人工智能炒股時代
2017/04/03 08:41:46 網誌分類: 經濟
以今年首季度計，恒指累積上揚2111點；國指累積上漲879點，表現算係唔錯。美股上周五偏軟，杜指收報20663點，跌63點；標普跌5點，收2362點；納指跌2點，報5911點。首季完結，表現最好的是納斯達克100指數，累計升幅11.6%，其次係標普500指數，升5.4%；反映2000隻中小型股的羅素2000升1%。
投資無人性更添勝算
中環茶友聚會，話題之一係最近有基金公司裁員，理由係佢哋用咗人工智能揀股，認為佢哋做得更好，所以唔需要咁多投資經理。茶友話，投資講數據，講分析同處理數據，無人可以勁得過電腦，如果講分析年報同數字，應該真係無人勁得過人工智能，如果呢間大行成功，好快股市就成為人腦同電腦博弈嘅時代。
最新嘅財富榜排名，股神巴菲特都要讓位俾科企大亨亞馬遜嘅貝索斯，茶友話，股神成日話投資者經常處於貪婪與恐懼之間，呢個人類情緒嘅弱點，電腦無感情，理論上只要入咗啱嘅程式，佢哋係唔會犯上應該恐懼時貪婪、應該貪婪時恐懼嘅毛病，所以基金經理好也會被人工智能淘汰。基金經理之後，跟住下一個就係炒股莊家，因為莊家搭棚嘅種種招數，理論上都可以用軟件識破，從而起佢哋尾注，以後投資市場就成為冰冷無人性嘅數字世界嘞。
好好享受投資賺錢樂趣
當然，以上估計同好多預言譬如話大數據一樣，暫時只係願景，要真係做到仲有相當遠嘅路要走。有茶友笑言，喺人工智能未取代人類投資前，大家要好好享受炒股賺錢嘅樂趣喎。雖然茶友咁講，踏入四月份，陸羽仁取態都係稍為審慎，皆因大市喺首季已經上升超過2000點，加上二、三月份包括業績在內嘅好消息出咗唔少。
傳統上五、六月份係淡市，而且美國最近公佈的經濟數據，特別係就業情況都係近年最強勁，所以六月份加息的機會而家睇起上嚟唔低，所以第二季暫時唔敢睇得太好，如果大市呢排反彈，不妨考慮減磅，儲番啲子彈等下兩個月有無機會執平貨。
首季表現好嘅板塊，包括有汽車股、內房股、濠賭股，喺第二季係咪繼續造好都要留意。開季之初，大市以能源、礦業股表現較好，去到中段佢哋開始有啲乏力，輪到內房、汽車接力。接近季尾佢哋都仲可以維持表現，但唔排除佢哋嘅升勢可能接近短期浪頂，主要係呢兩個板塊去年盈利大幅增長，今年基數已大。喺業績理想之下，佢哋嘅市盈率都炒到相對高嘅水位。
喺未炒升之前，市場俾呢類周期性股票嘅估值唔係太高，皆因佢哋嘅生意升完之後會跌番，唔具備長期上升嘅條件，但去年盈利好惹來憧憬，就將佢哋嘅市盈率推高咗，好似龍頭內房股碧桂園（2007）炒上12倍市盈率，以佢一向嘅估值嚟講算係高位，同樣，汽車股吉利（175）因為成為恒指新貴，炒咗上18倍，都係佢嘅較高水平，所以就算佢有唔錯嘅增長，股價都已經反映，手頭有貨嘅話，等到股價升啲應該放咁啲貨，如果而家要買佢，就真係要諗吓值博率有幾高。
軟件股季尾發力
去到季尾，資金繼續追逐嘅板塊仲有科技類，最近部份軟件股獲資金追捧，上周五中國擎天軟件（1297）單日急升18.5%，報2.69元；方正控股（418）升12%，報0.66元。呢個板塊之前炒得唔算太勁，加上稍後三星同蘋果都可能出手機，可能令同科技或手機相關嘅板塊繼續炒吓。
海航酒會人頭湧湧投行巨頭如蟻赴羶
上個星期尾，海航在九龍ICC舉行咗酒會。中環茶友都獲邀出席，去到現場發覺人馬沓雜，相當熱鬧。
假期前去酒會，當然要鬆一鬆，但少不免仍要交換吓卡片，喺現場行幾個圈，發覺收得最多嘅，係銀行家嘅卡片，當中好多都係投資大行，唔少總裁仲親自出馬?。
茶友話，海航因為喺啟德天價投地為港人認識，實際上佢喺全球東征西討，買咗唔少嘢，啱啱又話佢用幾億美金買嘉能可嘅石油儲存同物流業務。
佢一邊買嘢、一邊當然要搞融資，所以雖然香港大公司都唔少，但俾到投行咁多生意嘅就無幾多間，所以你話班銀行家點會唔好似螞蟻見到蜜糖先？
大中小樓價全線升
除咗銀行家做生意要多得海航外，想賣樓嘅發展商一樣多得佢唔少，反映樓市嘅中原城市領先指數連升8周共3.43%。唔同類型嘅單位中，大型屋苑同中小型單位嘅指數連續6周齊創新高，為2013年起政府推出「3D辣招」後首次出現，而加埋大單位在內，上周四大整體指數齊升，呢種全線升市6周內出現3次。
茶友話，呢排發展商推咁多樓，樓價依然高燒不退，可能同兩大因素有關，一係先前長和（001）主席李嘉誠分析樓市，話短期樓市好難大跌，二就當然係多得內資係咁天價投地，睇到想上車嘅買家心都雄埋。
陸羽仁
回應 (0)
我要發表