嚇鬼策略撐住地產股
2018/04/30 08:41:36 網誌分類: 經濟
美股上周五無乜變化，杜指收報24311點，跌11點；納指收報7119點，升1點；標普500指數收報2669點，升2點。
同時美國公佈首季實際GDP，按季增長2.3%，勝市場預期，惟較上季度增長低0.6百分點，雖然美國經濟增長放緩，但已是自2015年以來表現最佳的數據。
覓地小組高呼好唔夠地
美國債息飊升衝過三厘，對地產股本來係壞消息，但地產股無乜點跌。中環茶友笑言，呢個可能要多謝覓地小組出來托市。上周覓地小組公佈諮詢文件，詳列18個長中短期覓地方案，同時直言政府早年土地不足估算「偏向保守」，預計本港土地短缺遠超1200公頃，現有規劃不足以建立土地儲備，仲形容土地問題達到「水深火熱地步」，佢仲強調呢18個選項個個都有代價，無一個係無痛。
香港缺地係人都知，否則點會樓價咁貴都咁多人入市，皆因大家擔心今日唔買，明日仲貴，但覓地小組跳出嚟話缺地情況比政府估計仲嚴重，咁係咪好得人驚先？茶友話，小組咁講好明顯係嚇鬼策略（ScareTactic），有咁大件事講到咁大件事，否則邊個得閒理你。𠵱家佢講到無地好嚴重，咁就可以製造民意，支持佢哋提出的建議。
呢個策略係咪真係可以嚇到既得利益者讓步未知，但就好可能嚇到無樓等上車者仲驚買唔到樓。本來政府成日話未來供應正在增加緊，將來好多樓買，大家唔使咁心急，但覓地小組𠵱家就話原來唔夠地情況比政府估計仲嚴重，咁市民反應會係點呢？
有地產界話，呢兩年樓價急升，真係連佢哋都諗唔到，樓價升成咁，搞到佢哋都唔敢睇淡，所以地價咁貴都有人買。今年樓宇落成量增加，發展商本來都想加快賣樓，但因為近日港匯受壓，拆息上升，佢哋都唔係咁敢推大盤，寧願等埋六月美國加息後先出手。
由於無乜新盤推出，購買力流咗去二手，令二手市場係咁乾升。覓地小組18個選項一早曝光，大家都覺得係新瓶舊酒，所以買家喺公佈前照樣入市，搞到就算股市跌，樓價都企硬唔企，好多屋苑喺方案公佈前再創新高，𠵱家揭出嚟最搶睇的信息，就係土地不足「水深火熱」，咁對樓市係咪會火上加油，市場好快就會交出答案。
官商合作勢成主軸
小組列出18個選項，但心目中最想係邊個呢？小組一邊話缺地1200公傾，一邊就突出利用新界農地儲備選項，估計大型發展商合共擁有不少於1000公頃新界農地，建議由政府提供基建，發展商提供農地發展房屋，但需要提供一定數目資助房屋。雖然小組話對各土地選項沒有前設，但就對呢個選項講得好詳細，聲明如要用私人新界農地儲備，政府需要有獨立機制，確保政府公帑投入，能換回一定比例公營房屋，需要設立獨立架構及社會認可公平、透明、公開機制，以釋除官商勾結疑慮。
所以好多人都覺得，其他方案都係陪太子讀書，真正想搞都係同發展商合作起樓。茶友話，小組呢個建議其實都係面對現實，因為香港乜都有程序，而且仲係搞極都唔完，如果唔同有地發展商合作，當局可以點樣搵地呢？
覓地小組是否為官商合作鳴鑼開路，要等幾個月諮詢期完咗先有初步答案，跟住仲要有好多程序要走，要等合作項目起好樓賣得，相信無十年都要五年，期間需求可能又會累積。喺諮詢未完成前，政府對各個方案都唔會踩盡油去做。
地產股跌得唔夠多
覓地報告利好發展商，本來應該買地產股，若然官商合作落實，相信最得益係新地（016）、恒基（012）、長實（1003）呢啲龍頭地產股。好似長和系主席李嘉誠喺呢個月就多番增持長實（1113），股價67.4元及66.9元左右，累計涉資7.41億元。增持後李嘉誠所持權益增至31.82%。茶友就搖頭猛話可惜，本來息口向上，地產股應該會跌吓，但𠵱家佢哋跌幅反而唔係咁大，搞到佢無乜平貨執，佢唔係大戶，入貨量同李超人無得比，亦都唔一定要買長實，所以都唔會心急，寧願等佢夠平先至出手。
太地樓鬥太地股磚頭有擁躉
股價樓價呢排分開走，不過如果買樓係自住，就算樓貴股平，有人都寧願選擇買樓唔租樓。有人亦覺得樓係實物，同股票係公仔紙唔同，所以將睇樓買樓當成興趣。
最近，有中環茶友就去咗大嶼山睇咗個叫白沙（WHITESANDS）的項目，呢個項目係太古發展，而且仲係獨立屋，位置喺東涌入啲，所在地要有禁區紙至入得，所以自成一國。項目由接近2000呎至2000幾呎，以呎價兩萬銀左右計，現今已經算係細碼貨。太古起樓質素唔需要擔心，𠵱家個盤28個單位賣咗23個。太古起樓都有不少擁躉，但近年佢哋起住宅數量唔多，基本上已經無乜盤，呢幾個現樓單位都已經係當中有限存貨。
講到投資價值就睇兩樣嘢，首先當然係樓市大環境，如果樓市繼續熱爆，咁自然乜樓都會升；再者就係東涌樓市，曾經有段時間，東涌樓市慢熱過外面，主要係供應較多，但𠵱家距離港珠澳大橋開通唔夠一年，如果日後好多大款喺大橋過境，東涌就成為佢哋最近的市中心。港珠澳大橋有人話係大白象，有人話佢一定得，究竟得定唔得，都會影響區內樓價。
如果將太地（1972）股票同太古樓盤比，太地上周收27.35元，息率有2.8厘，淨值有44元，收息肯定回報好過收租，點解會咁樣，關鍵正係好多人鍾意揸磚頭抑或揸公仔紙。
陸羽仁
盧 sir 無須介意，只要睇睇鍵盤就不難估計將1931錯打成1937而已
http://www.bastillepost.com/hongkong/article/3066165-難為正邪定分界?current_cat=1092
http://www.bastillepost.com/hongkong/article/3062692-中國境內曾經有個滿洲國
http://www.bastillepost.com/hongkong/article/3059250-不想操練-改革通識考試
http://www.bastillepost.com/hongkong/article/3054801-兩韓和談，香港可以學到甚麼？