買長和係叻人
2018/03/19 08:41:46 網誌分類: 經濟
富豪作風各有不同
杜瓊斯工業平均指數一度重上兩萬五之上，收市報24946點，升72點或0.29%；標準普爾500指數收報2752點，升4點或0.17%，結束連續四天下跌；納斯達克綜合指數收報7481點，升不足1點。總結本周，道指累跌1.5%，標普500指數跌1.2%，納指跌1%。
投資者焦點落在經濟數據之上。其中美國上月工業生產升1.1%，是去年10月以來最大升幅，並高於市場預期的0.3%。密歇根大學3月消費信心指數升至102，創14年來最高，市場原先預期跌至99.3。
上個星期最大的財經新聞之一，相信係長和主席李嘉誠交棒，由長子李澤鉅繼任。李澤鉅在集團多年，加上睇李嘉誠係記者會上思考敏捷，交班明顯係按計劃進行，相信短期對股價都無乜影響。
李嘉誠成為香港首富，資深股民印象最深刻當然係佢喺1979年向匯豐收購和黃控制性股權，令到王國規模暴增。和黃當年因為投資過勇負債纍纍被債權銀行匯豐接管，大班沈弼為公司搵個好人家，結果揀中李嘉誠，呢個係令長實集團壯大的重要一步。
李四叔係瞓身搏殺格
中環茶友形容，本地富豪各人有各人風格，新地郭家可以話係一注獨贏格，佢主力基本上只集中做地產，早年仲要係全部放喺香港，近年才稍為放多啲喺內地。恒基李四叔就係瞓身搏殺格，佢持有恒基超過七成股權，係揸住旗艦公司股份比重最多的富豪，所以樓市上升，佢食得最應。至於長和係開枝散葉型，涉及業務最廣，李嘉誠策略可以叫做市值極大化，不斷併購同分拆上市公司，係最積極同擅長運用資本市場的富豪，所以佢有二千幾億身家，但控制公司市值過萬二億元，財富產生影響力槓桿最大，所以佢唔止係香港最多錢的人，而且仲係最有財勢。
唔同富豪有唔同風格，亦適合唔同投資者，李四叔鍾意揸重自己公司，做佢小股東只要坐定定唔郁，四叔就已經幫你做晒所有最有利的決定。李嘉誠擅用資本市場，所以系內併購活動最頻繁，過去每隔三、幾年就有大大小小改組，若然食正方向，咁賺錢機會多，若然唔係咁識走位，咁就無咁着數，所以叻人特別適合做長和小股東。
不過，呢三大華資，咁多年來表現都跑贏大市，長期持有佢哋股票，升值都非常驚人，好似長實以上市價計，至今升值1500倍，若然連股息都投入，增值5000倍，買1萬元今日就有5000萬元。早年買咗佢哋股票唔放，𠵱家應該都唔使做。
業務進入資本密集穩定期
隨着本地經濟成熟，同埋公司市值增長到咁龐大，業務變成資本密集，當然唔可能再有咁強勁增長，長期持有佢哋只能希望有穩定收入。如果希望增加回報，大概只有兩個方法，一係利用高買低賣，由於呢啲公司業務多，加上大股東持有唔少股份，對股東唔會太差，每年吼準一、兩個機會低吸，然後候高回吐，係增加回報方法。另一個就係另選其他增長型公司。以香港目前市場咁成熟，要搵到唔容易，想食大茶飯可能就要留意以中國為主要市場的新興行業至得。
盈利倒退都可以做超購王？
上星期做網上廣告的毛記葵涌開始招股，據講反應熱爆。毛記公開發售集資約810萬元，故孖展額相當於超額認購1108倍，有可能挑戰超購王地位。
若毛記未來認購熱度未變，不單止可超越本周掛牌，錄得約2600倍超額認購的賓仕國際（1705），甚或有力挑戰本港史上「超購王」，於2014上市的Magnum（現稱奧克斯國際）（2080）超購逾3550倍紀錄。
盈利倒退都有人信
毛記早於2017年上半年申請主板上市申請，惟去年底已過期失效，公司於今年1月再次遞交上市文件。據財務資料顯示，截至去年11月底止的8個月，毛記僅賺約516.7萬元，按年倒退84%。
有證券界認為，毛記若然趕唔切今年上市，將來仲有無機會上都好難講，皆因互聯網世界變化快到無人信，毛記盈利迅速倒退，自從佢上咗位之後，做埋廣告公司嗰位，所以𠵱家好多廣告公司都唔會推薦啲客搵佢，加上收費加咗唔少，所以業務有見頂回落之勢。
不過，炒股好多時唔係睇業績，呢隻股知名度高，而且炒家放風話可以炒高佢搵網民接棒，唔少人可能都會信。莊家搵股民接火棒，口頭禪係「不要問、只要信」。毛記葵涌賺錢倒退唔單止可以上市，仲話可以做超購王，真係信不信由你，不過最重要的是，呢啲股如果掛咗牌後高追，咁就真係要小心嘞。
陸羽仁
http://www.bastillepost.com/hongkong/article/2950279-特朗普的選舉工程
陳茂波真的係阿茂整餅，無嗰樣整嗰樣，叫他全民派錢就整色整水設框框想$15500以下才有份，搞分化。 「但據悉政府高層繼續反對派錢，反對的理據也一如既往，認為措施濫用資源，不分貧富地派錢，連李嘉誠也可以收到6000元，移民海外的港人也有得派，他們沒有交稅，對香港沒有貢獻，為甚麼要派給他們呢？」宜家呢啲人多還是普羅香港市民占絕大多數？講得出呢啲藉口嘅所謂精英真是低智反智得可以。 圍城外的人睇香港係資本天堂，係往中國的踏腳石，中途站非目的地；圍城內的人睇就是政治唔識玩，民生又搞唔掂。
http://www.bastillepost.com/hongkong/article/2947186-明年人人派6000？
http://www.bastillepost.com/hongkong/article/2944350-圍城
http://www.bastillepost.com/hongkong/article/2940650-佔中暴動後遺-中央連番落閘/
http://www.bastillepost.com/hongkong/article/2938301-拆局大灣區發展/