又係特朗普效應
2017/02/06 08:43:57 網誌分類: 經濟
不過去到美股收市又係另一番光景，總統特朗普上任後猛簽行政命令，政治上搞到滿城風雨，不過上周五佢又找數，簽署行政命令要求檢討○八年金融危機後制訂的《多德──法蘭克》金融改革法案，雖未有具體細節，但政府意圖放鬆金融監管足以舞起金融股，加上非農業職位增長加速，帶挈美股一掃弱勢。杜指收市爆升186點，創兩個月最勁，重上兩萬點，收報20071點。標指和納指分別高收16點和30點。
林鄭特首行情熱
陸羽仁係舊經濟人，對銀行呢啲傳統大行業有利。喺佢大筆一揮下，金融股成上周五升市火車頭，高盛收市漲4.5%，收復今年以來失地之餘，仲幫杜指貢獻約72點升幅；摩根士丹利、富國銀行和美國銀行分別漲5.4%、2.7%和2.5%。如果只係計標指七大金融股包括大摩和高盛等，上周五單日市值共漲354億美元（約2761億港元），香港嘅金融股自去年第四季轉勢，恒生（011）創咗多年高位，中銀香港（2388）、匯控（05）同渣打（2888）都造好。呢啲大股對恒指都有支撐作用，今日睇嚟有機會帶動港股止跌。
新春過後，特首提名戰開打，呢個時間各方人等都開出條件或考題，睇吓參選人點答，個別答案都可能影響到投資。好似有市民就重提前政務司司長林鄭月娥嘅民生三座大山──即係領展（823）、港鐵（066）同強積金收費，向最有機會贏出呢次選舉嘅林鄭提出訴求，要求增建街市。
領展大賣廣告抗逆風
林鄭提出領展係三座大出嘅講法，對佢嘅民望好有幫助，喺呢次選舉佢會唔會打呢隻牌不得而知。領展係房託基金，管理層係專業人士，牌面睇佢哋唔識政治，如果唔係唔會被人砌成咁，而且手頭又無乜票，所以與世無爭嘅曾俊華上台對佢有利啲。有人話，政府𠵱家都無地，咁點可以打擊到領展先？呢個講法有幾啱，就要睇政府有幾認真，如果領展真係唔怕政府，又會唔會係呢排大賣廣告，出晒導盲犬嚟大賣溫情先？
起商廈遇供應暴增
下任特首係咪可以搞到領展，要等上台至知，不過中環茶友話，現屆特首至少有樣嘢，就擊中領展嘞。領展前身係做政府商場、街市同車位為主，但呢兩年主動出擊，試過北上買物業，結果撞正人民幣貶值，好快就叫停咗，另外就係投地起商廈。領展投地起商廈，包括喺觀塘嘅項目，另外又買入舊物業翻新，但呢個財政年度，政府係咁推商業用地，有人估計未來幾年就係落成嘅高峰期，其中九龍會係重災區。睇番𠵱家好多大發展商，喺觀塘起商廈都係成幢咁賣畀中資，領展可能都要考慮吓咁做，如果唔係可能有排捱平租。
大摩早前嘅報告就指出，預計香港住宅價格今年或跌5%，同時零售地產租金亦下降5%，大摩對本港的樓市預測，為自2008年以來首次下跌，原因係利率攀升將推動實際按揭利率升至正值區間，過剩的供應開始接近需求，惟打壓樓價的監管風險依然存在。不過，該行話係芸芸地產股中，已經係睇得領展比較好。
至於本地地產股方面，大摩將地產股的評級從「有吸引力」下調至「與大市同步」。
美息若升股價難頂
將領展當成三座大山嘅林鄭成為下任特首大熱門，坐擁過十張選委票嘅九倉（004）首席顧問、全國政協常委吳光正表明會提名林鄭月娥，仲話埋九倉及會德豐旗下的選委都會提名她。吳光正話，林鄭唔係社會主義者，而是社會關懷者，唔認為她是梁振英2.0。地產商有人話支持林鄭，但係咪代表佢嘅三座大山論已經唔存在呢？特首下屆換人勢在必行，至於會唔會增加咗領展嘅政治風險，仲要睇吓選舉嘅結果同新特首嘅政府。陸羽仁對於呢間公司嘅睇法就簡單啲，覺得管理層做咗咁多嘢，但都仲係擺唔到佢係收息工具、受利率變化嘅特色。睇番過去一年幾佢嘅表現，最差係美國喺2015年底加息後，當時市場估計息未來仲會上調，佢嘅股價一度插穿50元，直至英國脫歐，息口暫時停止上升，佢嘅股價先上番，最高仲彈到56。喺呢幾個月美息向上，佢嘅股價又開始受壓，上周收番52.9元，按照過去嘅牌路，如果未來美息有機會上調，領展股價都似係易跌難升嘅格局。
中銀香港股價勁百周年惹派紅利憧憬
新年大小企業搞團拜，中銀香港上個星期就由總裁岳毅率領在中銀大廈主持新春團拜，仲安排咗三頭醒獅表演。在猴年中銀香港股價強勁，有人統計過係藍籌股中升幅最高，今年股東自然期望會陸續有佳音。
呢兩年嚟香港做老總的岳毅係團拜時話，2017年係香港回歸祖國20周年，同時係中國銀行在港服務100周年的喜慶日子。雖然今年外部經營環境依然複雜，但公司對前景充滿信心：國家「一帶一路」戰略深入實施使得香港超級聯繫人的地位更加凸顯；人民幣加入SDR為我們帶來廣闊的業務商機；國家惠港、挺港政策形成一個個利好因素；中銀香港向區域性銀行轉型拓寬了發展空間。
售產套現轉戰東南亞
岳老總咁講唔係門面話，呢兩年中銀香港出售南商同集友股權，套現不少資金，會用來投資東南亞，早前集團已收購馬來西亞中國銀行及於汶萊開設分行，同埋收購咗中銀泰國。
泰國是東南亞第二大經濟體，發展潛力巨大，是中國銀行集團戰略發展的重要區域之一。近年來，泰國政府推出了多項措施，促進經濟發展，吸引海外投資，尤其泰國去年新皇登基，佢父親浦眉蓬備受人民愛戴，大家對佢嘅能力有啲半信半疑，實質普密逢離世前已經病咗好多年，令泰國陷入政經停頓狀態，新皇為咗證明自己，準備大展拳腳。所以係東南亞投資，回報應該好啲。不過，除咗收購同發展，小股東當然仲希望今年百周年會有紅利派吓啦。
陸羽仁
回應 (0)
我要發表