北水炒股唔怕風浪
2017/03/27 08:41:37 網誌分類: 經濟
美圖成績表嚇親本地股民
北水上周狂炒幾雙科網股，一雙係有不少人用，但仍處蝕錢階段嘅美圖（1357），呢隻股月初起步開車，上個星期爆上後急插，單日波幅三成幾。走勢相當驚人。美圖股價爆炒後急回，一個原因係市場傳出佢被調查，公司主席蔡文勝係周末就走咗出嚟話，沒有收到監管機構的調查或查詢，如有的話將會公布。
美圖被查暫時睇嚟似係流料，咁佢係喪升後回落，好可能係因為公司公佈業績蝕錢，春江鴨係消息先行食胡，避一避風頭先。睇番美圖公司(1357)去年嘅業績，虧損擴大至62.61億元人民幣；每股虧損3.03元；不派末期息，比起2015年虧蝕22.18億元大幅增長，從本地股民嘅標準，都咪話唔令人腳軟。
內地股民膽夠大
再睇真啲，美圖去年收益15.79億元，按年升112.8%，其中智能硬件收益14.74億元，上升120.9%，互聯網服務及其他收益1.05億元，上升40.1%。毛利2.39億元，按年升137.99%，毛利率由13.5%升至15.2%。不過佢嘅收入同虧損額比，真係幾得人驚。有中環茶友話，講炒股膽識，內地人真係比香港大好多，佢哋炒美圖，唔係睇賺唔賺錢，甚至唔係收入幾多，而係睇佢有幾多人用，係於2016年12月，活躍用戶總數達4.5億，按年增長21%。去年平均每月每個月活躍用戶收益0.292元，按年增長75.9%。至於2017年1月，活躍用戶總數達到歷史新高，約5.2億，按年增長約32%，內地股民認為有人流早晚可以賺到錢，所以北水就放膽係業績前先炒咗佢上去。茶友話，內地經濟高速增長，內地人慣咗機會處處，承受風險嘅胃納大過香港人好多，所以炒起呢啲概念股狼過香港人好多，所以呢類股份上落大到好多香港人頂唔順。
IGG新遊戲炒足三日
另一個例子都係深港通熱炒股IGG（799），佢上星期宣佈全年多賺75%，IGG去年純利按年升75%至7,261.6萬美元，每股盈利5.37美仙；第二次中期股息8港仙，另加特別息5.4仙，業績曝光後股價連升三日，成為深港通表現最佳股份，風頭一時搶過咗美圖。如果以業績計，佢市盈率而家去到24倍，息率1.7%，數字上不過不失，但公司話仲有幾款遊戲將會上線，咁就引起咗北水嘅追捧。
上個星期長和主席李嘉誠慨歎香港嘅生產總值跌到只佔內地2%，香港只係炒吓樓。呢個講法放係股市都有啟示，香港股民習慣咗穩定嘅環境，揀股偏向有數計同有資產嘅公司，對內地嘅公司同產業發展唔係好認識。內地人新發展地區的取態，願意冒險博取財富，所以北水揀股重視增長多過資產，如果北水來港不斷增多，呢種睇法可能會慢慢影響市況，港股嘅波動情況就好以維港一樣，愈來愈風高浪急都唔奇。
終點前50米力撐吳光正料ALLIN林鄭
昨日特首選舉，大孖沙紛紛出動投票，除咗長和主席李嘉誠在終點前不足一個星期，拋出「女媧補天」嘅謎語暗撐心儀候選人。特首跑馬仔係2000米大長途，九倉系主席吳光正同樣在過終點前20米仲加鞭挺領放到離行離列嘅林鄭，外界估計有八、九張選委票的九倉系應該ALLIN佢。
大孖沙力挺林鄭，一句到尾就係特首如果唔得中央信任，香港肯定無運行。大孖沙咁講市民唔知認唔認同，但股民相信十居其九都覺得係，因為而家港股純「本地薑」已經好少，好多公司都係內地投資先有發圍。好似九倉就係內地大搞商業樓宇，不斷複制時代廣場嘅商業模式。
海港城將有新樓面落成
上屆選舉前，九倉做咗單大刁，就係同政府傾掂海港城補地價續約，當時仲斟到可以加建啲樓面，經歷一屆政府，聽聞加建樓面差唔多起好，屆時就會用嚟增加餐飲設施。
而且海港城嘅餐飲，主要集中海運大廈，早排該處有間餐廳請咗位米芝蓮大廚來港提供新食譜，有中環茶友仲走咗去試菜。呢間餐廳最正係食牛，有味鐵帶脂牛肉燒得香脆，，另外佢嘅幾款小食(TAPAS)都相當精緻，討好食客之一是黑松露薄脆，細粒香口，甚惹好感，另一款水牛芝士配麵包，淡口帶奶香。
甜品佢亦多花款，有味熱情果雞蛋奄列，甜酸香胃。若論賣相，有款雪葩雞蛋布丁，色彩繽紛，味道都唔錯。據講，呢間舖頭喺海港城仲另開咗間漢堡飽店，成日都排長龍，都係值得一試喎。
陸羽仁
回應 (0)
我要發表