一月超升 二月捱價
2018/02/05 12:15:44 網誌分類: 經濟
債息升推低美股有先兆
由於1月非農業職位增長超預期，市場憂慮聯儲局加息步伐加快，十年期美債息飆上2.8厘，令杜指一開市就跌，跟住仲愈跌愈多，收市失守26000點，急跌665點，創1年半以來最大跌幅，更是2008年12月以來最大單日點數跌幅。
早時美國勞工部公佈，1月份非農業職位增加20萬個，高於市場預期18萬個。另外，上月平均時薪按月升0.3%符預期，升幅較上月低0.1%，按年增長2.9%，是2009年6月以來最大升幅。
市場推算，若薪酬按年增長3%，就可以帶動通脹率達到聯儲局2%目標，現在已達2.9%，意味加息力度會轉強。市場由原先估計加息兩次，改為今年加息三次，仲話下月加息機會達到約九成。
美息上升下，十年期國債孳息率升穿2.8厘，最高見2.852厘，是2014年初以來新高，30年期國債孳息率突破3厘，股市即刻被嚇窒。美股喺1月份升幅凌厲，踏入2月調整睇嚟難以避免。由於最後兩日下跌之勢甚急，全周杜指變成跌4.1%，標普500指數跌3.9%，兩者均是2016年1月以來最差單周表現，納指跌3.5%，是2016年2月以來最大跌幅。在美國上市的港股與預託證券，都回落超過600點，上周跌市撈咗貨，可能都要捱吓價。
美息表現也令美元轉強，美匯指數重上89水平，商品價格回落，紐約期金收市報每盎司1337.3美元，下跌10.6美元或0.8%。紐約期油收市報每桶65.45美元，跌35美仙或0.5%。倫敦期油收市報68.58美元，跌1.07美元或1.5%。美國聯儲局議息前夕，債息冉冉上升，觸及2.7厘敏感點，已經係一個苗頭。1月呢個過去，整個投資市場無論債、股、商品等，都由鐘擺一邊回一回頭，唔排除大市會有個明顯啲調整，測試一下市場承接力。
港股喺2018年一口氣升成4000點，內銀股喺呢一段發力，月前陸羽仁話如果諗唔到想買邊隻內銀股，咁就闔埋眼買工行（1398），之後工行股價持續大漲，未開車前入貨者已經食到胡，終於重新坐回全球第一市值銀行寶座。對於管理層嚟講，成為全球第一當然值得自豪，但對股東嚟講，公司市值咁大，咁就要問係咪真係值咁多錢，抑或係估值偏高咗？將來仲有幾大空間發展？
工行重回全球銀行一哥
O依家個市開始調整浪，咁早前高追會唔會變咗摸頂呢？記得喺上次A股大時代，隻中車炒合併，炒到市值大過波音，陸羽仁當時聽到個心都打個突，見佢回落就即係叫入咗貨的茶友離場，所以做咗一哥，就要秤吓自己係咪頂得順。
工行喺四大內銀中市值最大，呢個浪佢表現甚強，之前創咗歷史新高，單計A股總市值達到2.6萬億元人民幣，超越全球市值最大的摩根大通約2.54萬億元市值，成為全球第一大行。有內媒計過數，2006年年底，上市不久的工行總市值約2100億美元，是全球市值第三大銀行，位居花旗和美國銀行之後，摩根大通當時排在第五位，市值大約1660億美元。要留意的係，在2007年牛市高峰期，工商銀行市值曾達到3740億美元，成為全球市值第一銀行，隨後連續6年保持這一排名。隨著股價狂跌，工行市值嚴重縮水。2013年6月，富國銀行超越工行成為全球市值最大銀行，當時工行市值跌至約為2250億美元。
喺美國銀行中，富國同摩通被視為應對金融海嘯最好的兩間銀行，兩者叮噹馬頭，特別是摩通在2016年中起大幅上漲，從不足60美元，上漲到2017年3月最高92.75美元，市值飆升到3200多億美元，一度遠遠拋離咗工行。直至呢一輪發力，先再壓過摩通。
工行、富國和摩通三雄爭霸，勝負同所處市場表現好有關係。2007年10月16日，上證指數達到6124點的歷史高位，工行股價也在2007年11月1日攀升至5.54元歷史高位，令工行站上一哥位置，但高處不勝寒，A股同工行股價都向下反覆尋底。在2008年從高位大幅回撤逾60%，在當年9月創下1.98元低點。工行地位另一個高潮位係2015年A股出現大時代，工行曾經力壓兩大勁敵短暫居首，但隨著A股爆破，一哥之位再拱手讓人。呢一次工行創出紀錄新高，其實已遠遠跑贏咗大市。
市值受投資氣氛同估值影響，另一個價值比較係睇盈利。工行過去盈利相當穩定，一直是全球最賺錢銀行之一。2016年年底，工商銀行淨利潤如果用美元計有402億。對比下，摩根大通、富國銀行和美國銀行2016年淨利潤分別為247.33億美元、219.38億美元和179.06億美元，明顯低於工行。工商銀行在過去10年間營業收入，實現14.1%年化增長，歸屬母公司淨利潤年化增長幅度高達19%。美國銀行股被視為舊經濟股份，估值唔算太高，但以工行盈利能力同穩定性，估值仲低過美國銀行。
內地銀行集中度更高
美國係世界第一大經濟體、同時跨國企業滲透性比內地強，美國銀行業實力應該比中國強。中國銀行股大隻過美國，表面睇有啲虛虛哋，令人有點感覺不安。工行雖然喺全球銀行界登頂，卻又睇唔到工行股價好浮，一個解釋係中國經濟結構同美國唔同，美國有龐大資本市場，銀行在融資作用無內地咁重要，同時大陸仲係國企主導，銀行更係經營集中的行業，令到工行成為巨無霸。從呢個角度睇，工行雖然做咗一哥，係有佢本身道理。不過，早排若然喺佢急升後高追，咁就難免要捱價啦。
好炒唔炒炒壹仔 《壹週》賣盤跣一舖
呢排市場最八卦的話題唔係謎網股，亦唔係指數見幾多，而係《壹週刊》賣盤觸礁，呢單交易連牛頭角順嫂都識得話唔睇好，大家唔明點解壹傳媒高層會撞個頭埋去。結果，公司發完通告話賣香港業務已經搞掂，轉過頭竟然又話無收過錢，最後交易失敗，講得婉轉啲，呢個結果乜唔係一早寫喺牆上咩。
《壹週刊》賣盤失敗，最攞景係班員工走去訪問將會回巢的女老總，女老總「串爆」話，周刊成日做起底跟蹤，邊個有料邊個無料點都有啲分數，所以佢一早反對賣盤俾接手買家。表面睇，女老總講法好合理，但諗真一層，呢啲咁表面嘅嘢，壹傳媒高層同老闆點會唔知，所以交易進行必然有女老總唔知的秘辛，只不過O依家俾佢講中咁解啫。記得《壹週刊》賣盤消息傳出，外界好多政治演繹，又話阿爺出錢畀泊車仔買起周刊，實行用錢滅聲。當時已有中環茶友話，《壹週刊》交易價TOO GOOD TO BE TRUE。自從佢將所有內容上網後，廣告同銷量急跌，影響力今非昔比，阿爺使唔使畀幾億滅聲，變相泵水俾壹傳媒經營呀？
自從呢單交易傳出波折，提出陰謀論者就開始失憶，唔再講滅聲論。O依家交易失敗，遲啲又有無人會話阿爺忽然覺悟咗，所以斬佢水喉呢？中環茶友話，有時陰謀論呢啲嘢講出來好吸引，但信得多就可能搵自己笨，好似《壹週刊》賣盤，股價一度炒上，茶友就一直堅信佢賣唔成，亦無興趣炒呢個消息。
睇番呢次賣盤賣到倒瀉蘿蟹，壹傳媒股價好可能又插水，有貨者隨時困喺世紀巨艇之上。早排個市升得咁勁，炒作機會極多，又何必蹚渾水呢？
陸羽仁
回應 (0)
我要發表