地源歸邊
2018/05/28 04:13:01 網誌分類: 經濟
發展商分無地有地兩大類
覓地小組開鑼搞街頭問卷調查，成為茶友熱議題材，當中大家最感興趣係係覓地小組開騷前，做過財爺而家轉行幫地產商打工的梁錦松走出嚟講嘢，自認係地產商，但就係無地的地產商。
阿松話，而家好多人都話地產商都是為了自己利益，他都是地產商，不過是沒有地的地產商，仲直言香港只得五個地產商有地。他直言地產商都知道，任由缺乏土地的情況繼續下去，年輕人沒有希望，社會不穩定，連地產商自己都無生意做。
阿松做過銀行，又做過官，o依家做地產公司CEO，但似乎佢始終對做官興趣最大，出嚟講嘢都係從政策角度多過做生意角度，但他說出了一個事實，就係o依家連地產商都出現「貧富不均」，土地資源集中係幾個大地產商之上，其他地產商手頭基本上都係無乜地。覓地小組而家的所有建議，基本上全部都唔能夠改變呢個情況，再傾落去都唔會改變到呢個現實，令土地供應再拖慢啲。
覓地小組o依家列出十幾個建議，又中短期、又長期，但真正能大量提供土地的方案只有兩個，一個係填海;一個係同發展商合作，其他棕地發展都有好多問題，收回康樂用地更加係有啲講笑成份。本來，覓地小組之前好似力推公私營合作，但唔知係咪被人鬧得兩鬧，小組主席黃遠輝係搭街站前又出來降溫，話而家睇到好多人反對公私營合作。有茶友睇完真係唔識笑，話開頭睇覓地小組擺開架式，以為政府會排除萬難同發展商大力合作，點知咁快又潑冷水。若然結論長遠係要填海造地，呢樣嘢一早都知，使乜浪費年幾去做諮詢？香港覓地要等填海，唔怪得阿松女自嘲做咗無地的地產商。
覓地無方樓價等炒爆
茶友話，覓地小組係度打口水戰，同一時間就見到發展商係度搶地，除了官地天價成交，大地產商仲係咁收購舊樓，由咁睇起上來，佢哋亦唔旨在同政府合作。將來就算政府話要共同發展，發展商都實會吊高嚟賣。人同此心，其他好似新界佬、棕地業主，個個睇完覓地小組建議，都會睇完政府嚟食，咁樣攤開哂嚟覓地，係咪等於送羊入虎口。
覓地唔知點收科，同一時間土地資源日益集中的現象就更加明顯。阿松話而家只有五個發展商有地，但有個係其他行家眼中算係有地的發展商就同陸羽仁講，過去幾年佢哋賣咗唔少樓，但補充土地儲備都唔係咁多，o依家手頭根本無負債，要周圍要搵地補充番。本來佢哋以為政府大大聲話增加推地、地價會跌番一啲，結果係高價無買，市場出現更高價，手頭土地儲備都跌咗。聽佢咁講，將來呢間公司係樓市的市場份額都會降低，訂價權會變成更加集中。按照呢個發展，除非將來利息大幅飊升，或者經濟出現顯著滑坡，坐擁主要土地供應的發展被人逼倉，否則樓市就會係由極少數龍頭公司主導。茶友話，咁搞法樓價想軟着陸都難，擔心只有炒到爆為止。樓市長遠令人擔心，至於樓價幾時炒爆無人知，係爆煲之前如果想買地產股，自然就要優先選擇阿松所講有地的幾間公司。
說得得個講字的口水戰，除咗覓地小組的大辯論外，美國總統特朗普同北韓領導人金正恩的世紀會談，又變成另一個笑話。由於「特金會」告吹，令港美股市借勢回軟。雖然特朗普係中美貿易戰立場稍鬆，都無為市場帶來乜嘢驚喜，皆因大家都講得口水總裁說話好難作準，最後港股係上星期4個交易日，合計累積跌幅459點，大市成交跌破千億元大關之餘，仲見到「北水」有流出跡象，南向滬港通錄得淨流出17.61億元人民幣，深港通則只錄得4970萬元人民幣的輕微淨流入。5月份還有4個交易日便會完結，「五窮月」現時累積下跌220點。個股中，騰訊(700)跑輸大市，收跌0.74%報404元，再度跌穿405元的南非大股東配股價。新秀麗(1910)遭沽空機構狙擊後復牌，上周五股價瀉12.4%收報26.9元。
航空電力股或炒油價回吐
外圍繼續受油組國有意增加油產量，令油股下跌影響。杜瓊斯工業平均指數周五收跌58點，報24,753點。標普500指數收跌6點，報2,721點。納斯達克綜合指數收市升9點，報7,433點。總結全周，道指、標指、納指分別累升0.15%、0.31%和1.08%。油價顯著下挫，紐約期油收市報67.88美元，跌4%，本周累計則跌約4.9%；布蘭特期油收市報76.44美元，跌逾3%，本周累計挫2.6%；油股雪佛龍周五單日跌3.5%，埃克森美孚跌2%，為跌幅首兩大的杜指成份股，估計周初開市油股仲會回吐吓，航空同大陸電力股可能有得轉番轉。
遊艇會炸魚薯條夠抵食
呢排天氣持續高溫，最適且進行水上活動，呢個月係香港遊艇會舉辦咗春季帆船賽（SPRING REGATTA），中環茶友有機會去欣賞下，仲順便食咗個英式炸魚薯條。
香港遊艇會英文是Royal Hong Kong Yacht Club，原來已有一百七十年歷史，o依家所在的銅鑼灣會址，原來是會方自行出資填海，然後由政府以象徵式租出，要入會就一定要係賽艇愛好者。影星梁朝偉原來好鍾意玩帆船，所以今年都獲邀去玩，如果佢有興趣又肯花時間，應該都可以申請做會員。
呢個會歷史咁耐，所以個會所都甚有英式風味，茶友有機會去到，趁機試咗炸魚薯條，唯然佢唔係好似英國炸魚店用報紙包啲食物，但份量就十足外國人口胃，炸魚入口夠脆，可以話係大件夾抵食，夏天出完海用來配冰凍啤酒真係一流。
陸羽仁
回應 (0)
我要發表