賣磚頭股唔包裝點得
2017/11/27 15:29:21 網誌分類: 經濟
A股腳仔軟，主要係大盤對滬綜指升上3400點後，個別投資者開始沽貨食胡，從樂觀嘅角度去睇，呢個係慢牛炒法，高沽低揸，暫時睇唔到有大幅崩盤的理由。港股雖然在周末有獲利回吐，但全周計仍有不俗進帳。恒指收報29866，以全周計，恒指累積上升667點；國企指數收報11908，累積上揚299點。美股三大指數周五就企穩，杜指收市報23557點，升31點，納斯達克指數收市報6889點，升21點，標普500指數收市報2602點，升5點﹐夜期回升，恒指重上3萬關口。
市場呢排聚焦新股，但凡事總有例外，好似九倉（004）分拆市值超過500億元的收租公司九倉物業（1997），市場就唔多興奮，雖然有大行出吓報告，但股價就水波不興，與大動作規模完全唔配合。
有九倉高層話，為咗搞呢場大龍鳳，管理層花咗唔少精力，淨係搵啲陳年文件滿足投資銀行查核要求，已經做到嘔，o依家市場好似唔多理會，真係有啲沮喪。
九倉置業（1997）上周首度以介紹形式登場，有大行認為佢類似房託表現，多於家族式地產公司。根據大和證券計數，呢次分拆唔會改變九倉盈利同資產，大和估計未分拆前目標價係有92元，分拆後九倉目標價係35.6元、九倉置業目標價係56.4元，夾埋都係92元，即相對各自每股資產淨值折讓30%。
愈有數計 愈難炒起
如果按大和估值計，買佢哋仲有近兩成水位，計落相當和味，不過大家都知，有時大行目標價，多少有畀面成份，睇得到唔代表升得到，從兩隻股份昨日以至呢個星期升市中表現，就唔似短期會升到呢個水平。
對於呢個狀況，中環茶友有幾個分析，首先，係九倉分拆計劃曝光已有一段時間，曾經帶動佢股價創咗新高，咁即係話佢消息已經陸續被消化。再者，係而家潮流唔興計實數，好似科網股概念無限，係而家資金市最好炒，好似九倉呢兩間公司，愈有實數計，而家愈唔吸引人炒。
仲有一樣，就係九倉決策階層可能係實幹派，鍾意低頭做工作，唔著重包裝，所以分拆計劃由落實到搞咗出嚟，唔係咁多宣傳曝光。茶友笑言，o依家係市場賣股票同賣化妝品一樣，都要講吓推廣，你靠賣磚頭逐斤秤，咁計折讓佢現價同其他藍籌相似，表現已經差不多啦。
有凡事都拗者反駁，邊個話唔興炒磚頭，你睇呢個星期領展（823）唔係都發飊，升咗上去歷史新高收市69.7元，一度突破70元大關，股價唔係無折讓，仲高過資產值62.5元噃。
其實，包拗頸者講法不無啟示，領匯點解可以高過淨值，九倉咁靚資產反而唔可以呢？正正講出咗賣股票要包裝的道理。九倉股價有折讓，多少係俾佢長期成功所掣肘，由於佢旗下商場租金一向都收得好辣，管理層算無遺策，所以租金已經無乜快速增長空間，領匯成日被人鬧，但佢成日度吓搞呢樣搞個樣去刺激股價，一陣又話北上、一陣又話賣產，先唔講所有呢啲動作係咪對盈利長遠增長好有幫助，但就多咗好多令人聯想同炒作空間，加埋呢排政府批准房委會車位加租，變相幫咗有好多車位的領匯一把，所以領匯咪可以做到高過資產爭值，九倉就要打折頭散貨囉。
茶友話，九倉兩隻股份比較，置業包裝成房託，房託係領匯效應下，折讓相對已經算少，而家反而係阿媽價值未反映得夠，如果從反映價值角度嚟講，阿媽唔係無得炒，但就要等決策層諗到多啲概念，包裝好機會先至大啲。
拆息上資產股唔係咁盞
對資產股唔係咁有利嘅係，港元短期利率呢排又有回升之勢。上周隔夜拆息昨日急漲半厘至0.69厘。市場人士分析，臨近年結令貿易結算需求增加，加上市場開始為聯儲局下月潛在加息作準備，導致銀行間流動性緊張，預期拆息呢個星期會再升，先係試0.9厘水平。而家新做拆息按揭（H按）處近年低位，即拆息加1.28厘，若拆息高於0.87厘，意味着近年所有新做按息會觸及2.15厘的「封頂位」。雖然本地拆息抽升，地產股仲未受到影響，周五輕微造好，長實集團（1113） 上揚1.84%，收造66.2元；新地（016） 升0.77%，報收130元；新世界發展（017） 升0.87%，收造11.5元。
早排拆息推高，主要係因為新股熱潮，大家湧去借孖展，呢次就同內地資金緊張，托高離岸人民幣利率都有啲關係，呢排一年期離岸人民幣拆息昨升穿5厘，為今年六月來新高。人民幣中間價昨升211點子至6.5810，連升三日，但升勢未能延續，在岸人民幣按日跌214點子，收報6.6037，離岸人民幣亞洲時段收報6.6004。內地資金緊張都會影響到香港。呢排本地發展商頻頻開盤，暫時未受拆息影響，定價愈開愈高，不過睇落就有啲牙煙，皆因現時好多買家都係恐慌性入市，闔埋眼就買，若然熱潮減退，大家冷靜啲，咁就隨時變成你眼望我眼。至於拆息會唔會變成催化劑就唔知，因為通常改變市場方向嘅多數係估唔到嘅突發事件。
內地人工貴 手打牛丸要變招
商場做生意，潮州人一向有一手，佢哋作風團結，去年仲搞咗個潮州節，今年捲土重來，以「不忘初心‧潮拼香江」為主題，係12月6至10日在中環與眾同樂。中環茶友笑言，潮州有錢佬多，香港出咗幾個大富豪，內地近年就有騰訊主席馬化騰。
為咗宣傳潮州節，上個星期就請咗民政事務局局長劉江華同旅發局主席林建岳表演打牛丸。潮州牛丸出名夠彈，唔少潮州富豪為食靚丸，都專誠請人返鄉下買牛丸，車費隨時貴過牛丸，呢啲就叫妹仔大過主人婆。
聽講，o依家潮州牛丸都開始現代化生產，用機器可以做到手打嘅質感，咁樣生產量大，品質控制好，而且都迎合到內地人工薪酬高漲嘅趨勢，所以手打牛丸好快會變成表演項目。
今年騰訊股價升咁多，有人笑言如果搵埋馬化騰嚟宣傳，咁就仲有號召力。馬化騰好多年前已經攞咗香港身份證，叫佢幫手宣傳本來無乜唔得，不過，佢同馬雲唔同，講嘢唔係咁出位，有啲啲似「宅男」，所以搞宣傳，始終都係本地嘅潮商拿手啲。
陸羽仁
回應 (0)
我要發表