龍頭科技股有壓力
2018/04/23 08:41:32 網誌分類: 經濟
特朗普變股市亂源
中港股市上周積弱，美股相對硬淨，但去到周五係不同消息傳出下，都有點支持不住之感。美股最後一個交易日回調，主要係美債遭拋售，10年長債息率及2年債息均揚升，似重複2月美債息升破2.9厘的市況，加上美國民主黨全國委員會在紐約曼克頓入稟聯邦法院，控告俄羅斯政府、特朗普競選團隊和維基解密（WikiLeaks）干預前年美國總統大選，搞到杜指連跌兩日。杜瓊斯指數收報24,462點，單日跌201；納斯達克指數收報7,146點，跌91點；標準普爾500指數收報2,670點，跌22點。
特朗普近日成為股市亂源，搞完科技股，佢突然又批評石油輸出國組織抬高油價，是不可接受行為，油價就暫時無明顯反應。5月原油期貨下跌0.01美元或0.01%，報68.28美元；布蘭特6月期貨跌0.11美元或0.15%，報73.67美元。油股呢排累升唔少，加上北韓突然成為鴿派，可能令呢個板塊要唞一唞氣。
市場?家最重要焦點，仲係美國對華動手打壓，特朗普由口水戰到針對傳統金屬商品，到呢一輪指向科技公司，開始有啲愈嚟愈入肉的感覺。美國出招封殺中興通訊，在科技股市場相當震撼，擔心壞消息陸續有來。中興通訊董事長殷一民回應制裁時形容，美國制裁行動對全體員工、客戶、消費者和股東利益均造成直接損害，可能導致公司進入休克狀態。不過，佢亦話制裁不意味着公司沒有核心能力，公司各個主要產品核心零部件大量使用自己研發設計的專用晶片，但是仍有大筆通用器件不可避免要外購。他形容求人不如求已，未來將加大研發投入。
睇睇打擊目標搵銀話咁易
睇中興通訊係「休克」前，市場本來炒緊公司係5G市場的概念，年頭股價升至近年高位33.2元，本月初美國公佈對一千三百種中國商品加徵關稅，涉及航空航天、機械、醫藥、通訊、電器等科技領域，並點名要遏制《中國製造2025》計劃，市場醒目資金可能聞到味，股價開始下滑。在制裁消息曝光停牌前，佢造緊25.6元，市盈率約20倍，估值唔算貴，所以掉頭沽貨的基金，相信唔係因為佢到價，而係睇到佢勢色唔對，而家唔知佢幾時復牌，若然短期內佢復牌的話，股價恐怕難逃一插。
內地科技公司暫時主要都係中國市場為主，能夠打出國際只有中興、華為，以及騰訊（700）、阿里巴巴幾間公司，其他新產業領域仲有比亞迪（1211）。比亞迪有美國股神做主要股東，騰訊大股東係南非Naspers，阿里巴巴係美國掛牌，股東有唔少外國基金，佢哋暫時都仲未受到重擊，聯想無乜外資大股東，被議員點名後周五即時插低3.6%，收報3.79元。有中環茶友笑言，美國議員開口中，若然知道佢哋講乜，預先沽空定股票，咁執錢真係易過乜。政治市下，有消息的大戶特別着數，小股就要自求多福，醒目走位。
蘋果大插板塊掀震盪
要留意係上周五跌市中，龍頭科技股繼續唔靚仔，蘋果晶片代工商台積電早前發表有關銷售展望的負面評論，外界擔憂iPhone產品出現滯銷，蘋果隨之大跌4%。；facebook跌1.08%；亞馬遜跌1.89%。台積電」下調全年收入預測的消息，在香港時段已先觸發手機股被拋售，瑞聲科技（2018）單日急跌咗7.3%收報121.3元，成表現最差藍籌股；舜宇光學（2382）收跌5.6%報142.5元；比亞迪電子（285）大跌7.7%收報12.02元；丘鈦科技（1478）收跌5%報9.91元；信利國際（732）下滑5.8%報收1.95元。手機設備股跌得勁，除咗因為有負面消息，同時亦因為佢哋股價高、估值貴。陸羽仁買股一向唔太鍾意高估值股份，皆因利好因素大部份都在股價反映咗，一旦唔對板，咁跌幅可能加倍奉還。而家係政治市兼波動市，呢啲情況要做定兩手準備，預咗買股有機會要揸一段時間兼捱價，喺咁情況，累積升幅大同派息低的股價，抗震力點都差啲。
最後一提係內地早前提出利率市場化的方針。內銀隨之係本月起對大額存款有舉動，其中建設銀行4月14日起，率先推出利率水平較基準利率上浮45%的大額存款，認購起點金額為30萬元，期限為一個月至一年；4月16日，農業銀行、中國銀行也推出利率水平較基準利率上浮45%的大額存款，起購金額為30萬元。對於存款利率上限開放，雖然市場人士擔心，可能會導致息差收窄，業內人士就認為，短期內可能會有一些負面影響，但幅度是控制範圍之內，整體前景樂觀，存款利率上限放開，將有利於中小銀行降低負債端對同業負債的依賴度，負債端總體成本上行幅度小於存款成本上行幅度。內銀股呢排走勢受政策影響反覆，中短期較適宜走波幅。
火併未停香港寬頻老總續串嘴
香港寬頻（1310）一個存有已停用客戶資料庫的伺服器遭入侵，涉及截至2012年約38萬條固定及IDD服務客戶及服務申請人的個人資料，呢單嘢仲有好多地方仲未搞清楚，後果可大可小，管理層認真要小心。
如果唔係爆咗黑客入侵呢單嘢，香港寬頻行政總裁楊主光應該幾HAPPY，因為公司公佈截至今年2月底止六個月，股東應佔溢利2.41億元，按年上升4.23倍，每股盈利24.1仙。佢仲預測未來會進入收成期，料之後兩年收成更豐。
2016年及2017年度公司每股派息為0.4元及0.45元，期望2018至2020年每股累計經調整可供分派現金介乎2.1至2.4元。
楊主光仲秉承咗前老闆黃維基串嘴本色，明言繼續搶客戰。其實，今年幾間網絡公司大打價格戰，戰火一直未有停止跡象，有行家直言始作俑者就係香港寬頻。
業內巨頭談起近月火併，大家揚言無偈傾。有高層話成場仗源自香港寬頻加入爭客，同行不甘客戶流失，於是展開對打。而家網絡商都有大財團支持，大家實力雄厚，有能力長期作戰，以保住甚至擴大市場，結果就變成巨人間的持久戰，所以想買本地電訊股，應該唔使心急。
陸羽仁
http://www.bastillepost.com/hongkong/article/3046508-開放性諮詢一大敗筆
http://www.bastillepost.com/hongkong/article/3044549-劣質文化向下睇齊/
http://www.bastillepost.com/hongkong/article/3041373-巴黎和會-國際分贓大會
http://www.bastillepost.com/hongkong/article/3038524-難忘的《我的1919》
http://www.bastillepost.com/hongkong/article/3034871-東芝事件是最好的先例