小米上市有三座大山
2018/05/07 11:02:19 網誌分類: 經濟
上周市場普遍缺乏利好消息，最後一個交易日恒指曾大跌454點，失守3萬關，收報29926，單日跌386點，成交只有989.5億元。全周僅四個交易日，恒指累積下跌354點；國指累積下滑175點。
港股弱弱地，反而美股就唔係好肯跌，最後一個交易日仲玩反彈。美股三大指數周五急升。杜指收市報24262點，升332點。納斯達克指數收市報7209點，升121點。標普500指數收市報2663點，升咗33點。
好醫生掛牌熱度不斷跌，今個星期係會失守招股價，抑或完成收集後炒上，對個市氣氛固然有影響，更值得關心者，係對有可能係首隻同股不同權股份小米的上市計劃會唔會帶嚟衝擊。好醫生掛牌前，平保一度借生仔分拆炒番上90元樓上，隨著招股進行，佢愈派愈低，累積跌咗差唔多兩成，幅度相當驚人。
睇番平保跌得咁勁，同科網股板塊相似之餘仲要加多兩錢肉緊。科網股王騰訊（700）上周收報382.8元，同高位476.6元比跌咗19%，幅度都相當誇張，平保高位98.85元，足足跌咗24元，幅度接近25%，高位接貨都幾傷，可以見到當炒股升得高、跌得急，好多人話買優質股有買貴、無買錯，但咁都已經好傷，若然係買衍生工具，就更加係無仇報。
騰訊、平保呢啲當炒內資股下插之際，市場就熱議緊好可能下個月上市的大型科技股小米招股。小米而家話緊估值有成千億美元，特別係佢係第一隻同股不同權的股份。過去，舉凡有呢啲大股上市，大市必先要炒熱，否則就會有難度。
中美貿戰四圍燒
未講個市會否炒上迎接大股抽水，單講小米上市，有中環茶友數數手指，已經數到至少有三座大山要跨過。第一座大山，係中美貿易戰。美國總統特朗普同大陸開波，開頭大家估佢玩吓嘢，跟住就會攞着數散場，但而家場大龍鳳愈玩愈認真，燒到去幾家科技公司。中美經貿首度談判落幕，雙方未正式對外公佈具體磋商結果。新華社發表評論指，雙方未來可能選擇更多對話和商量的方式接觸。西方媒體一傳美國開出高要求，大陸會後就表明不會用核心利益交換。北京策略暫時可以用鬥而不破嚟形容。若然美國貿易戰膠着，加上美國科網股近日陷入悶局，大型股份上市集資就唔係咁易。
資金貴影響科網估值
第二座大山，係市場對於科網新股興趣下降，而且有啲承接乏力，呢樣嘢唔係指散戶，而係指機構投資者。好似小米呢啲咁大間的公司，不可能單靠小戶支撐。要留意係大戶對於科網股胃納有下降跡象。有基金經理解釋，呢樣同資金成本好有關係。喺一年前，美息仲係似有若無，而家美息向上，10年期美國債券都有3厘息。美債視為最穩健投資，而家都有3厘回報，咁點解仲要冒險呢，如果美國利率趨勢繼續向上，市場對風險性投資減少，對股票估值就會下降，高估值的概念股影響最大。
呢個星期，科技半新股好似易鑫（2858）、雷蛇（337）、閱文（772）、眾安在線（6060）輪流尋底，被視為不良現象。好醫生公開發售公開認購吹到咁大，但首掛收市已經無肉食，令人擔心係因為無乜機構投資者入貨。若然好醫生破底，對市場心理會有衝擊。
最後一座大山，就係同股不同權呢樣嘢。小米身為同股不同權首隻試水股份，聽落有新鮮感，諗真呢樣嘢對大股東有好處，對小股東無乜好處。假設兩隻股份其他方面完全一樣，基金經理會揀同股同權，抑或同股不同權的呢？答案好直接，就係同股同權的公司。港交所（388）容許同股不同權公司上市，唔係覺得同股不同權有乜特別好處，而係出於交易所之間的競爭所作的妥協，所以基金經理對香港上市的同股不同權公司有幾接受仍待驗證。呢樣嘢令人想起過去港交所做的實驗，當中有成功有失敗，好似引入H股就好成功，但引入俄國公司就唔得。當年港交所想搵多啲國際公司嚟掛牌，動用埋內地幫手搵到俄鋁嚟香港掛牌，前律政司司長梁愛詩做埋董事，可惜掛牌後市場唔係咁接受，最近仲被美國政府玩殘埋。
同股不同權唔係賣點
單從小股東立場，同股不同權唔係一個賣點，呢類公司上市會打啲折扣，關鍵在於公司有無其他長處去吸引投資者，就算佢股權結構唔係咁靚仔都捧場。小米似乎都明白呢點，所以佢未上市，就同地頭龍長和搞活動旺一旺場，呢個可以話係熱熱鬧鬧的開始，跟住仲要睇佢點包裝同埋點樣定價。
兩、三年前，當小米橫掃手機市場，睇番當時可能係佢最佳上市時機。期間大家都憧憬過佢會益吓同系上市公司金山軟件（3888），最終呢樣嘢無發生，而家小米上市，股民初步亦對金山無乜特別期望。不過，若然小米真係得，金山點都會攀到車邊，用呢個角度睇，金山會唔會炒作吓，可能都係小米熱度的另類指標喎。
彤叔乖孫做咗鯊膽剛
新世界集團近日人氣甚勁，集團重建的尖沙咀中心第一期入伙大搞軟銷，同一時間，又宣佈贏咗機場航天城項目，投資額去到成二百億元。
新世界中心前身係太古船塢，當年創辦人鄭裕彤投得這塊靚地，落重本建成旗艦物業，成為鄭家代表作。中環茶友有幸去過重建項目VD的圍內展覽，都有將彤叔當年投地的舊照擺喺度。茶友參觀完之後，都話項目整出嚟用料同設計都靚，甚有懷舊古典味。
彤叔買嘢最愛人棄我取，好似係上世紀八十年代前途談判時投到會展中心，結果賺到笑，亦因此贏得鯊膽彤的稱號。
o依家新世界重建尖沙咀旗艦地皮，建築費雖然可觀，但因為老年資產，計落肯定無得輸。比較下，由鄭家純同鄭志剛等二、三代拍板投航天城，就真係要考少少膽汁，皆因聽研究過呢個項目的猛人講，成個航天城加埋大過尖沙咀海港城加埋VD，將來樓面陸續落成，供應會相當龐大。
由於地點離市區咁遠，咁多樓面主要係做機場客生意，呢個係未經測試的水域，唔係個個夠膽落水，鄭志剛能夠出到撼贏其他財團的條件爭飲頭啖湯，其鯊膽程度係咪有爺爺之風呢？
陸羽仁
回應 (0)
我要發表