無錢食飯派粒糖
2016/12/19 08:41:50 網誌分類: 經濟
聯儲局又再狼來了
息口向上令美元強勢，資金回流美國，港股繼續有沽壓。恒生指數上周四暴跌近四百點之後，上周五持續下跌，一度失守22000點大關，但尾段跌幅收窄，收市報22020點，微跌38點，呢個亦係逾四個月收市新低。以全周計，恒指累積下跌740點；國指累積下滑397點，而且成交減少，假期氣氛似提早降臨。
市場最新焦點，係聯儲局官員調高咗明年加息預期，由原先估計加息兩次變成加息三次，顯示利息調高步伐比較急驟。中環茶友懷疑聯儲局係咪又係狼來了。佢話，去年儲局話今年會加息四次，結果因為這樣或那樣的理由，結果捱到十二月尾先加咗一次息咁大把。𠵱家話明年加息三次，實際可以加息幾多無人知。呢幾年儲局都係出口術救市，成日話加息，但講來講去咁耐先至加咗半厘，香港由於水浸，根本未曾加過息。明年法國同德國都會大選，若然再爆出意外結果，隨時令到歐羅區陷入比美國脫歐更大的不明朗，所以儲局𠵱家話明年加息三次，𠵱家最多信住一半先。
雖然茶友對美國真正加息嘅能力有懷疑，但我仍然認為唔好太低估利率加快向上帶來的心理預期，主要原因是全球資產經濟多年寬鬆措施，普遍有價格偏高現象，最明顯係債券市場，歐洲出現零息以至負利率，美國長債最低跌過去1.5厘樓下，當大家習慣咗低息環境咁耐，一旦利息向上就唔係咁易適應，尤其如果儲局喺幾個月內再加第二次息，大家覺得息口會持續上調，就有可能會觸發較嚴重嘅反應。
金礦股或短期超賣
投資市場係炒預期，𠵱家市場開始有估計央行放水，變成覺得會慢慢收緊銀根，雖然實際未曾咁做，但對投資市場已成為緊箍咒，最明顯係加息後，金價再度尋底，上周插到去1135美元一盎司以下水平，受累金價急挫，金礦股遭到拋售。招金礦業（1818）單日就跌咗6%報6.29元；紫金礦業（2899）跌4%收報2.4元。金價插得咁急，技術上有出現反彈條件。通常喺假期靜市，會係大戶夾倉嘅日子，今年睇吓佢哋會唔會出手嘞。
息口向上，加埋政府出咗加辣招，論理對樓市不利，但香港業主普遍借貨水平唔高，加上人人諗住沽咗貨要賣番畀稅好勁，好多唔等錢使嘅業主寧願封盤唔賣，所以二手樓市冰封，代理行已經大叫難頂。早前，美聯物業（1200）就宣佈派發美聯工商舖（459）嘅股份，比例為一股美聯送5股工商舖。
美聯派股有隱衷
美聯呢兩年生意都受二手樓市影響表現波動。去年集團全年虧損咗9900萬元，今年上半年虧損咗1.3億元，下半年由於樓市爆發，本來有機會翻生，但到咗上個月政府宣佈辣招稅，二手立即進入冰封，而且連一手新盤開盤都少埋，所以估計今年未必可以轉虧為盈，但虧損就會比去年大減，只係來年生意又再難做，至少上半年都要捱吓。
睇番美聯業績，佢最好景係沙士後，盈利年年上升，但自從政府干預樓市同現屆政府上場，佢嘅盈利就好波動，最叻係12年差唔多賺咗2.5億元，但跟住一年就蝕番2億元，之後14年賺錢，15年又蝕錢，如果今年唔能夠轉虧為盈，咁就係連續第二年蝕錢，過去幾年公司亦由派送慷慨變成無乜派息，可見在樓價高企，二手交投被政府干預陰乾下，代理呢行已經好惡啃。今次美聯送股，有人形容為無錢食飯派粒糖，至於粒糖甜唔甜，就要睇未來工商舖嘅股價有無炒作嘞。
趁日圓平暢遊富士山
今年聖誕同新年都接近假期，容易攞假外遊，加上日圓下挫，好多人都會諗吓去日本。有中環茶友今年就準備去東京睇吓富士山，仲話近兩年富士山附近開咗間型格酒店，值得一去。
富士山每年只有七到九月開山，但離遠睇就無所謂，茶友話今次去住嘅酒店，設計甚有韻味，其中有長長嘅山徑樓梯，甚有山趣。另外酒店另一賣點，是個個房間都可以睇到富士山。佢話如果成班人去旅行，有人睇到雪山，有人睇唔到，咁就有啲無癮啦，住呢間酒店就唔怕有呢個問題。
近年日圓下挫，令日本旅遊業受惠不少，不過，為咗挽救經濟，日本政府仍然決定撤銷多年限制，容許開賭，估計在2022年左右就有賭場。
日解賭禁將影響澳門
呢個消息對濠賭股有辣有唔辣。辣嘅係早晚佢哋會多咗個強勁嘅對手，唔辣係個別財團好可能會走去當地投資，實行玩多一瓣。澳門政府其實好早已經擔心日本會開放賭禁，認為以當地嘅旅業水平，會成為強勁對手，故此在博彩業外，成日都話要產業多元化。但開賭咁好賺，試問點會咁易搵到其他行業可以及得上做賭場！
濠賭股衰咗年幾兩年後，今年下半年開始出現明顯反彈，個別由低位回升六、七成。呢個聖誕節，聽講澳門訂房唔錯，新酒店每晚仲要成3000元，可惜受日本開賭同內地再限制帶現金去澳門同擦卡消費影響，窒住咗佢哋反彈個勢，大行瑞銀仲調低個別濠賭股好似美高梅中國（2282）嘅評級，由「中性」降至「沽售」，搞到上周五股價跌咗3%，收報14.84元。
陸羽仁
回應 (0)
我要發表