大灣區概念宜速食
2017/04/24 08:41:58 網誌分類: 經濟
市場關注美減稅方案
杜指周五收市報20547點，跌30點，納斯達克指數收市報5910點，跌6點，標普500指數收市報2348點，跌7點。杜指全周計則微升0.85﹪，要留意係原油產量惹起關注，紐約期油一個星期跌咗6.6﹪，幅度都幾顯著。市場今個星期焦點係法國大選會唔會再爆黑天鵝，由極右陣線嘅瑪琳．納龐勝出，同埋美國係周中提出嘅減稅方案。若然法國大選爆出黑天鵝，對歐羅同歐股會有一定衝突。
至於中港市況，內地不放復活節假，重點係跟住嚟嘅「五一」黃金周，內地經濟興起，國民生活富裕咗，要使錢唔使等大時大節，黃金周效應無以前咁緊要，但都仍然係重要嘅旅遊高峰期。
雄安格局大無咁快見效
復活節假期內地無假放，有中環茶友乘機上去搞吓個人投資。佢話，兩年佢返大陸去銀行同證券行，無乜人得閒理佢，?家券商生意雖然好番啲，但同兩年前嘅今日比就真係差好遠。佢話內地人習慣做嘢一窩蜂，從呢個角度講，?家上證指數雖然上番3200點樓上，但氣氛仲係好冷靜吓，?家喺內地買股，用反向思維去諗，風險可能仲細，因為?家買得嘅人，都係對投資風險意識高啲嘅資深股民，承受震盪能力高啲，用炒股術語就係貨源喺強者手上，咁大散嘅風險會低咗。
茶友話，佢同銀行嘅職員傾偈，講到?家內地最火熱嘅雄安同大灣區概念。對方就受落大灣區概念多啲，主要係深圳一帶的經濟近年開始高速發展，勢頭仲未下墜，大灣區主要係延續呢個方向，將發展範圍擴大到東莞、惠州一帶，咁同雄安重新打造一個新區唔同。雄安係中央用政策推動嘅千年大計，基本上不容許失敗，但係起動初期，效益可能無咁快顯現，正如當年上海打造浦東，都要一段時間先見成效，當中風險自然高啲。
工業股有機會搵到珍珠
茶友聽完呢個睇法，佢覺得大灣區應該算係速食，好快可以見到效益，雄安就係長線。由於股市日日有交易，雄安概念股可能炒上炒落好多轉，先見到實體經濟有變化，所以炒雄安區升得快之餘都可能跌得快。至於炒大灣區概念就實在啲，好似?家炒緊嘅深國（0152）同深控（0604）本身都有息派，而且息率唔低，炒佢最多係坐艇，但至少可以食住息先。茶友仲話，大灣區概念係炒深圳擴大化，邊緣地區好似深圳、東莞產業升級，好多上市嘅工業股多年前都係區內買咗地起廠，?家騰籠換鳥真係好似得得哋，咁呢啲廠地若然位置好，咁就隨時可以用嚟發展，所以好多工業股都有機會「禾稈冚珍珠」㗎。
講開雄安同大灣區概念，水泥估計係新區開發最先受惠板塊，水泥股呢排都幾好炒，加埋台泥（1136）母企提出以3.6元私有化，令水泥股氣氛上升。台泥股價公佈後即升32.3%，收報3.44元，成為周末表現最好港股。佢在港上市多年，股價雖然唔係大幅上升，但過去都搞過幾次動作，若然低位買進，都已經可以食到幾次胡，以三、四線水泥股嚟講算係有交代喇。
海洋公園搞飲食南區街坊有口福
港鐵南港島線開動咗，海洋公園喺復活節前推出夜場，復活節假期雖然大批港人外遊，夜場依然人流不俗，可以話多得港鐵唔少。呢次搞夜埸，海洋公園除咗加強自己嘅飲食設施，邀請城中多間名店擺設攤位。有中環茶友無去外遊，就去咗試多款名食，當中以兩個頭盤最惹味。
第一個由Beefbar炮製的頭盤不是牛，而是三文魚脆玉米餅，最討好是放上薄薄的墨西哥辣椒，入口即帶來舌尖上的激情，令味覺進入作戰狀態！然後是帝苑酒店的清酒煮鮑魚，難得之處是鮑魚煮出乾貨的口感，清酒醬汁與海鮮尤其匹配。
嘗美食沒有甜品始終不夠完美，茶友吃到一隻白松露撻。白松露季節已過，想不到仍吃到這款味道濃郁別致的甜品。海洋公園過去好少搞飲食，不過隨着兩間酒店招標，由識食識食嘅林建岳同信和中咗標，兩個財團自己都有飲食設施，未來南區友應該愈來愈多好嘢食。
陸羽仁
回應 (0)
我要發表