悶市啱悶股
2018/05/14 04:12:53 網誌分類: 經濟
外圍市場近日主調仲係圍繞加息前景。美國勞工部公佈，四月份進口物價指數按月上升0.3%，升幅低過市場預期的0.5%，按年上升3.3%。扣除汽油的進口物價指數按月上升0.1%。出口物價指數按月上升0.6%，升幅高過市場預期的0.3%，按年上升3.8%。
美國密歇根大學公佈，五月消費者信心指數初值98.8，高過市場預期的98.3，與四月終值相同，接近2000年以來均值最高。不過，消費者現況指數連續兩個月下滑，由四月的114.9跌至113.3，消費者預期指數由88.4升至89.5。消費者一年通脹預期初值2.8%，五年通脹預期初值2.5%。最近數據對令加息憂慮降溫，美股七連升，上周五杜指收升91點，是自去年11月初以來最長的升浪；一周累升2.3%。杜指成份股中，電訊商Verizon獲大行上調目標價，表現最標青，收市升3%。
港股跟住外圍五連升
喺外圍帶動下，港股都連升五日，創逾一個半月收市高位。收市報31122點，國企指數收市報12345點。一周計，恒指扭轉之前連跌三個星期，全周累升1195點，升幅接近4%，國指一周累升3.8%。
上星期大股升得好啲，其中一隻係九龍倉置業（1997），公司自去年八月以介紹形式上市後，股價持續偏軟，最低去過45.6元，較首日開市的54.5元，已回落超過12%。過去一個月，乘着零售數字理想，海港城生意創歷來新高好消息，股價升破掛牌首日價格之後，形成上升趨勢。
九龍倉置業分拆時，科網股仍是市場寵兒，基本上磚頭股唔係咁吃香，加上公司分拆後無乜動作，消息欠奉，公眾亦唔知佢應該值幾多錢。雖然管理層直接間接顯示公司超值，但市場反應唔係太相信，結果悶到股價下跌，個市愈旺，股民愈唔想買佢。股東收到股份都有點無癮，估計有部份股東收股後想套現部份，於是沽出股份，形成拋售壓力。現時股份借零售回升帶動造好，反映咗沽家減少，貨源開始由長線投資者持有。
同零售業人士傾起，今年市道回升，包括高檔奢侈品生意都回勇，但銅鑼灣生意明顯比中環同尖沙咀。按此估計，相信九龍倉置業旗下業務都以海港城最標青，時代廣場未必可以睇齊。銅鑼灣零售生意俾人落後感覺，部份估計係高檔商場多。除咗時代廣場外，希慎旗下都有幾個大場，未來仲會有新項目落成，有競爭自然無獨食，做收租佬自然無咁和味。
九龍倉晶苑浮水向上游
如果以銅鑼灣例子，咁海港城未來就可能會多咗一個對手，就係重建緊的尖沙咀中心。呢個項目O依家改咗個名叫VD，分期完成後有成三百幾萬呎樓面，計起嚟仲未夠海港城、海運大廈咁大，但都有番咁上下。
過去尖沙咀中心都係潮流熱點，後來唔知點解做做吓無乜動力，俾海港城後來居上。O依家重建項目外形設計唔錯，加上催谷緊宣傳，若然佢做得好，就算唔可以挑戰廣東道地位，但都可能分薄咗客源，結束九龍倉喺尖沙咀獨食局面。當然呢個係長遠憂慮，VD仲要分期落成，然後個場慢慢成熟，講緊都係三至五年後的事，對九龍倉中短期應該無乜明顯影響。
同樣係舊經濟半新股發威的，係羅樂風夫婦創辦的成衣供應商晶苑國際（2232），公司喺去年10月上市，當時市況雖然唔錯，新股認購普遍幾好，但公司超額認購9.38倍。由於認購反應一般，發售價定為7.5元，屬每股招股價7.3元至8.8元中間偏下。
雖然晶苑屬於龍頭公司，2016年在全球服裝製造行業，按產量計排名第一，按產值計排名第二，但當時市場聚焦公司每件成衣淨利潤低微。按照該集團說明，公司向大部份客戶收取價格範圍為：休閒服產品2.4美元至7.2美元、牛仔服產品5美元至13美元、貼身內衣產品1.1美元至7.5美元、毛衣5.5美元至15美元，以及運動服及戶外服5.6美元至15美元，折合人民幣範圍在6.6元至100元之間。有人計過數，以集團2016年賺1.24億美元，生產3.5億件成衣計算，每件成衣淨利潤不過35.4美仙，即係唔到3港元。
雖然晶苑靠密密做賺辛苦錢，但公司2017年純利有1.49億美元，按年增長兩成，每股盈利6.2美仙，較2016年5.36美仙升15.7%，雖然數字唔驚人，但亦都唔失禮。股價自從今年初股市第一季大爆升完回歸平靜，欣賞佢的投資者似乎反而多咗，浮上水面後反覆攀升到上周9.61元，表現比起好多超購王還要好。
雖然成衣股係舊經濟公司，同樣可列入悶股類別。睇返好多龍頭成衣股都有基金欣賞，皆因做到有足夠規模後，佢哋競爭反而減少，而且勝在派息穩定，部份傳統基金會持有收息。晶苑會唔會係咁呢，不妨走著瞧。
中銀航空唔排除有動作
仲有一隻悶股係上市同樣反應一般的中銀航空租賃（2588），公司上市時間比九龍倉和晶苑還早。公司2016年就上市，加上股東背景雄厚，招股時基礎投資者有中投、絲路基金、復星及波音等。中行分拆中銀航空，可說是成功捕捉市場發展趨勢，因為亞太區內航空市場正在擴展，對飛機租賃需求持續攀升。而且公司是世界上十大飛機租賃公司之一，上市時連同未完成定單計算，合共擁有511架飛機，若扣除未完成定單，則擁有270架飛機。
單計在亞太區，該公司更是區內最大飛機租賃公司，在機隊數目上，遠遠拋離早於2014年在港掛牌的中國飛機租賃（1848）。雖然如此，招股反應都係一般，公司招股價42元，只在掛牌首天勉強浮水，其餘日子長潛，最低價36.6元。佢直至近大半年才上水，並且逐步向好，集團公佈2017年盈利5.87億美元，按年增40.32%；每股盈利0.85元，末期息派19.2仙，上周收報48.7元，息口有4.75厘。有市場人士話，O依家佢由大股東持有近70%股份，唔排除會想辦法增加市場流通量，如果要咁做，股價就先要反映公司價值。呢啲悶股喺旺市時股民嫌佢哋唔夠性感，但係悶市佢哋有錢賺有息收，雖然唔適合高追短炒，但都吸引到一啲收息長揸的基金或投資者。
利福國際股價或受惠大熱賣
最後講兩句利福國際（2136），集團屬下的大型銷售活動昨日舉行，喺銅鑼灣見到唔少人湧去。早前主席劉鑾鴻講過，本港零售市道最差時期已過，零售銷售自去年下半年起反彈。以目前數據而言，市場毋須太擔心今年上半年情況。佢仲話，集團期內表現要視乎在呢個月舉辦的「感謝節」成績。照昨日場面睇應該對辦，如果今日大市無乜負面嘢，利福系或者有得益噃。
五月天迪士尼騷有天幫
台灣五月天來港演出，場地選擇迪士尼樂園，中環茶友有撲去睇上周五演出。表演前幾日個天係咁落雨，天文台雖然話上周五會轉晴，茶友都仲好擔心，結果天氣真係好轉。
今年初外間瘋傳迪士尼同五月天呢次合作，由於迪士尼和五月天都各自都有很高要求，而且又是新嘗試，好多天迷都唔知真唔真。O依家構思變成現實，而且相當成功。
聽講今次與五月天合作，標誌迪士尼香港在經營主題公園外的另一個發展方向，租場畀企業舉辦各種聚會場合。現時香港樂園有三間酒店落成，自然要諗多啲方法搵生意。
在五月天舉行露天演唱會前，好似黃子華的棟篤笑等鬧出黃牛風波，好事者又出來起哄，要求打擊黃牛，最搞鬼話要學內地推行實名制。不過呢排又唔再多聽到呢個講法。茶友話，實名制要求所有人購票時，都要用自己姓名登記，入場時又要核對。個別三、四線藝人演出，賣飛很多時須靠圍內推廣，莫說採用實名制，若然政府場地規定八成門票須公開售賣，演出都會受影響，唔通真係個個藝人都係五月天咩。
推行實名制等同公開私隱，內地對呢樣嘢或者有唔同睇法，但喺香港則是敏感政治題目，恐怕很多人就有疑慮，講到收緊監控，起哄者就即刻收聲。
陸羽仁
回應 (0)
我要發表