日本媒體大師重塑歷史 AR融入創意設計 重現舊香港故事
2018/11/22 04:12:13
網誌分類:
生活
「設計#香港地」係一個用創意同設計推動深度旅遊發展嘅三年創意項目,今年會以「連城:香港故事」做主題,喺十二月起會有一系列創意作品、佈置同創意活動,為公共空間注入生命!香港設計中心噚日公佈咗今年多個創意焦點項目,包括香港設計中心委約奧沙藝術基金邀請咗嚟自日本嘅新媒體大師藤幡正樹,將擴增實境(AR)技術融入舊香港嘅設計作品HK ACT!Act 1 BeHere。藤幡正樹根據好多香港舊相同居民嘅口述歷史,透過演員喺攝影棚「再現歷史」,再將影像記錄變成數碼立體形象,透過手機應用程式,以3D AR形式,將四十至七十年代嘅香港故事呈現眼前。
香港設計中心夥檔一口設計工作室仲會為大家帶嚟「#dd創意營造社區」,同多個扎根喺灣仔同其他本地文化創意單位合作,喺十二月區內多個地點展覽創意作品,希望用創意藝術為香港社區注入生命同驚喜!令市民好似置身喺一個露天博物館,可重拾童年回憶,令旅客發現不一樣嘅香港!
Kelly Chu
![■日本媒體大師藤幡正樹。 ■日本媒體大師藤幡正樹。](http://static.stheadline.com/stheadline/news_res/2018/11/22/441832/wttp000p07a.jpg)
■日本媒體大師藤幡正樹。
![■香港設計中心主辦灣仔街頭AR作品預覽。 ■香港設計中心主辦灣仔街頭AR作品預覽。](http://static.stheadline.com/stheadline/news_res/2018/11/22/441832/wttp000p07b.jpg)
■香港設計中心主辦灣仔街頭AR作品預覽。
回應
(0)
我要發表