輸咗人仔唔使㷫
2016/11/28 10:12:54 網誌分類: 經濟
深港通唔似好刺激
港股上周五隨亞洲股市反彈，恒指升114點，成交金額逾561億元。雖然五個交易日兩升三跌，但由於升幅大、跌幅細，以全周計恒指累積進帳咗379點；國指累積上漲441點。
深港通終於落實，市場人士暫時唔敢寄以太高期望，呢個反應實在可以理解。因為炒北水南下，大大話話炒咗十年以上，乜嘢概念都已經反映咗，所以滬港通落實時，港股唔見得特別興奮，呢次輪到深港通，市況亦唔係好就。中環茶友話，過去炒港股直通車，恒指飆上三萬二千點，經此一役，阿爺明白火頭火勢時，千祈唔好再加油，否則就會滾到瀉，所以滬港通都揀個市況冷啲嘅日子推出，大市要等到內地A股出現大時代，先至炒番高。
美金升好多瓣都跌
呢次深港通啟動，正值人民幣貶值同預期美國加息，個市又係冷冷哋。茶友話，睇番深港兩地股市，深圳氣氛似乎仲好啲，因為A股呢排喺權重嘅金融股帶動下，滬深兩市升勢雖然唔算急勁，但慢慢都趷上咗高位。反而本地投資氣氛，就畀人民幣持續貶值影響。呢個月人仔幾乎日日跌，如果以人民幣兌所有主要貨幣嘅指數去睇，人仔匯價尚算穩定，但用美元同港元去睇，咁就已經碌咗落去八年幾新低。如果再睇埋其他新興市場貨幣，呢排跌幅仲得人驚，已經感覺到有小小災味。用呢個角度嚟睇，港股都已經算係頂得兩嘴。
人仔呢排跌勢轉急，令到好多過貪佢穩陣買入收息嘅港人牙痛咁聲。茶友就安慰佢哋，話美元強勢下搵食係艱難啲，除咗美股你夠膽高追可以賺錢，買黃金、債券、外匯都要輸錢。債券話係穩陣投資，但年中大家見到歐洲搞到負利率，啲錢大舉湧入債市，呢排美債孳息急升，已經搞到債價大跌，高位買債者已經燒晒手指。至於其他外幣好似日圓、澳元以至加元，喺美元強勢下都疲弱乏力，所以有閒者除咗忍得住放喺銀行收雞碎咁多息外，無論買乜都好大機會輸錢，買咗人仔輸多少，都唔使太唔開心嘅。
人仔貶利A股內險
其實，港股能夠撐住，一大理由係人民幣貶值下，北水續流入本港中資金融股，呢排內險股表現頗為突出，好似大型國企龍頭國壽（2628）上周五再走高3.9%報22.7元；人保（1339）漲2.9%收報3.25元；平保（2318）升2.1%報43.25元。另外內銀股都有接地跡象，中行（3988）上周五再升，收報3.5元；建行（939）、工行（1398）、農行（1288）都有得升。如果比較內險同內銀股，暫時睇內險股會強勢啲，因為內銀股主要跟內地經濟，𠵱家內地調整勢頭雖然穩定咗，但未見有好大動力。內險股就睇投資環境，如果股市好，投資回報增加，咁內險股就可以受惠。人仔貶值理論上利好股市，加上股市通常走喺經濟之前，令內險股好炒啲。由於內險股已經累升唔少，想搭順風車就要留意住A股表現。
炒股怕水清無魚食蟹怕水清無味
港股呢排上上落落，投資最緊要靈活，唔好死揸，否則被綁就變大閘蟹。𠵱家初雪剛過，仲係歎毛蟹季節，做大閘蟹不如食大閘蟹，可惜最近太湖蟹鬧出二噁英驚魂，搞到有銀都無靚蟹食。有中環茶友聞言，就相約大家去中環食生態大閘蟹。
荷蘭蟹一味夠乾淨
上海江浙一向富庶，出唔少識炒股嘅人才，好似前港交所行政總裁袁天凡，就係炒股同食蟹嘅高手。袁天凡喺科網股爆煲前天價沽咗八號仔轉買山頂樓，一買一賣賺到盡。因為金融界多蘇浙人，中環附近好多食大閘蟹嘅地方。茶友去食蟹嘅香港老飯店，喺北角經營多時，年前四叔拆咗店址所在嘅三星級酒店起樓，於是佢就搬咗去中環南豐名下嘅商廈。聽老闆講，佢哋賣嘅蟹由佢親自北上揀嘅蟹場攞貨。呢個場有幾百畝，水源來自長江，蟹仔先食水草，稍大後吃塘中魚仔，之後再餵飼粟米，由於水質有保質，剝開可以見到蟹肺黃白色，與市上普通貨色帶灰黑不同。
近年，因為華人湧入西方國家，好多水產都跟住移民當地河川，搞出生態災難，好似鯉魚、生魚，佢哋生命力太強，搞到當地物種大受威脅。大閘蟹同樣隨之走咗入荷蘭，產量甚豐，不過佢哋似乎爭氣啲，成為美食幫風車國出口創匯，不過老闆話這些荷蘭蟹生長水質無疑好，缺點是蟹味淡。中環茶友笑言，炒股莊家最怕被人查，被人抽秤難搵食，咁就水清無魚，但無諗過連做大閘蟹，都會怕水清無味喎！
陸羽仁
回應 (0)
我要發表