港鐵熱飯唔得熱食
2017/02/27 08:41:48 網誌分類: 經濟
內房投地王貴買貴賣
上個星期消息唔少，好似反映本港二手樓市走勢的中原城市領先指數CCL最新報147.74點，創歷史新高，按周升0.62%，較2015年9月的歷史高位高出0.56%或0.82點。同日另一個轟動消息係，鴨脷洲利南道地皮由龍光地產（3380）及合景泰富（1813）的合資公司，以168.6億元力壓其他13組財團投得，高出市場估值上限近48%，是近四年來首幅百億地王。今次計落條數，每平方呎樓面地價約22118元，麵粉價貴過麵包價好多。
市場原本對地皮估值介乎91.4億元至114.3億元，折合每呎樓面地價1.2萬元至1.5萬元，呢塊地前身係駕駛學院，最底三層規定作商業用途。地皮距離港鐵海怡半島站要十分鐘路程，可建樓面面積約76.2萬平方呎，先前估計係提供約1420個單位，截標接獲14份標書，基本上係巨星雲集。中標嘅財團係內房商，其中龍光（3380）係香港人腦海中可能無印象，但係內地佢就以出價勇猛見稱。係地王標價揭盅後，市場人士就估發展商會變招，興建洋房及中、低密度住宅項目，實用呎價有望挑戰6萬元。仲話得主雖然是內地發展商，但樓宇質素不一定較傳統發展商遜色，內地市場龐大，銷售渠道廣泛，根本唔擔心市場無承接，認為呎價上望6萬元不足為奇。
龍光地產1996年由紀海鵬成立，2013年嚟咗香港掛牌，若講規模佢唔係最大嘅公司，但就成日以天價搶地王，所以有人叫佢做「地王殺手」，去年六月，深圳光明新區拍賣約15萬平方米的商住地，經過一個半小時的爭奪，最終龍光地產以總價140.6億元擊敗不少大財團奪得該地塊，成為深圳新的「總價地王」。龍光地產相關負責人表示，由於當時在香港上市的龍光地產，其總市值僅為150億港元，卻跑去蛇吞象搶地地王，已令人對其進取態度和資金鏈大為關注。呢排內房股升咗，佢市值去到180億元，諗唔到佢跟手就投塊香港地王。
地王股好難買得落手
龍光地產過去做得最多係深樓盤，管理層早前已經透露，去年多次在港競投港鐵（066）地皮不果，由於看好香港樓市前景，適合內房企業作為海外佈局的落腳點，因此該公司會再接再厲，在港物色合適的投資項目。佢仲聲稱，龍光目前在深圳土地儲備貨值超過2100億元，足夠未來5年發展，由於當地有限制一手樓售價，會相應放慢推盤速度，可見佢好勇咁投地，絕對唔係一時衝動。
呢次鴨脷洲嘅地皮賣到天價，叫大家追入得主嘅股份，相信都無乜人有興趣。有精叻嘅中環茶友話，睇番今年預算案，除咗政府賣地多，港鐵都唔少喎，而家啲地咁值錢，咁係咪可以追入港鐵呢？茶友呢招兜底食胡概念唔錯，陸羽仁要補充嘅就係港鐵有好項目在手，要記住就係「熱飯唔得熱食」，意思係港鐵會受惠於樓價攀升，至於幾時食得落口，就要睇佢賣樓同落成嘅速度，而唔係招標同賣地嘅時間。
賣樓收益唔會咁快回籠
如果有留意，呢屆政府未上場時，當局推地唔係咁積極，港鐵揸住手頭嘅項目更係「慢慢搣」，後來呢屆政府登場打晒開口牌，叫港鐵加快批地，佢先開始踩油。按照批地同起樓嘅速度，呢兩年港鐵賣樓收益唔會好突出，加上其他生意好似商舖、廣告收入增長放慢，盈利未必可以勁升，條數想靚可能要兩、三年賣樓收益回升先至顯現。當然，港鐵係好多人嘅愛股，佢條數好多人都識睇，所以投地價高對港鐵有利，但就唔使太「猴擒」。
太子飯堂食好嘢夠薑夠辣一試難忘
太子鐘錶珠寶老闆鄧鉅明伉儷一向識做生意，搞咗個會所經常請班貴客同富二代去品酒、賞表。
賞表食飯歎世界
早排，太子就為一個品牌搞咗個私人表展，仲請咗中環茶友去開吓眼界，實行賞表食飯歎世界。佢呢個品牌以星河概念打造，同時採用陀飛輪技術。這個系列機件由鋼、鈦等不同金屬打造，手工要經過精密計算，最貴重是當中代表地球的配件，由原本四卡的鑽石，多面切割成一卡的球體，令光采可以四方折射。呢隻表身價雖然接近八位數字，聽聞展出後已有收藏家買咗幾隻。
睇表之餘，茶友仲食埋靚嘢，除了鮑魚花膠外，當中有味聞名「辣子雞」。呢度嘅辣子雞特別注重肉質，她就要求用口感鮮美的三黄雞，爆香的雞肉入口軟綿，脆辣之餘，不會因為炸得太乾變硬。食完辣雞如果未夠，仲有味薑汁湯丸，呢個甜品嘅精華唔係湯丸，而係糖水，夠晒薑味。做生意要夠辣又夠薑，唔知係咪咁，好多人都一食難忘。食完咁多好嘢，你話茶友好唔好意思唔幫襯吓呢？
陸羽仁
回應 (0)
我要發表