微軟再發育
2018/05/21 04:13:54 網誌分類: 經濟
中美談判消息滿天飛，美股個別發展，杜瓊斯指數收報24715點，升1點；納斯達克指數收報7354點，跌28點；標準普爾500指數收報2712點，跌7點。同時資金有轉追個別中細價股之勢，羅素2000指數再創新高，收報1626.62點，升1.34點。外圍市場焦點係息升金跌，同埋油價上衝高位。
油服股發力炒落後
10年期美債孳息率上周曾突破3.1%關口，之後部份資金流入債券避險，債息輕微回落，收報3.06%，跌0.24%。息口向上不利金價，金價本周失守每盎司1300美元關口，一度下試1285美元，上周現貨金收報1292.85美元。
油價連升多日，布蘭特7月期貨衝破80美元大關後回落，報78.51美元。中資「三桶油」上周接連創出新高，美資行大摩上調「三桶油」目標價，其中中石油列為首選，中石油（857）收市報6.51元。大摩對中石油最新目標價為7.97元，對中海油為16.2元，對中石化為9.82元。
油股當炒，本來油服股炒味應該更濃，但第二期油服股有啲落後感覺，主要係市場相信油價「唧高」有啲人為味道，不代表長遠真係睇好，所以油公司鑽探開採投資未必會大增。隨著油股升幅唔少，資金上周末開始炒落後，油服股終於跟隨油價急升，重復過去炒味濃的本色。TSC集團（206）收市報0.8元，單日大升18%，安東油田（3337）收1.39元，升14%，宏華（196）收報0.93元，升8%，中海油田服務（2883）收報8.65元，升5%。如果油價再上80美元水平，油服股大有可能追落後。
大陸可能增購美國石油
影響油價因素，除咗話造好個價幫全球最大油公司沙地阿美上市，另一個因素係中美貿易談判。中國副總理劉鶴去到美國開會，好快就傳出話中國答應減少貿赤2000億美元一年的消息。消息傳出後外界都半信半疑，《《人民日報》》旗下微信公眾號好快就發文澄清，有關中國提建議削美國2000億美元貿易逆差的傳聞，是子虛烏有，純屬誤讀。官媒傳欄「俠客島」仲引述知情人士話，對中國代表團來說，這是重任在肩，必須捍衞中方的正當權益和核心利益，以及多邊自貿體系和全球自由貿易。
劉鶴一到埗，就傳出中國同意削滅2000億美元貿赤的傳聞，之後中美雙方發表聲明，有共識中國會增加購買美國貨品，減少兩國貿易逆差，證明全文並非全無根據，甚有空穴來風的味道。
美媒之前有說法美國佬開價係短期先削1000億美元，長遠要減夠2000億美元，o依家會後話雙方有共識，詳情應該仲要傾。有猛人計數，要中國削減1000、2000億美元貿赤，一係叫美國人唔好買中國貨，否則就係要中國向美國進口，關鍵係美國有乜係中國需要的呢？一般消費品中國自己已大量生產，買農產品數目有限，而且要有自給自足能力，是國防上的需要。
如果要大手購買美國產品，石油同黃金係當中可行選擇之一。大陸一向進口石油，幫美國買多啲、幫中東買少啲，完全有數可計，甚至中國減產一啲，增加入口，令中國儲備消耗慢啲都仲得。若然中國短期幫美國買多啲油，咁美國佬可能就可以接受油價高啲。油股係低位其實已經升咗唔少，如果手頭有貨，就算想食啲胡，都唔使咁急賣清，上移止蝕位坐住升浪都係一個唔錯的辦法。
老股王股價衝上「雲」霄
油股呢啲傳統公司造好，龍頭科技股呢排普遍都係上落。可以一提係科技股中屬於老餅，有啲傳統的微軟，近況頗為靚仔，上周五仲成為科技股中少數有得升的股價。大摩仲推薦佢買得過。報告發表時，微軟股價約96.18美元，市值為7390億美元，是目前全球市值第4大公司，僅次於蘋果、亞馬遜和谷歌母公司Alphabet。大摩睇好佢股價可以再升，成為萬億元企業。以佢目前市值，距離1萬億美元還差約2600億美元，而想達到1萬美元的市值，該公司股價至少還要上漲三分之一。
二、三十年前，微軟係股王級高增長公司，公司以壟斷枱頭電腦軟件，成為印銀紙機器。隨著智能手機興起，枱頭電腦重要性下降，微軟失去魅力，但仍然係一間好賺錢公司。而家大摩咁睇好佢，唔係因為傳統的軟件生意，而係看好佢近年大力投資的雲計算業務，該行認為有新盈利引擎推動，微軟股價再上升三分之一不但有可能，而且能夠在未來一年實現。微軟股價在未來12個月內將上漲至130美元左右，推動其市值達到大約1萬億美元。
科技公司多年前開始發掘雲計算市場。雲計算簡單來說就是通過網絡交付服務器、存儲空間、數據庫、網絡、軟件和分析等計算服務。提供這些計算服務的公司稱為雲提供商，他們通常基於用戶使用對雲計算服務進行收費，類似於家用水電的計費方式。微軟係開發呢個業務時可以話係重施故技，以開放式平台 Azure同包括亞馬遜等強勁對手競爭。炒佢呢個概念，大摩唔係第一個。過去一年，微軟借住公佈呢項業務的增長已節節上升。由於雲業務表現強勁，市場開始認為呢個昔日的巨人正踏入第二度發育， Azure 平台和伺服器服務帶動微軟股價攀上歷史新高。最令市場讚好係係呢個範疇其增長速度大大超越競爭對手亞馬遜。
微軟的 Azure 和亞馬遜的 AWS 係市場兩大力量，亞馬遜雖然領先，微軟增長速度更快，呢個平台賣點係可以吸引更多中立客戶群，由於鍊贏市場評價咁高的對手，令佢股價變得性感。
中港科技股隨時跟炒
雲計算業務係呢個時候受到大行垂青，陸羽仁覺得反映了大氣候有啲轉變。過去資金成本平，大家唔介意燒銀紙搶市場，而家息口漸高，市場開始留意番啲有回報的生意，雲計算踏入收成期，加上收入穩定，有乜事都可以死捱，所以令到微軟呢件老餅都令大戶食慾大振。
美國科技公司爭奪雲計算大餅，內地科技產業發展基本上係照住美國軌跡行，龍頭阿里巴巴早就將雲業務列為未來收入增長重點。香港買得到的公司，可以將雲業務列為賣點的就有雷軍屬下的金山軟件（3888），公司的金山雲同樣踏入高增長期，如果微軟真係見萬億美元市值，咁大陸同類型公司都可以照住有得炒。
大馬兩老 變天孖寶
政經界今個星期熱話唔係中美貿易談判，亦唔係美朝籌備緊的峰會，而係大馬的政治海嘯，前總理馬哈迪以92歲之齡再度上台執政，比佢更勁的是他的資政郭鶴年，年齡已達94歲 ！中國人成日話家有一老，如有一寶，如今大馬國有兩老，變咗孖寶。
大馬政壇孖寶創出傳奇，兩人加埋已經接近兩百歲，但係政治同經濟圈影響力完全無消退。郭鶴年早前出版自傳，不少中環茶友都有捧讀，對其自揭陰暗一面都十分佩服。簡言之，有糖王之稱的郭鶴年做生意以目標為本，有人會認為用不擇手段來形容都不為過。
糖王在大馬發跡，陸羽仁去年到檳城食榴槤，仲順道參觀過佢曾經辦公的地方，現址今日已改為華人社團的展館。糖王其後離開大馬，主要在香港居住，相信同當地有排華威脅同政局不穩有關。
糖王有個哥哥，當年參加馬共，結果被處死，他對這個哥哥非常佩服，覺得是天縱英武，成為佢人生追求和仿效的目標。呢次佢以94歲之齡，支持馬哈迪東山再起，出謀獻策，證明佢唔甘心只係做一個富可敵國的商人，商而優則仕，成績相信都無幾多人可以超過佢。
陸羽仁
回應 (0)
我要發表