太早棄胡易出
2017/01/23 08:42:19 網誌分類: 經濟
特朗普耶倫隨時惡鬥
今年係2017年，過去逢7必災，加上仲有個狂人總統特朗普上台，玄學大師蔡伯勵話雞年流年經濟?況係財多身子弱，有錢都唔好執，即係話預期市場會大起大跌。中環茶友話，睇番特朗普未上任，就已經同聯邦儲備局主席耶倫口角，熱身運動已經咁樣，未來幾個月大家都要學吓點適應。
上個星期，耶倫兩度評論經濟前景，頭一次鷹味幾濃，以見到總統同央行行長意見好唔同。佢話美國失業率跌至接近全民就業，通脹亦升近目標，未來美息可能會加快調升，呢個講法對美元匯價有利，同時與特朗普打開口牌，話覺得美元太高明顯唔同。第二場演說就有啲降溫，略為淡化兩日前撐儲局加息的立場，強調，坐視經濟持續過熱，既有風險亦不明智；但鑑於當前全球增長前景不明朗，美國生產力增長正在放緩，加上華府的財政政策將出現轉變，要為確保充分就業及通脹朝向2%回升這兩大目標定出合適的加息路徑，殊非易事，未來緊縮貨幣之路須緩慢而行，認為這樣做最有利美國經濟。
傳統上，聯儲局主席有獨立制訂利率政策，不受政治干預的傳統，總統亦好少會直接開口品評匯價，但特朗普當呢啲潛規則無到，未上任已經出口術話美元太高，搞到美元在上周一度急跌。總統咁樣去干預匯市，直情撈埋財長同儲局主席一職，可見佢好唔妥耶倫，耶倫坐得呢個位亦唔簡單，一手軟、一手硬，同呢個狂人老闆周旋。
女強人呢排唔順景
茶友話，如果特朗普維持呢個作風，繼續做匯市評論員，肯定令財金官員好唔LIKE，雙方關係持續緊張。如果耶倫講得出做得到，真係加快加息步伐，相信特朗普好快就可能會開口鬧耶倫，甚至炒咗佢，另一方面，若果特朗普迫得太緊耶倫都會覺得呢個老闆好難服侍，你唔炒佢佢都可能會劈炮唔撈。
近年，女性喺政經界大出風頭，搶佔唔少重要崗位，不過去到上年尾情況有啲改變，首先係最有可能成為美國首位女總統嘅希拉莉大熱倒灶，跟住到南韓總統朴謹蕙因為閨密干政要下台，今年德國總理默克爾大選前景都唔係咁樂觀，仲有英國首相文翠珊提出硬脫鈎，處境開始有啲險象環生。茶友講到呢個男總統與女央行行長火併嘅講法聽起嚟雖然有啲誇張，亦反映咗喺美國有個話要同俄羅斯攬頭攬頸嘅總統，乜都可能發生。
等執雞不如回歸基本步
茶友講到環境咁惡劣，好唔鍾意特朗普嘅大炒家索羅斯仲講到佢會搞到市場大亂，失敗收場，咁係咪覺得會爆股災呢？佢話，股災只會係無人預期情況下發生，如果人人識驚，咁股災就唔會嚟。𠵱家美股咁高，大家都驚佢跌，股災反而唔會發生，當大家見個市無事，落場去炒時，股災先會出現，既然𠵱家個個驚特朗普上場個市會跌，咁佢反而唔驚，到個市升到咁上下，大家覺得無事，股災先至出現。佢嘅策略係好多人觀望，揸住現金等執雞，佢就唔會離場，甚至趁個市回調再買啲，寧願先冒吓險，等佢升高啲先減磅。
茶友話，今年個市都市暗藏危機，佢唔會訂個好高嘅預期目標，如果用打牌比喻，佢唔會博食爆棚，有兩番、三番都已經唔錯。不過個市雖然危機，但驚得太早未必係好事，正如人哋做緊牌，你太早扣牌唔食胡，搞到成手生章，最後反而會出銃。
茶友做咗咁多分析，你唔可以話無根據，但有時市場嘅嘢諗得太多，不如回歸基本步，睇番經濟面。正路嚟講，美股𠵱家係處於經濟回升初中段，雖然利息略升，但復甦動力足以抵銷融資成本，股市升勢正常計仲可以維持一段時間，所以就算擔心狂人總統搞跌市，都唔會清倉沽到一股都無，以防佢冧市前先來一段老牛衝刺。
薯片叔叔有來頭美式包裝成功示範
「國以民為本、民以食為天」，城中鬧哄哄的特首選舉都離不開講食。現今落場馬仔中，大熱與黑馬分別係前政務司司長林鄭月娥、前財政司司長曾俊華，其他人等恐怕連陪跑都無機會。中環茶友話，兩個人前者叫薯片叔叔，後者叫奶粉，參選後仲去飲奶茶，有食有飲，合晒中國人嘅口味。
好多人唔明白鬍鬚曾點解叫做薯片叔叔，查實呢個係因為佢個外形同品客（PRINGLES）薯片嘅卡通商標好似。鬍鬚作風洋化，鍾意飲咖啡睇法國電影，呢個品牌都係外國貨，早喺1967年推出，早幾年被美國家樂氏以逾200億港元收購，確係身價唔少。
唔好睇呢雙薯片好普通，佢嘅最大特色係佢嘅美式包裝。PRINGLES包裝最大突破係採用厚片波浪造型來增加口感，出廠時用咗長筒罐狀包裝以避免壓碎薯片。這種特殊包裝是由寶潔從事食品研發嘅專家FredricJ.Baur所發明。由於呢個包裝太過成功，所以佢喺死後，都要求將骨灰放入自己發明薯片筒中。
算唔算薯片有得拗
薯片叔叔雖然包裝係薯片，但亦曾經發生過佢唔認係薯片嘅故仔。由於英國對薯片要徵稅，所以生產商係2008年向法院要求澄清佢唔係薯片，原因係佢嘅成份只有42係薯片，其餘係小麥、米粉等，所以應該唔使畀薯片稅，呢個講法仲俾一度法院接納咗，不過講到錢，稅局當然打到終審都要打官司，最後終於成功要生產商畀稅，所以佢係咪薯片？大家千祈唔好俾包裝呃咗呀！
陸羽仁
回應 (0)
我要發表