德銀急驚風
2016/10/03 08:41:59 網誌分類: 經濟
德銀股價累跌近五成
回顧港股今年頭三季表現，第一季大跌咗1137點，隨後第二季企番穩，累計微升17點，第三季更大反擊，全季大升2503點，是七年以來升幅最勁，當中第三季藍籌升幅冠亞季軍分別為金沙（1928）、新世界（017）及銀河娛樂（027），第三季分別急升29.67%、28.41%及27.73%。藍籌第三季包尾成份股為旺旺（151），全季挫12.7%。國企指數第三季表現比恒指遜色，全季升869點，當中表現最叻國指成份股是爆股權爭奪戰的萬科（2202），整季急升32.24%；廣發（1776）為包尾國指成份股，全季挫6.82%。
港股第三季升幅驚人，臨到埋尾先因為擔心德意志銀行陷爆煲陰霾而回調。德銀呢劑嘢其實都醞釀咗一段時間，唔多唔少借英國脫歐同難民問題，公眾對歐洲同德國政治前景信心轉弱發作。至於短期嘅催化劑，係德銀於周一拒絕美國司法部提出的140億美元不當銷售次按債訴訟和解費，今到股價大挫，在法蘭克福股市曾跌穿10歐羅水平，創紀錄新低。令年以來該行股價已下滑超過五成。
暫時喘定未斷尾
雖然德銀對於股價急挫，強調係媒體報道效應引致，強調該行資產負債狀況是20年來最穩健。但其後再傳出有對沖基金開始收縮與德銀之間的金融業務往來，觸發市場憂慮該行財力是否足以應付巨大訴訟開支與和解費。該份內部文件披露，約10家對沖基金已把部份與德銀之間的衍生工具交易業務，轉移往其他金融機構，以策安全。喺股民猛食驚風散之際，華爾街大行齊唱好護航，德銀歐美股價齊反彈，德國股市暫時回穩，港股喺美國嘅預託證券都升番。德銀呢輪急驚風，搞到港股嚇餐飽，根據過去經驗，呢啲症唔會咁快斷尾，但通常跟住都會定一定先。
上星期五港股大插插之下，都有逆市奇葩。渝太地產（075）宣佈計劃實物分派港通（032）。公司將按每持有103股渝太地產股份獲分派20股港通作為特別股息。渝太地產現持有1.55億股經營西隧同大隧嘅港通，佔已港通股份發行量的41.66%，截至今年6月底止，港通帳面值約為21.8億元。渝太地產市值喺公佈前只有三十幾億元，喺大派資產下，股價大幅炒起，收造6.22元，大升30%。
乖仔豪派渝太有禮物收
睇番渝太派利是唔係第一次，之前佢宣佈出售核心物業，已經派咗3.8元，股價一度爆升，其後跟住除淨，現在再派埋呢啲股息，公司已無乜重要資產，往後不排除賣埋上市地位嘅可能性。對小股東嚟講，而家可以坐喺度等收禮物又得，見高位收割亦得，可以話進退自如。渝太地產嘅大股東係渝港國際（613），佢市值12.5億元，今次可以收番差不多10億元嘅港通股份。公司業務比較簡單，主要都係控股，主要持有渝太，過去渝太大舉派息，佢都收番一大筆，但就無豪派股息，而家佢帳面淨值0.33元，比收市價0.134元折讓唔算超大，股息率2.99厘，有耐性就可以候低買入博佢有日學個仔咁大派利是。
港珠澳橋帶動樓價睇樓兼嚐雞泡魚
港珠澳大橋內地路段橋體已經完工，而家似乎等緊香港嘅工程，同埋點搞過境安排。最近中環茶友就走咗轉返南沙，同人傾起，由珠海、中山以至南沙一帶，受深圳樓價攀升帶動，加上炒吓港珠澳橋概念，房價都升咗唔少。
茶友呢次睇嘅樓盤由香港霍英東集團發展。呢個盤係霍家在當地首次開發樓盤出售。項目位置所在旁邊是遊艇會。第一期的發展有多層單位，也有服務式公寓和複式單位，最前緣向着遊艇會的公寓和複式單位。據介紹的職員透露，千八方呎的公寓實用率約七成多，售價要三千元人民幣一呎，銷售員聲稱大部份單位都已經預訂。
至於分層式單位多數是園景，單位實用率較高，達到八成二，而且呎價大概二千餘元人民幣一方呎左右。由於項目定位較高檔，除了售價外，近八百多呎的單位都是一房設計。由於項目規模不大，現時開售的單位已經賣出很多。發展商現時已準備另一幅大型地皮上，開展新一期計劃。
試埋南沙十二道風味
睇完樓，茶友拉隊駕車經虎門大橋去附近食雞泡魚，此物可以用來煮湯，也可清蒸。當日用了九斤雞泡魚，煮成一窩清湯，鮮味可想而知，之後再來清蒸。老饕常說：拼死食河豚，以示食膽，也證明其鮮甜美味。日式河豚有用來做刺身，中式清蒸又是另一番風味。有說雞泡魚食過會上癮，試過其清甜就會明白原因。除了雞泡魚，還有馬友兩尾。馬友油脂豐富，最好食是哪部份呢？當地有個說法，賣田賣地，都要食馬友，原來馬友魚最肥美是魚頭尖尖部份，最為香滑。
食完午餐，可以去濕地公園遊覽，跟住佢哋去番南沙一間叫「十二道」嘅菜館晚飯，佢嘅十二道同謝霆鋒嘅唔同，其中有味清炒菜芯碌，將靚菜去葉落鑊，就真係好簡單直接，仲有清遠雞，都算食得吓。
陸羽仁
回應 (0)
我要發表