跌極有譜 油金可敲
2017/04/10 08:41:56 網誌分類: 經濟
油金股今日或回調
特朗普上星期五一邊請習大大食飯，一邊派兵向敍利亞射導彈，一度嚇到恒指失守24000，最多跌291點，不過午後市場逐步消化消息，尾市收復24200，恒指收報24267，跌6點；國企指數收報10273，下跌2點，成交金額888億元。以全周計，恒指累積上升156點；國指則持平，無升跌。
美股周五輕微下跌，杜指收市報20656點，跌6點，納斯達克指數收市報5877點，跌1點，標普500指數收市報2355點，跌1點。美國發射導彈空襲敍利亞，刺激上周五金價和油價齊升。紐約期金上周五曾急升1.6%，至每盎司1273.3美元；現貨金價則曾升1.66%，至每盎司1272.74美元，均為今年高位。
地緣政治風險上升，刺激油金價周末上揚，三桶油周五向好，中石油（857）周五升咗2.3%報5.78元；中海油（883）升1.5%報9.54元；中石化（386）升1.4%報6.55元，同時係一連新高價。連帶部份油服股亦受惠。避險情緒升溫，資金流入金市，金股造好，中金國際（2099）升3.9%報16.14元；紫金（2899）走高2.%報3.04元、靈寶黃金（3330）升1.6%報1.88元；招金（1818）漲1.7%報7.06元。由於美國表明今次係單一行動，估計今日油股同金股有可能回調吓。
美國向敍利亞射導彈，睇嚟只係小菜一碟，點解咁講呢？有財金猛人話，想當年布殊未做總統，有個說法係佢仲做緊酗酒青年時就俾金主相中，要捧佢入主白宮，當時開出兩個條件︰推高油價一倍同埋要幫美國嘅武器換代，結果交易成功。布殊成功做咗總統後，立即宣佈把北韓、伊拉克、敍利亞列為邪惡軸心，好快就揮軍伊拉克，用大批導彈招呼總統侯賽因，喺佢任內油價果然狂升到100美元一桶，同時消耗咗大量嘅軍火。
暫難借開火夾股市
布殊嘅傳聞，即係話共和黨上場就係油商同軍火商話事嘅年代。布殊下台十年，而家又輪到共和黨嘅人上場，雖然總統特朗普係政治素人，但相信佢都擺脫唔到油商同軍火商嘅影響，所以而家用59支導彈招呼吓敍利亞，只係開始而唔係結束。美國係中東開火，令到市場一度受驚，但猛人相信情緒好快會穩定下來。係美國首度展開沙漠行動攻打伊拉克時，杜指就係導彈發射之後開始上升，可見係人哋屋企打仗，對美股唔係壞消息。唔同嘅係，當年開火前美股先行調整，當開火消息證實，大戶反手將個市夾高。呢次美股已經喺高位，相信唔容易再大幅炒上。
打完美國，特朗普下次會打邊個呢？有人估會唔會係北韓呢？猛人覺得，雖然特朗普係會見習大大前話到好兇狠，暗示中國若果唔搞掂平壤，美國隨時自己郁手，但美國要砌北韓有啲鞭長莫及，一旦郁手金正恩可能揮軍同南韓死過，最緊要係北韓無錢無石油，打佢無乜着數，所以美國佬未必會咁易郁手，反而有可能繼續喺中東搵吓對象，因為咁先可以谷高到油價。
避險股低位可以買吓
猛人話，特朗普上場，加上聯儲局準備抽資加息，呢啲因素短期都會令美元匯價上升，同一時間，中東局勢日趨緊張，對歐洲不利，金價同油價未必快上，但跌極都有個譜，所以遇着油股、金股呢啲可以避險嘅股份回落，都可以候低買吓。
女將做財政司長唔容易成事
香港將會出現首位女特首，下任政府組班必會加添女將。財金界有乜人會加入呢？現時盛傳嘅有做過匯豐高層嘅馮婉媚。馮婉眉早前退咗落嚟，而家喺恒隆地產做獨立非執董，有人話馮小姐興趣唔大，已經推咗。
有人話，財政司長另一熱選係匯豐香港嘅大班王冬勝，可能係咁，所以馮小姐都唔會同舊上司爭位啦。如果係咁，未來女特首就真係要落多啲嘴頭游說吓，既然恒隆主席陳啟宗係林鄭支持者，唔知佢會唔會幫吓手呢？
除咗商界，政圈都覺得曾經做過財經事務及庫務局常務秘書長區璟智，都係有能力加入新班子嘅人，特別在財金領域，她曾主責落實「證券大法」，所以早前佢喺活動現身，媒體焦點就是她會否投身「熱廚房」。
區璟智退休後主力投身公益事業，除了青協工作外，她同時協助聯合國兒童基金會的工作。最近，聯合國兒童基金會邀請了青年導演黃修平擔任大使，與青少年攜手創作了紀綠片《明天我》，而家好多有能之士，喺商場同官場馳騁後，似乎都寧願投身慈善事業，好過入去熱廚房。
陸羽仁
回應 (0)
我要發表