本地銀行炒定加息
2018/04/16 11:55:59 網誌分類: 經濟
上周五港股受美股向好帶動，但下午轉升為跌，一個原因是港匯受壓，周四起金管局接連入市維持港匯穩定，市場可能擔心港息上升，對股市有壓力，加上A股偏軟，所以就算外圍向好，港股都無力向上。
美國金融股業績理想，其中摩通首季盈利大升35%，至87億美元歷史新高；富國銀行第一季盈利升6%，花旗銀行第一季盈利升13%。杜指一度高開近百點，並一度急升163點，但投資者趁機獲利，杜指隨即倒跌低收。金融股普遍下跌，摩通跌2.71%，成杜指跌幅最大成份股，因市場認為投行收入減7%，顯示未來表現疲弱。杜瓊斯指數上周五收報24360點，跌122點；納斯達克指數收報7106點，跌33點；標準普爾500指數收報2656點，跌7點。本周累計杜指升1.8%，標指升2%，納指升2.8%。
不過，大市回軟之餘，上周五銀行股表現向好，滙控（005）單日升1.2%，收報76.3元，貢獻恒指36點；恒生銀行（011）升0.5%，收報189.8元；中銀香港（2388） 升1.5%，收報37.65元，為當日表現最好藍籌股。
金管局猛出口術
銀行股上升，有點炒香港加息味道，因為三間本地銀行都擁有好多存款，不少係自有資金，利率偏低，佢哋放畀客戶資金回報不多，若然港息上揚，這些無成本的股東資金就會好賺咗，所以港元受壓，銀行股卻無受壓。
銀行股造好，沖淡咗息口向上對股市心理影響。今次金管局入市，係聯匯加大咗資金池後十三年來首度出擊。金管局總裁陳德霖早喺未入市前，已經跳出來預告會出手。佢咁做好明顯係唔想市場以至公眾大驚小怪，因為好耐無見過金管局沽美元買港元而有過敏反應，所以預算出嚟打定開口牌。
陳德霖預告會入市買港元之餘，仲講明若然資金流走，港息就會向上調，幫市場打定底。金管局頻頻解畫，加上金管局周五深夜及周六凌晨兩度再接港元沽盤，共涉資64.06億元。金管局周六清晨再度入市承接33.68億港元沽盤，周五深夜接30.38億港元沽盤。這是金管局三天以來第四度接盤，累計承接96.64億港元。本港銀行體系結餘下周二將減少至1701.14億港元。咁係咪代表港息就快加呢？陸羽仁同銀行家傾起，大家睇法有啲唔同，主要係大家對資金流出速度有唔同估計。
六月上調機會較大
有銀行家話，O依家香港仲有成過千億資金留咗喺度，以兩日金管局買幾十億元計，應該唔會咁快加到息。保險啲計，若然六月份美國加息，可能港息等到那個時候前後，都需要跟加。
港息睇嚟唔會喺三幾日間加息，喺加息之前，資金會陸續流走發出訊號，照計市場會慢慢產生預期和消化，所以利率喺低迷多年後終於回升，會唔會觸發震盪，就好睇市場當時情緒。如果大家估計美息會升完又升，以O依家樓價咁貴，對股市必然會造成重擊。如果大家估計利率最多升一、兩厘就停，咁反應又會唔同。唔好忘記係美國之前紥定馬等加息，結果首度加息後，股市不跌反升。
港元受壓，股民反應小心，相比下樓市就亢奮好多，基本上無乜點理呢個消息。無論住宅、寫字樓同居屋，價錢都破晒頂。最新一期居屋出售，結果有16萬人入飛，相比有5000個單位出售，超額36倍。
居屋超額倍數同股票好唔同。股票可以借孖展打飛，盈利下跌的新股都可以谷到幾千倍認購。申請居屋係實名制，入得表都係有需求。中環茶友話，36倍超額代表居屋不增建的話，要排36年先肯定買到單位，如果計入期間新產生的需求，相信50年都未必輪到，屆時連50年回歸不變保證都過咗，所以呢個認購反應，隨時觸發更多人走去買二手居屋或私樓市場，如果唔係早排有消息話財爺研究空置率，呢個星期又話可能加息，地產股應該已經借勢炒上咗。
居屋熱爆 發展商等開餐
政府無地，搞到房屋供應十個茶壺九個蓋。茶友話，現屆政府搞咗個覓地小組去搵地，搞咗咁耐都仲未出嚟諮詢，到O依家為止亦無乜好橋可以覓地，全部都係舊招，講來講去又係話收高球場塊地起樓。呢個建議O依家俾人話佢整色整水攞分，多過真係解決到問題。
拆高爾夫球場同填海，呢啲都唔係短期可以起樓的方案，茶友估計，O依家真正可以用的土地，大部份都喺大發展商手上，如果要增加供應，唯有同佢哋講數，所以幾間大地產商，基本上都係擦定牙等食胡。
毛記佛系玄味濃
騰訊（700）南非大股東出貨，吸走市場本來炒作騰訊的成千億元資金，就算股王都難免走勢飄忽。呢個時候曾被追捧者吹為女巴菲特的基金經理劉央透露，自己重倉持有騰訊，但消息一出，反被股民譏諷佢近年戰績平平，唔知會否「燈」死騰訊。
巨型科網股乏力，都算係科網類別的超購王毛記葵涌（1716）上周跌至2.36元新低收市。毛記上市時腦細唔避席唔講嘢，之後大講佛系，不發表上市感言、不敲鑼、不接受訪問，緣份到了，自然有專家Dickson代為發言，引來股評家林一鳴回應，佢話，毛記買家不看上市文件，不理業績，不做分析。無緣份抽唔到，就隨緣在上市首日追入，買了自然會升，升完自然會跌，跌完自然再跌，結果真係不幸言中。
有人就擔心，毛記日後不派息、不送股，接咗者有緣自然要坐，坐得耐就自然習慣當無咗。
陸羽仁
回應 (0)
我要發表