捕捉真正特朗普概念股
2017/01/16 08:42:00 網誌分類: 經濟
喺呢輪反彈市中，石油股國際原油價格持續向好，係比較有勢的板塊，「三桶油」中，中石油(857)報6.28元；中石化(386)曾高見6.1元，收報6.09元，兩者先後創出一年高位。中海油(883)相對較弱，報9.96元，仍未重上10元關口。喺油價向好下，連帶油服股亦造好。
油價向好，外間嘅講法多數係以沙地為首嘅產油國同意咗減產，並且開始咗實行，加上美國經濟向好，拉動咗石油需求。有中環茶友問，即將上任嘅總統特朗普話會放寬開採石油限制，咁咪即係增加石油供應，咁油價點會升呢？呢樣嘢似乎亦唔符合將會上台執政嘅共和黨同油商友好嘅傳統，咁點解油股又會升呢？
奧巴馬犧牲油商利益
我話茶友只係睇到個別嘅表象，無睇到成個特朗普上台後成個嘅局。如果睇番過去20年，油價喺共和黨總統布殊執政嘅年代，基本上係高位運行，到咗民主黨總統奧巴馬上台，油價開始乏力下跌。導致兩個分別嘅原因，係奧巴馬對內放寬咗頁岩油開採嘅限制，令大量頁岩油隨着技術改進湧出市場，大幅增加供應。對外奧巴馬撤出中東之餘，同石油供應國關係總體走向和緩，近年最積極係國際市場賣油推低油價的伊朗，就係奧巴馬外交政策的產物。
新總統會益共和黨老友
奧巴馬推低油價造成的效果，是大幅降低咗能源成本，令美國企業慳咗錢，消費者亦多咗錢消費，成為改善經濟的動力。外交上能源價格急跌，使到美國視為最不友善的大國俄羅斯財政嚴重惡化。不過，美國油公司就成為呢個政策嘅犧牲者，由於佢哋唔係民主黨嘅忠實盟友，故此奧巴馬唔係咁關心。
特朗普雖然係政治初哥，不過佢唔單止是共和黨友，而且個人同油商友好。佢上台放寬採油限制，目的同奧巴馬增加供應唔同，你可以睇成佢係要益吓老友，減少油商開採限制，咁樣變相可以減低成本。特朗普一埋班，就已經邀請咗質疑地球暖化嘅人士入閣，對新能源嘅態度亦明顯轉淡。
國際上，從特朗普喺競選時對伊斯蘭的惡劣態度，未來美國嘅中東政策好有可能由奧巴馬時代的鴿派轉回鷹派，呢個亦係符合油商利益嘅政策。𠵱家伊朗因為同美國和解賣油賣得咁開心，但好有理由相信特朗普上台後，可能借頭借路推翻前朝嘅政策，重新對伊朗進行禁運，令到油價攀升，從呢個角度嚟睇，佢嘅政敵成日話佢同俄羅斯有路，佢嘅政策又真係有啲明益對家嘅感覺。所以𠵱家油價回升，除咗話油組減產外，更加重要可能係市場預見整個前景唔同咗。
聯盟關係凌駕總統個人
茶友跟住問，咁特朗普作風飄忽，上場後會有變，又或者被對手「隊冧」呢？其實，特朗普只係油商嘅利益代言人之一，成個共和黨同能源業嘅聯盟關係，根本凌駕咗係總統之上，就算總統冧咗檔，只要係共和黨執政，大勢都唔會有改變。
內地其實都深明美國呢個政治生態，所以喺奧巴馬執政期間，雖然油價大跌，熱錢又大力投資新能源業，令外界覺得油價跌不見底，但阿爺仲係趁油價低迷不斷增加石油儲備，正係佢明白油商喺美國利益集團根深柢固，始終唔可以唔預佢有回朝嘅一日，所以如果要搵真正有特朗普概念嘅股票，油股應該係其中一種。我話油股有概念，但唔係叫大家即刻瞓身去買，較安全做法係等佢回吐收集，中線儲下貨。
至於「三桶油」中，本來中海油係上游開發商，受惠油價最直接，但佢喺能源資產高昂時買咗唔少貴嘢，搞到要成日打官司，形成心理影響，反而有做上游又有做下游的中石油，就以業務平均暫時領先啲。呢幾隻股份同埋石油服務股累積升幅唔小，若然個市調整，佢哋都可能要跌跌，屆時就可以考慮分段入貨。
另外，有報道話融創集團將會動用150億人民幣入股樂視。融創集團主席孫宏斌向以進取見稱，近年他改變勇猛投地的策略，改為大舉併購，早前已在股市併購內房股的主要股權，似要成為大股東。今次佢進軍新經濟，可見內地大款策略多變，比起本地財團強調穩陣的做法，係十足十的搏殺格。
港鐵新線變金礦馬主席風騷親整雞蛋仔
港鐵最近消息多多，上個星期突然宣布推出港島南區估值百億元的地王招標，這是繼早前何文田線以高價批給高銀國際後，另一豬籠入水之作。財源滾滾來，難怪主席馬時亨揚言，未來一年無乜計劃轉變身份。
做筍位唔入熱廚房
馬主席早前舉行全羊宴，邀請友好把酒言歡，論盡時事。當日遇上政務司司長林鄭月娥呈辭備選特首，媒體出席者有到無缺席，全場依然爆滿，目的之一當然是想問問縱橫政商界的馬主席有乜高見，包括佢有無興趣做財爺甚至做吓特首黑馬，佢就笑言，自己不飲奶粉，又怕薯片熱片，妙語如珠。中環茶友話，做慣乞兒懶做官，何況港鐵主席呢個筍位，淨係賣地收入都收到手軟，呢個世界有錢有資源就好辦事，何必走入熱廚房攞苦嚟辛！
港鐵開咗新線等如開咗新金礦，係咁環境，今年全羊宴整夠三隻，寓意三陽啟泰。以靚羊作為主菜外，還有即製雞蛋仔做甜品，而且擺檔者不是無名小輩，而是在筲箕灣地鐵站外的「大街小食低調高手」。這家小店多年前開業，不久即大受歡迎，經常大排長龍。店主經常戴上口罩潛心做雞蛋仔，今次除了癡等美食外，還難得見到他的盧山真面目。主席好貼地咁話，雞蛋仔是他心頭好，佢知道北角有檔好出名嘅雞蛋仔，原來筲其灣站外仲有一檔好嘢，佢自爆試過買過烘焙機回家自製，可惜蛋漿做得不夠好，所以當晚實行以行動支持雞蛋仔，落場和檔主合製一底請客，順便一圓心願。
陸羽仁
回應 (0)
我要發表