惡股發威
2016/06/13 08:43:23 網誌分類: 經濟
官媒同市場依家雖然唔敢睇得太好，但阿爺似乎仲係最後關頭努力緊，上星期中央就宣佈畀美國投資二千幾億的合資格境外投資者額度（QFII），呢個措施明顯係針對大摩關注外國投資者有無足夠渠道參與及進出A股市場，阿爺出埋呢一招，好明顯係仲未放棄最後衝刺嘅努力，希望可以入摩。
大家睇緊A股能唔能夠入摩，外電就報道，有投行推出衍生產品，賭未來A股會唔會上升，買家可以收取類似期權金的收益，作為同淡友對賭的代價。投行係呢個時期推出呢個產品，唔多唔少係覺得市場對A股睇法分歧，有人睇好、有人睇淡，因為有人肯接貨，佢先至出到呢啲變相睇好A股嘅產品。呢個現象我覺得多少同阿爺叫停匯改維穩有關。因為阿爺未動口又動手力控人民幣匯價前，外界都幾擔心人仔暴跌，觸發股市急挫，猶如亞洲金融風暴時港股嘅翻版。依家傳出阿爺想回復人仔匯價由佢話事，唔再由市場主導，市場就少咗樣嘢擔心。係人仔少咗惡性貶值同大量走資的威脅，A股係3000點樓下，就會有人買佢就算跌都跌得唔多。
領展港鐵雙雙破頂
由於個市炒緊入摩同美國唔會係六月份加息，上個星期恒指上番21000點樓上，期間仲有幾隻藍籌股破頂，包括「兩大惡股」港股同領匯都雙雙創出高位。兩大惡股港鐵同領展早前傳出因為賺得太盡，惹起了官場好打得林鄭月娥的不滿，認為咁樣搞到民怨四起，不利政府管治，仲話有需要不惜打官司，都要為民請命。呢個消息傳出後，領展管理層係公開場合就被記者追問，行政總裁王國龍強調，公司睇唔到有訴訟風險，不過佢亦同時透露，已經叫停咗拆售物業同重組街市嘅計劃，等檢討後先再進行。
領展出售車位同商場，結果接手者用來炒賣，係惹起社會不滿嘅主要原因。雖然領展話自己係商業機構，又話睇唔到有訴訟風險，但係今時今日咁嘅政府氣候，硬碰始終無着數。王國龍嘅回應可以話係一手硬、一手軟，叫做畀吓面政府，但估計避完風頭，佢好大機會嚟過，所以市場暫時對消息反應唔大。
睇番領展長期走勢，雖然管理層動作多多，又話北上投資，又投地做發展商，加埋出售物業嚟催谷資產估值，實際上佢嘅表現主要係跟美債走，如果美息升、美債跌，佢就股價受壓。去年尾美國加息，利率前景偏鷹，當時領展股價係年頭一度插低到40.5元，之後反覆回升，到上個星期五趁住可分派利潤增長近一成，一度閃穿50元大關，升咗超過25﹪，依家佢息率3.68厘，無論以房地產信託抑或地產股計，都有多少雞肋感。
對領展（823）截至3月底止全年業績，可分派總額按年增長10.54%，瑞信都發表報告，估佢未來盈利增長會放緩，估算2017年至2019年複合增長率會放慢至8%。該行認為，面對利率預期向上情況下，加上整體經濟及執行面臨風險，維持「跑輸大市」評級，目標價卻由40.1元升至46.5元。
動作多唔等如係好
喺領展創新高之餘，其他幾隻房託都齊齊破位。如果細心比較，領展派息比其他房地產基金低，好似領展係4厘、置富產業（778）係5.3厘、陽光產業（435）係5.1厘，做寫字樓加商場嘅冠君（2778）係4.8厘，咁點解領展估值會較貴呢？有做呢行嘅中環茶友話，主要係佢有龍頭溢價，由於領匯有1143億市值，好多基金經理就當佢係貨幣基金咁，無乜嘢買嘅時候就泊啲錢落去。從呢個角度講，領展管理層搞嘅嘢多，譬如好似話北上買商場，又或者自己起商場，令到業務複雜咗同愈嚟愈接近地產公司，對佢嘅估值係咪有好處，就真係見仁見智嘞。
同領展一樣，由於着重股東利益惹起林鄭「關心」嘅港鐵，同樣飆上去高位。佢之前剛公佈加價方案，雖然同時有提供優惠，但大體唔係有好大妥協。從市場反映，證明股民心態真係唔惡唔愛。
釀香檳如炒股都要打底期
上個星期有中環茶友話，靚茶飲得多，不如轉轉口味飲吓香檳啦！見佢神神秘秘兼盛意拳拳，於是欣然應承赴會，原來佢係叫我參加1010嘅VIP香檳PARTY。1010為咗冧班形格貴格，今年搞咗幾次試酒會，茶友上次去試威士忌，見佢哋一晚開咗兩、三支余市20年，都覺得佢哋幾捨得落本兼有啲料到。場中一位有米大款笑言，佢屋企都有成櫃余市20年，但唔捨得飲，所以專登去飲人哋嘅靚酒。學賭王燊話齋，做生意唔驚你精、唔驚你呆，最怕你唔來，有米大款都嚟飲免費靚酒，呢個就係搞VIPPARTY嘅效果囉。
嗰晚試名牌貨DOMPERIGNON，佢嘅P3賣過萬銀一支，飲香檳唔同飲威水嗒嗒吓，咁嘅身價一啖啖真係倒錢落肚。咁乜嘢叫P1、P2、P3呢？嗰晚個法國嚟嘅帥哥大使話，香檳成熟期同股市差唔多，升一輪就要整固，打完底再升。靚香檳頭一輪陳化要八年，之後停一停，跟住去到十五年，然後就二十五年，嗰晚雖然無試到P3，但酒商都預咗葡萄年份好靚嘅2004年佳釀，套用大陸流行語，呢期嘅酒雖然新，但勝在性價比夠高囉。
賣酒必須講包裝
講完香檳級數，帥哥又傳佢嘅品酒心得，話飲佢呢雙酒要用白酒杯而唔係紅酒杯。點解呢？佢話，因為佢哋好注重葡萄嘅品質，所以佢哋酒質同紅、白酒咁靚，唔同年份有唔同味道之餘，仲有唔同香味，如果用香檳杯就唔可以裝住酒氣，影響咗嗅覺上嘅享受。人哋話飲香檳要欣賞佢嘅泡夠唔夠滑，要睇佢嘅泡夠唔夠細緻，所以要用長身香檳杯嚟欣賞氣泡好似珍珠咁升起。不過，第一個送玫瑰嘅係天才，第二個係庸材，第三個係蠢才，咁做得名牌，梗係要諗啲新噱頭嚟包裝，呢樣同炒股嘅道理都係一樣？
陸羽仁
回應 (0)
我要發表