資金抽緊 板塊執位
2017/05/08 10:11:50 網誌分類: 經濟
就業數據挺硬加息
美股上周初無乜特別消息，市場觀望儲局議息。聯儲局公佈議息結果後，外界認為下個月加息機會高唱入雲，雖然美股無乜好有反應，但港股同商品市場就變得乏力，油、金價都回軟，尤其油價借於產量高於預期消息跌得更急。
去到周末，美國公佈新增職位數據又係好強勁，新職在3月份大幅放緩至不足8萬份後，上月顯著反彈至21萬份；失業率亦跌至4.4%的近10年低位。4月份美國的非農業就業職位按月增加21.1萬份，多於市場此前預期的19萬份。3月份的新職位升幅，由原初公佈的9.8萬份向下修訂至7.9萬份，是去年5月以來最弱增長。失業率意外由3月的4.5%跌至4.4%，創2007年5月以來新低，市場原先預期失業率會升至4.6%。強功嘅數據反映勞工市場緊絀，儘管未明顯推高工資，但足以令聯儲局有更多理據在下月加息。
美國數據反映經濟強健，通脹隨時升溫。中環茶友話，聯儲局嘅態度同數據都反映咗利率會向上調，呢個趨勢對美股影響會明顯細過港股。美國嘅利率政策只係為本土服務，對全球穩定嘅關注只係次要，儲局認為經濟頂得順先至會加息，香港嘅利率同貨幣政策跟進美國走，但經濟所處循環就好唔同，美國嘅景氣仲算係初發，算係小牛，香港經濟係老牛，承受打擊嘅能力會差好多，所以上星期儲局話加息後，港股跌幅會大過美國。而家美國加息只係四分一厘咁上調，力度仲係好溫和，唔排除港股消化一輪，如果美股彈高，港股都會跟下，但如果美息持續調升的話，咁遲些少大家就要小心啲啦。
炸散石油商品市場
美息調高，資金成本向上，對商品都不利，加上內地都為迎接美國抽緊銀根做準備，近日加強為去槓桿而收緊信貸，兩大因素都不利全球商品需求。美國探勘井數量創兩年新高，均導致油價及其他商品價格於上周四晚開始下跌，港股亦受拖累。國際油價係黑色星期四跌到腳軟，「三桶油」上個星期都插得幾犀利，中海油（883）收8.82元；中石油（857）報5.24元；中石化（386）更跌至6.02元，都係近期新低。
商品價格唔止油價跌得急下跌，其他商品都受壓，有色金屬股普遍受挫，大股中鋁（2600）周五單日跌3%收報3.54元；其他中國有色礦業（1258）乾跌7%報收1.14元；嘉能可（805）跌7.67%報27.7元；五礦資源（1208）跌9%報2.3元；哈薩克礦業（847）更乾跌15%報43.3元。煤炭股龍頭神華（1088）跌3.5%報17.84元；兗煤（1171）、中煤能源（1898）跌近5%報3.52元；伊泰煤炭（3948）更跌咗近9%。
石油同金屬股係首季炒特朗普上場同埋經濟反彈，表現相當出色，但第二季開始逆轉，由於佢哋累積反彈幅度唔細，加上資金流向對佢哋不利，暫時仲未適宜急於撈底。
資金動向成為五窮月各類板塊執位嘅一大因素，資金成本上升不利商品炒作，但對金融股就有利，所以上星期金融股普遍表現強勢。咁啱大笨象匯控（005）揀係呢個時間公佈業績，結果被多間大行唱好，股價由低位回升得幾急。大摩係點評業績時就話，匯控首季表現佳，尤其收入和資本狀況搶眼，料股價表現正面，故予以「增持」的投資評級，目標價70元。高盛則把匯控的目標由70元上調至72元，維持對其「買入」投資評級。
跟住大媽炒匯控
同係一隻大笨象，記得係今年2月份，佢公佈全年業績，大行話佢業績遜預，唱到佢一文不值，股價單日插逾半成，創下兩年來最大單日跌幅，股價由高位69元跌到去62元，唔見咗一成有多，事隔一季大行又轉調，可見幾百萬年薪嘅分析員，判斷都係咁上下，佢哋嘅分析可以做參考，但臨場踢都係睇自己。要留意嘅係，現在大笨象多咗批大媽玩家，佢哋湧入時就可以推高股價，沽出就會質番低啲，佢哋炒匯控唔興一口氣爆上。匯控派息仲叫做吸引，加上全球經濟反彈結束前，大環境對銀行業唔算好差，跟住佢哋節奏出出入入都有得諗。
樓盤好賣股價唔升小股東一味等
今年發展商爭住推盤，有中環茶友都八卦吓，最近去咗睇吓新世界推售嘅西貢豪宅同佢之前賣嘅波鞋街項目。新世界嘅西貢盤，啱啱賣咗個創項目新高嘅單位。茶友睇咗樓，話環境同設計當然好過新樓啦，但佢買樓好保守，永遠相信location、location、location，所以都係對同系嘅波鞋街新盤印象深啲。
茶友話，好似波鞋街呢類市區樓盤單位無乜好睇。呢個項目住宅部份特色，就係可以在三樓的電梯大堂，俯覽地下商場。發展商今次主打北歐風格嘅會所，把頂層可以用作興建天池屋等特色單位的樓面，興建了空中會所和花園，最吸引人是行一段樓梯後登臨的花園。而家市區盤大部份係納米樓，會所變成公共空間，不過會所要整得靚，管理費自然唔會平。
睇完兩個樓盤，搞咗咁多嘢都係想賣貴啲，幫股東創造吓價值，茶友笑言最抵買都係新世界股票，但唔明點解咁多年佢都跑輸大市，其他同級地盤股好多都幾十元甚至過百元，佢仲係十元都唔到。新世界家底認真厚，單係新世界中心重建項目已經好值錢，但佢股價唔係點升，股東都唯有等、等、等。
陸羽仁
回應 (0)
我要發表