買股最怕上錯船
2017/03/13 10:11:57 網誌分類: 經濟
內房股炒不停
內房呢期業績同股價俱佳，相比之下，本港地產股業績都唔差，但升幅就無咁勁。上個星期九倉系宣佈業績，九倉（004）賺成200億元，會德豐（040）都有強勁增長，兩者股價大幅爆上，後者仲創咗多年新高，只不過因為同一時間佢哋話考慮唔玩有線寬頻（1097），搶晒外界視線，少咗人講佢哋嘅業績。
會德豐舊船快行
會德豐過去係成個系嘅控股公司，本身無乜動作，所以股價長期呆滯，最近幾年開始大舉投地，盈利跟住樓市級級上升，由於佢過去基數好低，係賣樓盈利帶動下變成高速增長，股價接連爆升.2011年佢股價仲唔夠20元，之後反覆向上，去到2016年頭接近30元，但跟住就開始發力，呢兩個月趁住業績公佈抽到去55.9元歴史新高。中環茶友話，買股要講運，以前買會德豐長期跑輸大市，好多股東等到呆晒，但幾年佢就開車踩行油，呢個時上咗船就食到正，但亦有人見佢無郁咁耐，有見佢升咗多少驚佢跌番落去，急急落咗船，買股有時講命水，有時不由你不信。
九倉同會德豐賺咁多錢，有人唔係好明點解呢個時候佢會出嚟放風，話考慮執咗有線電視。茶友估有兩個原因，一係趁業績好，就算係呢個時候話唔做有線，市場都唔會擔心佢嘅盈利會受影響；至於講到點解賺咁多錢都唔再養住有線，茶友就收到料，話買家睇過佢盤數，最終打退堂鼓，原因唔單止係公司要蝕錢，而且公司嘅客戶都明顯咁減少，收入不斷收縮，係咁激烈嘅傳媒環境下，點樣可以搶番啲客呢？呢個係至大難題，由於太過難搞，所以買家最後都無出手。買家唔落疊，就輪到九倉要諗盤生意可以點繼續做落去嘅問題，由於諗嚟諗去諗唔到出路，咁就話考慮唔做都係一個方案囉。
有線出咗大西洋
睇番有線股價係宣佈賣盤失敗後，翌日下插咗三成，市值由18億元跌到去12億元，睇番佢盤數，股本68億元，但股東資金得番6.8億元，反映咗咁多年經營情況差劣，公司流動資產1.26億元，銀行存款有2000多萬元，短期負債有4.1億元，顯示財政絕不充裕。有線係1999年底科網股熱潮上市，首日造價12.89元，之後一路下插，至今累積跌95﹪，如果第一日無沽貨，基本上十七年來無機會可以逃生。同期如果買九倉，股價係20元，而家翻咗兩倍。同樣係100萬，買有線剩5萬元，買九倉就變咗300萬元，兩者相差60倍，所以話買股唔同買樓，買磚頭就算買錯凶宅，都會隨時上升，買股如果上錯船，咁就會出咗大西洋。
撈過界賣櫥櫃煤氣績前有搞作
煤氣公司最新有動作，引進意大利廚具品牌MiaCucina，有中環茶友在中港城舉行酒會，集團似乎重視今次活動，行政總裁陳永堅親自主持儀式，茶友睇完明星再歎紅酒美食，相當過癮。
今次煤氣引進這個意大利品牌，目標覷準發展商。他們能夠做到爐具、家具、水喉一站式包辦，方便工程管理之餘，希望他們在興建新盤時，能夠以此作為增值原素。
煤氣應該就快公佈業績，茶友多年來都係煤氣股東，佢留意到呢兩年煤氣股價走得慢咗，就算有送紅股對股價推動力都唔大，佢坦言管理層已經好努力，但基數實在已經好大，加上本地市場有限，所以增長要靠內地拉動。如果叫佢估，佢會覺得阿媽恒基業績好好啲，所以短期走勢可以看高半線。
陸羽仁
回應 (0)
我要發表