華資投地少被夾倉
2017/03/06 08:41:59 網誌分類: 經濟
兩會開幕，總理李克強透露內地去年經濟增長6.7%。今年經濟增長目標下調至6.5%左右，低於去年6.5至7%的目標，通脹率目標3%左右。做好今年政府工作，要把握好以下幾點：貫徹穩中求進工作總基調，保持戰略定力；堅持以推進供給側結構性改革為主線；適度擴大總需求並提高有效性；依靠創新推動新舊動能轉換和結構優化升級，和着力解決人民群眾普遍關心的突出問題。
講完宏觀嘢，跟住就會有措施陸續出台，好似市場憧憬兩會後或有更多支持環保的政策出台，加上內地周五表示將支持鋰電池發展，相關概念股造好，汽車及零部件股的新晨動力（1148）單日就升咗6.4%報1.49元；天能動力（819）漲5.8%報7.49元，估計炒家會陸續發掘呢類題材。
有中環茶友講開，三月份股市開局麻麻，完全跟唔上美股嘅強勢。港股唔夠力，同美國係三月份加息機會大增好有關係。美國加息即係美元強，咁對香港做生意不利，同時可能再誘發人民幣匯價嘅憂慮，加上地產股佔港股比重唔細，息口一旦上調，恒指難免添壓。
美息向上，本來對樓市都係壞消息，奇怪係股市唔升，樓市就風光獨好，多個發展商乘機推出新盤之餘，二手樓都接連破頂，搞到樓價指數再創新高，股市明燈轉軚睇好。樓市突然呈現癲升異象，全因內地資金湧港，接連以天價投到兩塊港島大地皮，唔少市民因此覺得樓價無得跌，連新鴻基地產主席郭炳聯都頂唔順，話人哋係出「癲價」。大地產都咁嘅反應，等緊上車嘅小市民又點會唔擔心上唔到車？
平唔想買貴唔敢買
華資大龍頭睇樓市，一向都係淡定有錢剩，如今都忍唔住出聲贈對手兩句。茶友笑言，佢哋咁噪底，皆因有小小俾人夾倉嘅味道。睇番自梁振英上台做特首，佢哋就唔係好肯投地，無論係港人港地、被人覆核嘅綠化地，絕大部份都係被內房過江龍買咗，用番而家嘅眼光睇，呢啲地就算好平。之後地價係2015年差不多最低，當時同而家比差唔多升咗一倍，可惜華資大地產商好多都無郁手，反而係俾啲本地中、小型發展商執咗，到咗2016年內地樓市好番，內房商銀彈增加，爭相南下，華資地產商平嘅時候唔想買，貴嘅時候唔敢買，結果地價愈搶愈高，到而家有小小被人迫倉嘅味道。
奉行「肉不正不食」
香港地唔係咁夠，投地價狹路相逢勇者勝。茶友話佢最服就係會德豐（020），公司由第三代上場做主席，搵咗老行尊梁志堅揸旗投地，住宅又買，寫字樓又買，最經典係將軍澳連掃七塊地，最後俾佢趕過新地（016）成為區內最大業主。堅叔夠膽博，起碼而家就做咗大贏家。
地價去到而家咁高，茶友坦言邊個笑到最後好難講。不過，無論點都好，以後本地樓市嘅生態好大機會改變咗，幾間華資龍頭圍埋自己食好嘢嘅日子可能已經過去。同內房商投地嘅態度相比，本地龍頭地產商心態係「肉不正不食」，稍有瑕疵嘅地佢哋未必有興趣，所以港人港地、覆核地佢哋唔會投，投地之後又要賺到盡，所以一個項目要賺幾成以至翻倍。香港地產商要穩陣，做生意唔敢用太多槓桿，借小小錢又想維持資金回報率，咁計數就要食暴利，咁搞法又點夠內地做慣微利嘅內房商爭。
壟斷土地缺口被打破
?家美國利息話會快加，而且唔知加幾多，咁環境撞正住宅供應持續增加，買家係咪要因為見到內房商湧入嚟高價投地就急急入市，真係要三思。不過，就算未來兩年就算美息加得多，樓價回調搞到高價投地嘅內房商損晒手，都唔代表本地發展商可以過番從前嘅好日子，皆因市場嘅缺口打開咗，佢哋壟斷主要土地同住宅供應嘅狀況扭轉咗，就算一批內房商死咗，內地仲有第二批、第三批…內房商排緊隊嚟投地起樓，食慣歎慣嘅香港管理階層，可能都要早啲練定跑山嘞。
春茗最怕菜式多信興奉行簡而精
過完年一段時間，春茗食得七七八八，不少茶友呢兩日要相約行山減肥。呢排食春茗，有茶友話食到驚，特別係去食有一百幾十圍，係大展覽廳擺嘅傳統嘅中菜筵席，連甜品食足十味八味，隨時食足幾個鐘，若然再加插埋演講同助慶節目，真係天光食到天黑。早個星期佢去咗信興嘅飯局，就真係簡而精，因為菜式六個左右，食個零鐘頭搞掂，真係賓主皆便。
去信興食飯，當然要有舊老闆蒙民偉款客多年嘅蒙氏咖喱，呢味菜係佢係日本時學返嚟，到咗第二代再改良，除咗傳統嘅咖喱牛腩，仲有咖喱蘑菇，配萬元電飯煲煮出來的靚飯。
蒙氏咖喱特色是不用椰奶，香料味益顯突出。兩款咖喱都好惹味，牛腩味道濃郁，加上香軟薯仔，吃後感覺充滿能量；蘑菇香濃清新，入口帶甜，最可惜係無落薯仔，少咗啲口感。以前信興過年後會係港大校長嘅校園擺自助餐，係陽光同草地下歎咖喱，真係輕鬆自由，不過自從徐立之無做校長，就好似不彈此調。
陸羽仁
回應 (0)
我要發表