外面的世界很危險
2020/08/10 04:12:51 網誌分類: 經濟
騰訊99隻牛證陣亡
上周大市本來因為有消息指，螞蟻集團下月將來港招股，氣氛有再度轉好跡象，但最後兩個交易日，美國接連向內地社交媒體發狠招，特朗普又提及港交所（388）會因為失去美國特殊待遇陰乾，令市場熱度急降。單喺最後一個交易日，被矛頭所指的股王騰訊（700），99隻牛證慘遭「打靶」強制收回。
恒指上周五曾大跌762點，低見24167點，創6月29日以來新低，最後收市走低398點，報24531點，兩日累跌570點，全周累降63點。本來股票投資要面對風險，但經濟風險有得計，政治風險就飄忽難估好多，所以政治市最難預估，最近大市被美國選舉出招衝得七零八落，中長線好難準確分析，只能走走短線，見低吸納博反彈，見高位就食胡。
近日大市政治因素空前複雜，搞到好多跨國企業高管相當頭痕。騰訊的微信被封殺，搞到原本登頂的股價，上周五一日急跌5%，收報527.5元。有中環茶友話，騰訊今次主要係微信被針對，雖然事件對公司未來前景有影響，但微信並非最大盈利來源，衝擊仲係有限。只是從今次事件看到，中港企業走向國際，真係愈來愈危險。今個星期騰訊會公佈業績，喺疫情下手遊屬於「宅經濟」，外界估計業績應會偏好，只是突然多咗政治不明朗因素，一般估計周初觀望氣氛會濃厚。
講到中港企業喺海外遇險，不能不提滙控（005）同港交所。滙控喺九七前走出去，收購英國米特蘭銀行，成為國際銀行，但近年就被英、美、中輪流批鬥。最近因為孟晚舟案，被內地官媒炮轟，又因為高調力撐《港區國安法》，被美英追殺。有銀行家話，中美科技戰打得正濃，華為仍然在風眼中間，故此孟晚舟案「樹欲靜而風不息」，隨時仲有手尾跟。滙控上周收報32.8元，隨時又會試底。
港交所險被美國玩殘
另一隻間接受科技戰影響的是港交所，上周港交所一度創388元歷史高位，但最後兩個交易日受壓，雖然上周五傳百勝中國最快下月來港第二上市，港交所（388）亦要回吐1%，收報381.4元。不過，茶友話睇番轉頭，好彩去年集團出併購倫敦交易所的世紀婚事不成功，否則就真係大件事。
茶友聽過一個分析，話港交所提親除了禮金貴外，最重要是監管因素。在提出收購時，倡導的港交所行政總裁李小加聲稱，若然聯婚成功，倫敦交易所仍歸英國監管，香港交易所則歸本地監管。其實細睇倫交所屬下不同業務，包括結算公司等，這些生意不但敏感，甚至有戰略價值，如果港交所成功收購，必然納入美國監管部門的長臂管轄，很可能自招麻煩。
港交所若然合併，將會發行四成多股份給倫交所股東，旗下業務融合後，很有可能會跌入美國證監會和美國的外國投資委員會（CFIUS）長臂手上。如果係一般公司，外國投資管理委員會遇著不同意投資，會要求出售了事，不過如果係金融策略資產，又會不會咁易了事呢？上次港交所提出併購倫交所，從金融上可能係合理，從政治上考慮好明顯係漏招，如果成功咗，可能現在股價比現在低100元以上。
又見內需股轉趨活躍
國際環境大風大雨，內地巨企外闖，尚且遇到咁多阻滯，何況係香港公司。在未來一段時間，中港經濟可能只可以玩圍爐取暖，塘水滾塘魚。內地這兩個月不斷想辦法谷內需，推動內循環，期望以13億人的市場，去維持經濟活力，所以見到基建、內需股上周都相當活躍，水泥、乳業、晶片板塊輪動。
至於科技股，比較好彩的是內地科企，暫時國際業務不是佔太高比重，重磅公司好似美團點評（3690）等都係以內地為主。至於準備來港上市的新股，滴滴主要市場喺內地，螞蟻科技國際業務較多，喺不利環境下，上市估值如果相應調低一點，問題亦應該唔大。
檢測收得平 中國生科炒唔起
本地檢測能力不足，特區政府急急委聘外界服務，有人追查發現，取得政府合約的華昇診斷中心，屬創業板中國生物科技服務（8037）旗下公司，擔任顧問的胡定旭仲有認股權，話佢發疫情財。不過自消息曝光後，中國生物科技股價升幅只係得一成左右，刺激根本不大。其實該公司目標係內地市場，以中國十幾億人口計，香港幾百萬人的生意，又點算係大茶飯？
創業板上市的中國生物科技，是由投資者夥拍科研人員創立。胡定旭加入後，不時接受專訪介紹公司業務，最近替政府檢測，他亦有接受過報紙專訪，想不到今次因為穿針引線，替政府做檢測惹是非。今次華昇做檢測根本執唔到幾多錢，但對本地醫療界來說，這項服務近日需求大增，本來收開海鮮價，是行內主要收入來源，而且市民要做檢驗，不可以自己摸上化驗所，必須由醫生介紹，過程又要收錢。現在政府出錢畀全民做自願檢測，就變成打爛醫生飯碗。
除了阻人搵食外，本地檢測能力嚴重不足，政府向中央求援，上周末內地支援隊來港，這也是本地醫療界最不想見到的做法，胡定旭自己無發疫情財，但肯定得罪咗好多人。
陸羽仁
回應 (0)
我要發表