最動人的承諾...最美麗的謊言......
2008/09/13 15:46:28 網誌分類: 愛情
偶爾碰見一個相熟已久的老伯伯鄰居......平時定必見他和老婆婆出相入對, 手拖手一副幸福恩愛的模樣, 羨煞旁人...曾幾何時想過, 如果我和女朋友可以好像他們一般白頭到老, 恩恩愛愛的拖着手一起行公園, 會是何等的浪漫......對我來說於願已足矣!
但今天看見他隻影形單, 蹣跚的漫步, 細問之下, 得知老婆婆在不久之前不幸過身了...從他眼中仍看得見失去老伴的無奈與痛心, 從眼前的情境, 我絕對可以想像得到老婆婆的離世為他所帶來的創傷, 不禁悲從中來......
生老病死...人生的必經階段......能夠找到一個和自己共皆白首的伴侶, 其實已是幾生收到的福氣!! 雖然大家都知道人生有限, 但是當你置身於幸福之中, 試問又有誰會想去接受這殘酷的現實呢?!
老伯伯的遭遇, 令我想起在網上看過的一篇文章...雖然是一篇簡單的敘事手記, 但當中所包含的那份情誼, 卻教人萬分感動, 至少我每次看完, 心裡總會感到一股暖流熱淚湧上來似的......在此和大家分享一下這篇文章, 希望大家看完以後, 都閉上眼睛, 靜靜地感受一下, 回想一下, 其實在你身邊, 有着很多愛你的人...伴侶, 父母, 子女, 家人, 當你現在還擁有時, 或許你不懂去珍惜, 或許你會忽略了他們對你所做的一切, 因為你會覺得是必然的事......但請你想想如果有朝一日當他們離你而去, 你將會是何等的孤單與不捨......
希望大家...珍惜眼前人!!
--------------------------------------------------------------------------------
最動人的承諾
唔係果D係人都講得出口既海枯石爛、地老天荒 ......
以下只係一篇好短既醫生手記文章(區樂民醫生), 但已經足以令人雙眼通紅鼻酸酸 .....
有一位老婆婆個子唔高 , 但係好肥 , 行路既時侯需要拐杖支持。
每隔兩個月老公公都會陪老婆婆到醫院覆診, 因為老婆婆患有高血壓。
某夜 , 老婆婆左邊身麻痺入院 , 經過電腦掃描顯示右腦出血。
我如實話比老公公知 , 佢無出聲 , 只係無奈咁望住我 , 淚水已經湧現。
第二朝, 意料之外 , 老婆婆既情況唔係想像中咁壞 , 而且頭腦清醒。
入院之後既第五日 , 老婆婆問我 : 呢兩日伯爺公點解無黎探我既 ?
一個實習護士話俾我聽 , 早兩日老公公突然心肌梗塞 , 住左響對面既男病房。
兩老無兒無女, 最親既都只係姪仔。
今日, 姪仔帶左兩樽果汁黎醫院 , 先去探老公公 ,再去探老婆婆。
過左幾日 , 老公公既病情剛剛穩定 , 就嚷住要出院照顧老婆婆, 經過一番溝通之後 , 主治醫生諗左一個折衷辦法 : 首先老公公換番自己既衫 , 坐住輪椅 ,由工友推到女病房門口 , 而為咗安全起見 , 醫生護士都要跟埋老公公一齊。
老公公蹣跚地企起身 , 手執果汁 , 走到老婆婆床邊 :買比妳飲嫁。
老婆婆嗲起黎 : 呢幾日唔見你既伯爺公 , 咩事呀 ? 病左咩?
老公公微笑 : 唔係呀伯爺婆 ... 姪孫結婚啦 ,我要幫佢打點一下嘛。
呢一個, 係我咁耐以來聽過最動人最感動既一個謊話。
人生就好似變幻莫測既天氣 , 雖然可以預料 , 但往往都出人意表 ...
老公公既心臟日復日咁康復 , 準備出院那天 , 病情突然惡化, 撒手塵寰。
姪仔辦理完死亡證明之後就嚟搵我 ,要求暫時唔好話俾老婆婆知...
因為老公公死前遺言 : 照顧伯爺婆, 唔好話佢知我既事,唔想佢受剌激。
呢個時候, 無一個在場既人唔感動唔流下眼淚, 包括我 .....
當日我巡房既時侯老婆婆又問 : 伯爺公D果汁喝晒啦, 點解佢又不見人?
護士強忍眼淚 : 妳唔記得左咩? 姪孫過兩日結婚啦! 老公公要幫手嘛。
第二朝清早 , 我發覺老婆婆床頭多左樽瓶果汁...
聽到護士同老婆婆話 : 老公公剛黎過 , 佢見妳訓得咁甜 , 唔捨得叫醒妳, 放低果汁就走咗啦。
當護士一轉身發覺我企響度既時候 , 立刻雙頰通紅。
我微微一笑 , 拍咗佢膊頭一下, 慶幸佢果顆愛心 ,不為歲月冷卻。
當日下晝 ,護士長察覺坐響梳發對住窗望風景既老婆婆無咗呼吸 , 我迅速跑去一手抱起老婆婆 ,再聯同護士將婆婆放上病床急救 ....
搶救二十分鐘之後 , 我宣布失敗 ......
我一邊寫報告記錄 , 一邊諗起「陪著你走」既一句歌詞 : 如果, 走到這世界邊端 , 我倆已是無力前行 ,跟我一起飛去......
護士長走過嚟同我講 : 估唔到妳咁大力 ,一手就可以抱起老婆婆。
我只係報上微笑, 因為我已經唔想講任何野,我怕我忍唔住眼淚 ......
老婆婆的確好肥 , 但係好輕 , 因為佢既靈魂已經跟老公公飛走左啦......
"愛" -- 雖然只係一個字, 但係無人亦都無嘢可以具體咁解釋呢個字 ......
正如糖好甜, 花好香 ...根本無得解釋,要用心同親身體會先可以感受。
真正既愛~~應該係堆藏響心裡面, 去體會, 去感受, 去領悟.....
即使天會變...月會圓...花會枯...人會老 ......有生之年, 請珍惜你所愛以及愛你嘅人.......!!
--------------------------------------------------------------------------------
------------------ 網上轉載 ------------------
簡單的事如果能一直做下去,就很感動了
愛如醇酒...... 是愈陳愈香,要好好珍惜身邊的那個他 / 她 !
Keith Ku~
祝中秋節高高興興,開開心心!
祝....家好月圓!