總統亂咁舞 美股都會升
2017/02/13 08:41:45 網誌分類: 經濟
美國股市就繼續發威，總統特朗普的稅制改革消息再推升股市，市場憧憬減稅，三大指數再次升上新高。道瓊斯指數收報20,259點，升96點；納斯達克指收報5,734點，升18點；標普500指數收報2,316點，升8點，納指連續4天創收市新高。一周總結，道指整周累積升幅達1％，納指升1.2％，標普500指數升0.8％。
國力高踞全球第一
港股造好一來係受益於美國係兩萬點破關再上，二來係有內地游資係香港買吓嘢，特別係一啲落後嘅內資股。睇番個市成交慢慢增加，市底唔係咁差，上個星期內地公布外匯儲備跌破四萬億美元，但人仔匯價頂住無跌，個市亦都無受壞消息影響，反映咗大戶想係第一季就開餐食，炒業績公布食咗胡先，如果係咁今年上半年個市有可能會先高後低，如果投資者驚跌市開頭唔敢買，到忍唔住手遲啲追入，咁就隨時接火棒。
全球股市係特朗普上台後炒上，上個星期市場開始炒佢會唔會推動稅務改革，令美資放係海外嘅錢調返本土，佢呢個建議若然實行，咁對美國經濟有利，但被抽走資金嘅國家就麻煩。不過，特朗普想跨國公司調錢返本土投資，但咁樣可能令到美元轉強，不符合佢想美元弱哋嘅策略。
有政經背景都猛料嘅中環茶友形容，美國係過去十年休養生息，而家國力堪稱全球最強，無論係經濟、科技、軍事、政治都係實力第一，幾乎係自1776年立國二百幾年以來最強盛，係咁環境下，就算特朗普短期點樣亂舞，都無阻美股嘅升勢。共和黨作風一向係大花筒，上台之初必然有利經濟，所以特朗普由上台開始，佢已經唔覺得呢隻係股市黑天鵝要驚。
股神話美國經濟有秘方
抱持呢個觀點嘅唔止中環茶友，「股神」巴菲特(WarrenBuffett)係競選嘅時候罕有咁表態力插特朗普，質疑佢拒絕公開報稅表。不過，特朗普勝出並無影響佢睇好美國股市之心，佢早前係PBS嘅清談節目中透露，在特朗普當選美國總統以來，為自己嘅公司巴郡(BerkshireHathawayInc.)買入總值120億美元的股票，相等於他在截至去年9月底3年內買入股票總值約一半。係另一個場合，佢又為特朗普執政照睇好的觀點解話，聲稱美國有「秘方」（secretsauce），就算有時出現波折，但達到的成就一個接一個里程碑。自己不知道股市未來十天或者一兩年表示，但知道今後十年、二十年會造好。同樣，經濟縱偶有逆境，長遠來看表現會良好。
好多人怕美股位高勢危，超級大戶就唔係咁睇。至於美股向好，港股就好難講係咪可以跟到足，皆因中國會多咗中國因素，會受資金流向嘅影響。總之短期嚟講，如果美股好，人仔又穩定，咁港股都會有得炒吓。睇番過年前後，大市主要係輪流炒，炒一浸鋼鐵股、又炒一浸石油股，上個星期就開始炒埋落後嘅內險股同券商股，跟住炒到內房股，到周五收市，借住中國1月出口增16%，優於市場預期，航運股個別炒起，中外運航運(368)升咗4.8%報1.74元；中遠海控(1919)升3%報3.41元。部分港口股亦造好，大連港(2880)升3.6%報1.45元；廈門港務(3378)升3.2%報1.62元；招商局港口(144)升2.8%報22.05元；秦港(3369)收升2.13%報1.92元，航運同港口股唔係有乜好性感嘅概念，只係價位大落後，勝在夠平。
港股跟炒偏好內資股
睇嚟資金暫時係對內資股有偏好，於是搵到平嘅就炒吓，估計炒到咁上下，有可能又係炒吓股仔先收檔。投資者不妨留意吓有乜國策，好似內地傳媒引述中國環保部指，國務院多部門聯合啟動水泥玻璃行業淘汰落後產能專項督查，督查將於2017年2月12日至2月22日開展，將由部級領導帶隊分為8個督查組，對全國31個省(區、市)和新疆的水泥玻璃行業淘汰落後產能情況進行專項督查，咁水泥同玻璃股又會唔會炒作吓呢？
恒基副主席歌藝驚四座《我的太陽》有來頭
近日地產界花邊新聞，熱門是恒基集團執行董事孫國林在大年初七就在四季酒店擺七十大壽，當日恒基副主席林高演開金口，上台高歌藝術歌曲《我的太陽》。為了今次表現，林博士練了這首名曲兩個月，已有「爆咪」效果。有中環茶友爆料，話十幾年前澳門回歸，就預備了這首《我的太陽》娛賓，結果大獲出席的國家最高領導人欣賞。
四叔好橋教跳槽
孫國林係四叔李兆基愛將，負責幫他成立物業管理公司，不要小看物管公司唔起眼，呢門仍後現金生意，投入小回報高，真係搵咗錢無人知，此所以孫董七十歲係四季擺咗幾十圍，仲講明懇辭賀禮自己付鈔。雖然其他人唔收禮，但林高演送嘅一個黃金大壽桃佢就唔敢唔收，皆因林高演是他的伯樂，大力游說他過檔幫四叔，埋門一腳仲要出動四叔見一見。兩人當年相約低調見面，四叔仲出埋好橋，話孫董唔好意思向舊老闆請辭，可以先去移民，然後先再回港偶遇，促成過檔，就係咁佢就過咗恒基。
孫董話，四叔係好老闆，有好嘢會明益佢，好似多年前四叔睇好碧桂園，叫佢買股之餘仲寫包單，如果有蝕包賠，有咁嘅筍盤佢當然唔怕殺上，結果大有斬獲。
陸羽仁
回應 (0)
我要發表