地產生意都歎難做
2017/01/09 10:12:28 網誌分類: 經濟
周末茶友坐埋傾偈，離不開最熱門嘅特首跑馬仔。有中環茶友話，上星期長和主席李嘉誠出嚟見記者，佢最想聽李超人開金口講嘅有三樣嘢，最八卦當然係講特首人選，政界唱到開巷商界支持請辭咗嘅財政司司長曾俊華，斷估都包括李超人在內。
李超人都話唔可以單靠地產
不過，𠵱家坊間最熱門唔係鬍鬚曾，而係政務司司長林鄭月娥，大家都好想知李超人係咪都接受佢，可惜李超人對呢個人人有興趣嘅題目唔肯開金口，仲叫記者公道啲。茶友話唔講都係講，從佢唔講都得到啲眉目嘅。
唔講政治講經濟，李超人就口爽好多，由樓市到息口都講，當中有幾句精警嘢，嗒落真係有啲味。李超人講到樓市，就話長和唔可以淨係香港投資，亦只可以單靠地產。長和咁巨型，唔可以只投資香港，呢樣嘢唔係今日先講，但佢講唔可以單靠做地產就好少咁講。
中小地產股估值平
香港做銀行同地產係最好賺嘅生意，過去就算美英點唔好，本地銀行業都係咁好賺。近年多咗中資銀行搶生意，銀行已經無以前咁好做。過去兩年，內房商係咁南下投地，形成大陸幫同本地幫搶地，過去一年內房商屢次以高價擊敗本地幫，爭奪最激烈嘅戰場係啟德，繼海航連奪兩地後，嘉華（173）終於中番一幅啟德地，叫做替本地幫勝回一仗。
中環茶友話，嘉華上星期收市報3.62元，同近年高價6.5元差不多跌咗四成，佢主要持有銀娛（027）股份同房地產，由於濠賭股滑落，令佢股價都受壓，跌得比其他地產股多，但計番銀行𠵱家高低價跌幅同嘉華相差無幾。照計嘉華持有嘅銀娛雖然有跌，但佢手頭嘅房地產不斷升值，無理由股價會同銀娛一樣跌咁多，唯一解釋就係市場覺得本土地產商生意愈嚟愈難做，畀佢哋嘅估值低咗。睇番嘉華現價市盈率只有7.5倍，息率有4.5厘，資產折讓超過五成，數字相當抵買。
中石油創14個月新高
除咗暗示地產競爭大，李超人仲講到利息，佢估利息會起啲，但就無可能會升得多。好多人驚美國喺特朗普上台後，經濟政策會谷高通脹，大幅推高息口，但李超人就好明確咁話大幅加息幾乎係不可能，呢樣嘢對買股買樓都係好重要嘅參考。
美國經濟熱度高番，上周公佈原油庫存下降咗，加上沙特履行減產承諾，支持國際原油價格向好，呢排「三桶油」表現唔錯，中海油（883）上周五跌咗0.1%報9.95元；中石油（857）一度高見6.14元，創14個月新高，收升1.17%報6.04元，係三間公司中近日表現最佳者；中石化（386）升1.93%報收5.82元。
油股當炒，連帶油服股亦見資金流入，巨濤海洋（3303）急升13.16%報收0.86元；宏華（196）收升2.6%報0.79元；百勤油服（2178）漲4.26%收報0.49元；中海油服（2883）升2.04%報7.49元；安東油服（3337）升0.91%報1.11元。
搵到老闆照老巴剎鍾師傅開心晒
本地做食肆，現在最擔心唔係無生意，而係請唔到人！早排灣仔平民名店老巴剎因為老闆請唔到人，搞到老闆頂唔順話要收檔。好彩後來搵到財團入股，解決咗人手外，仲搬咗去灣仔交加里大搞。
老巴剎原本在灣仔道營業，生意一向唔錯，結果卻是老闆鍾師傅（Billy）因為請唔到人，日做夜做無得休息，周身病痛，成個人就快散咁滯，無奈計劃結業。後來消息傳出，有財團提出入股，仲應承負責安排人手，鍾師傅變相有大水喉射住，自己可以鬆一鬆，談起這番合作笑逐顏開。
大水喉射住裝修升呢
老巴剎賣嘅係雜牌菜，本土街頭美食炸大腸、廣東菜凍蟹肉菠菜，也有東南亞著名的海南雞飯。鍾師傅說香港是大都會，他的「煮意」來自不同菜系，總之好食就可以，但其中廣東和本土都佔相當比重。
𠵱家有大財團射住，平民小店都「骨子」咗，新場有貴賓房，仲整咗幅劉宇一嘅複製畫喺度。幅畫主角係內地一班開國元勳，土豪睇到會特別有味道。間舖格調高咗，賣嘅菜都加咗料，好似有道蟹肉菠菜，蟹肉是買新鮮大紅蟹做料，自然夠鮮甜，菠菜無渣就要控制好火候。另外有味羊肋骨，又係食材取勝，肋骨羔肉均勻，慢煮後肉質細嫰，吃時加大量鮮葱，微辛的葱粒配合羊肉，刺激食欲。如果有胃口可以再加小碗煲仔飯，應該會十分滿足，如果仲想食甜品，可以行過隔籬食番杯日本紫薯軟雪糕新地。
陸羽仁
回應 (0)
我要發表