山靜如太古
2018/02/12 08:42:24 網誌分類: 經濟
呢排全球股市大波動，美股上周五又chok，杜指高開逾百點後急轉直下，曾一度大跌500點，隨後傳來美國預算案獲足夠票數通過，杜指收復失地並高收。杜瓊斯指數收報24190點，上周五單日升330點；納斯達克指數收報6874點，升97點；標準普爾500指數收報2619點，升38點。總結本周走勢，三大指數依然大跌5%，創下兩年來最大單周跌幅。
在市場風吹雨打下，老牌藍籌太古（019）宣佈易帥。今次安排頗為特別，俗稱大班的主席一職會由大股東史懷雅家族成員出任，本來的大班史樂山退休之餘，會留任國泰（293）主席一職。
今次是太古大股東首度出任大班，市場解讀是公司近年業務停滯不前，大股東要親赴前線領軍。國泰出身的史樂山雖然夠鐘退休，但因為國泰正推行三年改革計劃，故要留住識途老馬，擔任領航角色。
連年業績陷低潮
回顧過去幾年，太古業務處於低潮，一大原因是兩大核心業務中的航空業務備受內憂外患困擾，表現不前。曾經是集團賺錢機器的國泰，過去十年表現時好時壞，特別是過去三年業績下滑。業績衰弱的內憂是公司燃油對沖策略出現嚴重失誤，外憂是備受廉航和港航夾攻，加上市場消費形態改變，頭等和商務艙需求持續疲弱，令公司盈利受壓。
國泰表現不濟，去年太古相當運滯，集團另一主要業務海洋磡探，受到全球石油開採活動下降打擊，需要大幅撇帳，令地產幾乎成為集團唯一支柱。
太古地產在市場品牌卓越，集團作風穩紥穩打，主力集中建造龐大的收租業務，積極開拓內地市場。不過收租是長線經營，起樓賣樓才是快速賺錢的業務。然而太古在港出售項目土地儲備有限，加上這幾年商場租金受壓，令太古地產表現亦不見得特別標青。
太古系過去幾年時運麻麻，可從股價表現反映。系內業績最失色的國泰，在恒指創出歷史新高再回調3000點的整個升浪中，幾乎全無進帳。國泰歷史高位是2009年創出的22.55元，上周收報12.24元，比高位低45%，呢輪跌浪國泰回落幅度唔大，若然以大市高位計，佢差唔多跑輸咗一半。
至於國泰控股控股公司太古連同A、B股，市值約為不足1200億元，太古A股價最高去過131.8元，是在2011年創出，上周股價73.6元，相差43%，而且喺這個升浪全無收惠，甚至不升反跌。
缺乏新增長動力
系內公司中，表現最好的是太地（1972），歷來股價最高是2013年創出的29元，上周收市是25.9元，與高位僅相差12%，而且市值達到1500億元，是系內最大公司。
睇完太古系幾間主要公司表現，咁新大班上場迎接挑戰，究竟是形勢比人強，難以改變局面？抑或行運醫生醫病尾呢？牌面睇，太古系積弱，有客觀形勢左右，也有公司累積的結構性問題。論公司業務，太古主要經營舊經濟行業，少沾手新興行業，舊經濟行業十居其九都變成微利生意，由大至航空、小至食品都如是，唯一暴利生意是地產，只是房地產市場現時水位極高，市場對地產生意很難給予高估值，點樣可以找尋新增長來源，是新大班巨大挑戰。
不看新業務，若然只看資產，呢系其實相當吸引，特別係太古A跌到現水平，單是持有的地產業務已隨時超值，何況還有國泰和其他生意奉送？然而，太古系過去一直很少有刺激股價反映公司價值的動作，正應了山靜如太古，無乜聲氣的形容。
大股東自家財富自己管
太古這種公司文化，不是一朝一夕形成，多少反映集團長期以來由練習生出任最高管理層，偏向集團領導作風。這種與政府文官制度接近運作方式優點是不如出大亂子，但日積月累就變成創新不足，予人暮氣之感。有批評就指出，國泰以至太古要改革，應該考慮外聘CEO，甚至讓中國人領軍。現時由大股東家族親自出馬，自家財富自家管，理論上可擺脫掌櫃風格，換個角度看可能有異曲同工之用。
上個財政年度，太古公佈為海洋業務撇帳，又開始啟動國泰三年重整計劃，似乎有決心想一洗頹風，同時為新大班上台鋪路。大件夾抵食的太古穩陣有餘，未來能否脫胎換骨，就要留意新人上場是否能夠帶來進取求變的新風。
啟德站夠闊落馬時亨擺全羊宴
呢幾年年頭，港鐵主席馬時亨都會廣邀傳媒友好食烤全羊，呢個習慣由佢做官開始到𠵱家，地點就隨佢身份不同，由南區大班會所到呢次的啟德站。
馬主席呢次席設九龍啟德站，中環茶友出席之餘，經過附近幾個新落成屋苑，發覺唔少單位已經落成。
上蓋起樓搵銀《財富》大讚
近距離觀察反而無由外面睇咁擠逼，而且距離地鐵站相當接近，唔怪得地價愈搶愈高。
茶友話，內資海航用200幾億圍咗幾幅地，當時呎價1.3萬元，個個話係天價，點想到最近獅子山隧道出路的地皮，賣到成2.7萬元一呎，真係昨日天價，今日市值！
今次食烤羊的啟德站大堂寬廣，隨時擺到20圍。個站起到咁大，是預咗未來東九體育城起好，有大型活動舉辦，可以疏散幾萬人流。
早前，《財富雜誌》選咗港鐵為50間改變世界的公司，同獲躋身的中國公司有4間，包括小米同阿里支付。港鐵行政總裁梁國權話，《財富雜誌》咁欣賞佢哋，一大原因係因為公司的商業模式成功，遠勝西方的集體運輸系統。
港鐵的鐵路加物業模式，係澳洲、英國等地方都成為參考對象，因為大家都明白，如果要做好運輸系統，非錢不行，喺鐵路沿線起樓，可以自我延續發展，成為香港創出來的絕世好橋。
陸羽仁
http://www.bastillepost.com/hongkong/article/2869268-不穿衣的皇帝，還叫你把衣服脫掉
http://www.bastillepost.com/hongkong/article/2866495-廣播條例修訂-事關tvb股權
http://www.bastillepost.com/hongkong/article/2862411-中國要盡快推出鼓勵生育政策
http://www.bastillepost.com/hongkong/article/2859219-春晚二三事
http://www.bastillepost.com/hongkong/article/2855832-120年前戊戌維新的故事
http://www.bastillepost.com/hongkong/article/2848858-僭建造狗屋，綑綁一團糟
http://www.bastillepost.com/hongkong/article/2845864-平昌微笑與青瓦台事件的血痕
http://www.bastillepost.com/hongkong/article/2842035-巴士災難曝露結構性問題