匯控回購有辣有唔辣
2017/02/20 10:12:34 網誌分類: 經濟
美國聯儲局主席耶倫明示加息不能拖，令本來三月份唔係咁高嘅加息機會，𠵱家變咗不能排除，有小小意料之外係，加息變成好消息炒，資金湧向銀行股，無論跨國銀行、本地銀行同內銀都有表現。即將宣佈業績嘅匯控（005）衝上一月高價，上周五個市雖然回調，但佢仍能逆市企穩。
環境改善留子彈有用處
匯控股價上年都幾Chok，英國脫歐令人驚總部設係倫敦嘅大笨象會中招，股價插落44.5元，現價由低位回升接近五成。匯控股價喺過去10年都唔靚仔，記得佢喺2007年次按危機前，股價已經停滯不前，當前好多唔係咁炒作，買股當長期投資收息嘅粉絲，都鍾意買匯控，當年陸羽仁叫人唔好買匯控，真係叫到牙都軟。點解匯控當年會咁，好簡單係因為佢喺美國做按揭業務嘅公司信貸質素不斷轉壞，大戶識嘢不斷沽貨減持，所以貪高息嘅散戶接貨愈接愈低。後來金融危機爆發，匯控要靠股東揼水先渡過到難關，但金融危機嘅後遺症令美國大力收緊監管，銀行經營困難兼成本上升，加上美國利率低處未算低，令息差收窄，好彩佢有香港業務頂住，先至撐得落去。
要防借添食落空回吐
匯控股價去年下半年大翻身，轉捩點係佢宣佈回購股份，佢回購令市場流通嘅股份減少，自然有利供求。當回購完成後，匯控股價一度停步，上個星期佢升番，好大可能係市場憧憬佢喺呢期業績公佈再提出回購。對於佢係咪再回購，中環茶友有另一個睇法，佢話若然匯控再提回購，咁當然有利短期股價，但中長線嚟講，管理層要諗股價已經高咗，仲係咪應該用資金去買股；再者，係𠵱家特朗普簽咗行政命令放寬銀行業監管，如果行業前景有改善，啲錢唔買番自己嘅股票，用嚟擴大投資會唔會仲好？匯控喺惡劣嘅監管環境下，近一、兩年賣咗唔少資產，如果未來環境好番，咁佢就應該考慮係咪留番多啲彈藥嚟做生意，所以市場呢排開始傳佢有啲併購就係咁解，有心買大笨象嘅投資者，着眼點應該放喺未來佢生意嘅環境，而唔係只專注係股權結構嘅操作。
由於匯控如果揭盅無回購，對前景可能係好事，但短期股價可能會受壓，所以想買匯控嘅投資者要留意。
除咗回購計劃，市場預期佢去年嘅成績表，列帳基準除稅前盈利介乎127.7億至143.5億美元，按年減少24%至32.3%，其中德銀預計匯控稅前盈利131.7億元，下跌約30%，預計第4季稅前盈利有望由虧轉盈，賺26.2億美元。高盛則料匯控去年列帳基準除稅前利潤132.34億美元，按年跌29.9%，估計淨利息收入按年跌8.3%，至298.42億美元；非利息收入按年跌近10%，至227.33億美元。
東亞有運業績差遇升市
匯控今個星期派成績表，一向打頭陣嘅東亞銀行（023）上星期就宣佈股東應佔溢利37.23億元，按年倒退32.58%，少賺之餘仲削派息，結果股價插咗4%，報33.1元，為周五跌幅最大藍籌。中環茶友話，東亞都算有運行，宣佈壞業績撞正個市升，大大抵銷咗負面效應，如果唔係股價應該插得仲勁。佢去年減咗11%人手，又為內地貸款撥咗好多壞帳，洗咗一次太平地，咁反而有利佢重新上路都話唔定。
瘦田多人爭電視廣播小股東最開心
瘦田無人耕、耕開有人爭，鮮活例子係電視廣播（511）。佢之前宣佈回購計劃，大股東肯出溢價買股，小股東本來已經笑晒，點知跟住仲有買家話只要唔回購，佢就會出價收購，搞到回購會加價，跟住又有揸住逾14%的基金話反對集團的回購計劃，並建議將集團現有的42億元現金，派特別股息回饋股東，條件似乎愈嚟愈筍。
電視廣播提高回購價格，以回應聲稱有意提出收購嘅傳奇影業，但公司原有嘅基金股東就食住上。持有TVB逾14%的第二大股東Silchester公開回購計劃，索性建議派發特別股息。Silchester表示，擔心大股東藉回購擴大對集團的控制權，並指若回購目的是回饋股東，簡單的做法是直接派發特別息。
派特息方案最吸引
呢個大戶股東話，回購不如以現有逾42億元現金，以特別股息派發。電視廣播肯回購，小股東已經飲得杯落，𠵱家有人搶親，又有人話要派糖，講真大戶股東嘅講法又真係着數啲，因為收完息仲可以揸番住隻股嘛。不過，就算公司唔實行，小股東都可以沽啲留啲，咁樣益咗大股東增持，但小股東都照收到錢，計落都好乜都無，總之，愈來大戶落場爭，個PARTY愈熱鬧，小股東就愈着數。
陸羽仁
回應 (0)
我要發表