「鷹」明神武
2018/03/05 12:08:52 網誌分類: 經濟
特朗普出手搞局，美股受衝擊相對細。雖然杜指最多跌過391點，尾市收復失地，納指和標普500指數回穩，納指更升超過1%。累計全星期， 杜指跌3%，納指累跌1%，標普500指數跌2%。杜瓊斯工業平均指數收市跌70點或0.29%，報24538點。標準普爾500指數升13點或0.51%，報2691點。納斯特綜合指數升77點或1.08%，報7257點。
特朗普找數打貿易戰
美國對入口鋼鋁徵收高關稅影響，搞到金屬股份受壓，首當其衝是鋼鐵股，消息公佈後鞍鋼（347）單日跌2.4%收報8.3元；馬鋼（00323）急挫4.8%報收4元；重慶鋼鐵（1053）收跌4.3%報1.54元；俄鋁（486）下滑3.28%收造5.3元；中國鋁業（2600）跌2.5%收報4.59元。
美國接連吹出淡風，無論係聯儲局的放鷹疑雲，以至關稅震盪，都同總統有關。特朗普係中國國家主席習近平首號智囊劉鶴訪問前出招，甚有施下馬威味道。美國對入口鋼材同鋁材徵稅，除了影響中國，同時引起歐洲等國不滿，令全球貿易氣氛緊張。美國分析家質疑加關稅對增加美國就業的實際作用。不過，呢啲論調係特朗普眼中好明顯係城市精英既定的思維模式。這些城市精英對國家機器以至社會如何運作已經有一套邏輯嚴密的運作理論，好似話貿易應該要自由化，先至係理性決定，但特朗普顯然係唔信呢一套，喺佢眼中就係要打破常規，先至係被舊有政治勢力包圍下贏出遊戲的方法，好似增加關稅的邏輯都一樣。就算好多人質疑實際成效，但佢覺得咁樣就可以鞏固到支持者。
雖然特朗普競選時開出好多支票，聽落係信口開河，好多人估計佢會學大部份西方政客咁走數，但上任以來佢係最努力交數的總統，當中包括喺墨西哥起圍牆。而家佢不惜打貿易戰，同樣係同佢提出的美國優先一致，證明佢唔係口硬手軟。特朗普同中國、歐洲以至日本等國家開波，有人估計同通俄門調查不斷步步進迫有關。上星期通俄門調查不斷升溫，特朗普畀原有政治勢力同城市精英圍堵，可能更加快咗佢借助貿易戰去分散國內視線。從呢個角度講，通俄門迫得愈緊，佢走偏鋒機會就愈大。
港元下插股市添壓
至於鮑威爾又鷹又鴿，搞到華爾街股市升升跌跌，當然亦同總統有關。若然特朗普唔係請前主席耶倫食魷魚，咁o依家市場可能仲炒緊美國只係加息兩次，但鮑威爾上周中期暗示唔排除今年會加4次息，就令到市場氣氛大為緊張。雖然事後佢再發言，無再提用加息去壓通脹，但點都令市場對息口前景有啲緊張。投資者憂慮美國加息步伐加快及貿易戰升溫，港匯持續走弱，上周五跌至7.8302，為金管局於2005年設立雙邊兌換保證價以來，港元首次跌穿7.83重要關口位，股市相應亦受壓。
市場認為美國聯儲局主席鮑威爾流露「鷹姿」，導致美元走強，以及港美息差擴闊至逾90基點，令套息活動增加所致。由於環球主要央行維持寬鬆貨幣政策，港匯雖然走軟，惟未見有重大資金流出風險。中期嚟講，環球央行「收水」速度快過預期，推動資金從新興市場回流成熟市場，及由香港流回內地，或致港匯跌至7.83或以下，屆時息口上調機會就增加。
對聯儲局近日轉向，有人就作咗個耶倫同鮑威爾見特朗普面試的古仔。耶倫去到白宮見到特朗普，就同佢晒任內美國經濟點強勁同美股升幅有幾多，以證自己點樣英明，可以幫到手搞旺經濟，認為呢番說詞必然可以爭取到連任。鮑威爾見到特朗普，就大嚇佢經濟係咁上，可能唔使兩年就爆煲，屆時特朗普就想連任都難，雖然佢可以放鷹出來鎮壓住，等經濟軟著陸。特朗普諗完之後，覺得屬於民主黨的耶倫都係信唔過，驚自己踩到鴿屎，最終決定都係搵個信得過的新人，所以耶倫被炒魷後，都有點酸溜溜咁話其實自覺可以連任，言下之意即係無諗過搞到個場咁旺都會衰咗。
政治氣氛籠罩投資市場
啲人講到鮑威爾咁「鷹」明神武，猶如匿喺白宮枱底，實在有啲誇張。不過，鮑威爾上場後，的確畀市場感覺難於捉路，就算唔肯定佢係鷹，都唔會當佢係鴿。本來，鮑威爾係儲局內投票，未曾同耶倫有不同取向，但佢面試後踢咗耶倫出局，開始反映佢唔係耶倫影子咁簡單，加埋佢係國會開腔，儲局取向對市場來說就成為新出現的不確定因素。
有人話，軟著陸呢個字眼已經好耐無出現係新聞，但隨著美國經濟擴張超過90個月，進入歷來最長的上升循環，可能白宮或者儲局都要諗點樣令經濟係未來一、兩年間軟著陸，再等兩年後再起飛。若然經濟循環要轉向，咁美股自然要作出反映，從而輻射去其他股市。按照上面幾個思路去睇，政治因素呢排會幾影響市場，咁短期投資氣氛就會變得觀望，好難再學去年咁樂觀。
市道好 星級中菜生意旺
春節係春茗日子，今年經濟好，益咗啲有名中式食肆多做生意。最近有人就見到太子珠寶老闆鄧鉅明係米芝蓮星級中菜御寶軒請客。
呢間中菜開咗唔係好耐，聽講係新加坡資金。尖沙咀近年有唔少高質中菜，好似附近朗廷酒店就同樣有星級中菜，另外林建岳都係海洋中心開中菜。
呢間御寶軒主打都係高檔路線，有幾間廂房外，前菜有魚子醬蛋白，另外有個糯米釀脆皮豬，可以話係富貴版有米豬，用臘味糯米飯配乳豬同燒，小小豬油香味滲入飯內，脆糯濃郁，靚仔經理IVAN透露店中選用特別薄皮的豬種燒烤。
去年零售市道回暖，名表生意好番唔少，聽講係太子廣告出現過億身價的超豪鑽石表，都已經畀內地富豪一早買咗去，而且，太子鄧手頭有唔少物業，去年樓市升得咁緊要，太子鄧身家大漲，所以都諗做多啲公益嘢回饋社會，咁食得貴又有乜問題。
陸羽仁
回應 (0)
我要發表