構及政治訊息，消息令股價收跌4.5%。fb呢個做法流傳已久，唔單止係股民關心，仲係廣告同傳媒界關心，因為這幾年不少人網媒都靠佢傳播訊息，好多企業養咗大班人，透過佢做宣傳。fb做旺個場之後就減少派發這類訊息，咁即係打爛人飯碗，自然被人鬧佢過橋抽板。好多只係用fb做宣傳的媒體仲隨時會俾佢搞到半生不死。fb創辦人朱克伯格係校園創立呢盤生意時，已經被人質疑佢偷橋兼過橋抽板，但商業世界係弱肉強食，如果主動權唔係自己度，鬧又有乜用呢？
fb變更發有訊息的方法，解釋係因為佢雜類訊息太多，惹起用家不滿，所以減派商業機構同政治訊息。不過，背後好多人相信這是為了要求機構投付費帖文，以增加公司廣告收入。從最近聖誕的情況，fb呢招似乎幾得。在收入增加之餘，有人認為咁樣做法有竭澤而漁的味道，因為而家唔少人已經覺得，打開fb睇到太多廣告，令佢哋興趣大減。從呢個角度睇，佢股價下跌可能唔係因為呢招搵唔到錢，又或者覺得佢過橋抽板有問題，而係佢已經食得咁盡，咁未來仲有乜方法再增加盈利呢？
熱爆新股何妨食胡
呢排市旺但大家唔敢追，好多人轉去抽新股。繼閱文（772）之後，由眼科醫生林順潮創立的熱爆新股希瑪眼科醫療（3309）周一在主板掛牌，上市前在暗盤市場初段大幅上升，高位接近5元，較招股價2.9元，升逾70%。
希瑪眼科公開發售部份獲得1568倍超額認購，公司啟動回撥機制，令在港發售股數至佔整體的一半，但一手中籤率仍只有8%，投資者要抽三百手才穩獲一手。至於「頭槌飛」就有1195張，每張「頂頭槌飛」獲分派十手。由於貨源散，升得多最好就係食胡先啦。
僭建風波火燒連環船
律政司司長鄭若驊僭建風波愈演演烈，有人翻查舊帳，燒到立法會議員毛孟靜頭上，指其單位佔用非住宅空間，需要還原。政經圈笑言，要從政最好先賣樓。
鄭若驊在新界大屋被揭僭建，中環茶友說起，皆話司長大屋前臨大海，位置突出，一看就知是險地。
有玄學家加多句，大屋有海景，不宜太接近，否則就變成大海無收，相當犯忌，所以不要以為海景愈貼愈好。
茶友聽後加多句，名人錢賺夠就想求功名，但以現今勢態，此乃自陷險地。正如之前有證券界林奮強，搞到被廉署調查。剛剛毛毛議員之大屋，亦被人起底。毛毛議員之豪宅圍封部份地方，年前被人質疑，她回應說沒有僭建，一直拒拆，最近事件被撩起，原來她的單位圍封不屬僭建，卻有非法佔用之嫌，需要還原，只是規管部門不同而已。本來她的個案有機會側側膊走過場，現在火燒連環船，她亦成為池魚遭殃。
鄭若驊出任司長，大屋要重新裝修，估計花費數以百萬元計，幸好律政司司長有官邸位於山頂，遷入後舊居可以大興土木不影響日常生活。有到訪過此官邸者形容，大屋格局細小，地方淺窄，在三司中最為狹隘，未知是否如此，過去三任司長有兩任都是單身，風水上形同獨家村。
陸羽仁
http://www.bastillepost.com/hongkong/article/2768865-在政治動盪中，最受苦的往往是窮人
http://www.bastillepost.com/hongkong/article/2765350-不要賭中國失敗
http://www.bastillepost.com/hongkong/article/2761923-政治有如生意-沒有妥協不能成局
http://www.bastillepost.com/hongkong/article/2758323-政治經濟關係密不可分
網誌分類: 經濟
不調整就更加要小心了20180113
上周意外地沒有調整, 繼而創出了港股12連升, 13連升, 14連升的歷史記錄。
令到許多過去行之有效的分析方法失效。(這就是我上周溫馨提示說這周應該要有調整的理據)
也令到一些人睇唔起技術分析和避險的穩重操作。認為買入後死坐就是賺錢的最佳方法。
這也無可厚非的, 因為勝者為王, 賺到錢就是王者。
但這種不懼調整, 不止蝕的超長線投資方式, 在每一個牛市裡都會有許多這種散戶是這樣賺錢的, 只要夠膽買, 夠膽揸, 唔止蝕, 就能賺到比個D出出入入, 分析多多的人更多利潤。
只要您有足夠長的投資經歷, 您都會見過好幾次這種情況。
所以我在17年頭時, 有講過, 大戶會營造一個只要調整就入市, 只要死坐就可以創新高的環境比散戶習慣。
為的是在牛三後的熊一時, 每次下跌都吸引散戶接貨, 每次逃生門散戶都唔識走。
唔想被大戶咁樣調教, 就要時常儆醒, 但卻會導致在牛市中賺少左, 也會在牛市中被有眼光的新一代股王們嘲笑。
這些都是必須習慣和付出的代價。 (能夠清醒控制自己貪婪與恐懼的達人另計, 小貓做唔到)
講返內銀啦~(我指的是工中建)
1月9日周二, 我因為見到中行超買後上升動力減弱, 加上恒指已連升10天, 所以選擇沽出, 但定下若升穿4.05就追
1月10日周三, 我沽出埋同樣上 升力減退的工行。港股破記錄12連升
1月11日周四, 港股再記錄13連升, 而且眾內銀上升動力再度轉強, 我唯有依照計劃, 在尾市以4.05重新買入一半中行。
1月12日周五 內銀繼續升, 港股再創記錄14連升, 但我認為現階段50%持股是合理, 沒有再增持, 即使工行也回復動力。
到了現在這個階段, 我已經無法用短期分析來估計未來的內銀走勢, 因為既然港股可以連創三次記錄地唔調整, 內銀即使下周調整, 但擺脫過往"超買後失去動力就會插"的規律, 跌少少之後再升過也並不奇怪。
而且, 內銀長線我是看好的, 甚至可以話即使比現價再升30~50%也有可能(主升浪未到, 或才剛開始)。所以我打算暫時就以50%持股的策略面對這種不調整的升市。至於另外50%的利潤就留給有膽色的別人去賺吧~我只想賺有把握的利潤。
這種分散風險的投資方式更適合我(已經賺左十幾日也夠了)。另外50%我會等大市調整時才入貨。
另外我再提示一下大家, 這次牛市主力股票就是騰訊和平保, 只要這兩隻大股不倒, 這次牛市都會玩下去, 若有人真的認為自己眼光好, 就應該持有這兩隻高增長高估值的牛股, 不應該只買內銀。
小貓一再重申, 買內銀是小貓的個人喜好, 志在收息和有波幅, 但買得內銀的人買的是一份安心, 就唔好同別人鬥升幅啦。
利申:50%持股 (全倉建行,半倉中行)