電視小股東寧一拍兩散？
2017/05/15 08:41:47 網誌分類: 經濟
無綫回購隨時難產
無綫早前提出回購協議，公司提出話派錢回購，即時令股價飇高，不過，呢個建議因為令到主要股東股權提高，觸及全面收購嘅條件，所以要做就要攞到證監會批准。上星期，證監就豁免申請作出回覆，答案好刁鑽，佢唔係唔俾豁免，但係就提出關注原來大股東同股不同權問題，認為要做就要解決咗呢權嘢先。好多市場人士就話呢個條件都幾難達到，所以有批同唔批差唔多，頗有玩死回購嘅味道。
吳天海落嘴頭𠱁小股東
回購被證監開出難題，同時仲受到基金小股東嘅反對，提出回購不如派高息，因為從小股東角度，回購令大股東增持股權，咁變相錯失咗一次高價收購嘅機會，最好就係派息唔回購，咁自己可以保留股權，又有錢收，咁就一舉兩得。有中環茶友就笑言，小股東咁諗好啱，但從大股東角度，派咗大筆錢出去但自己股權無增加，咁咪得個搞字，有乜實質好處先？小股東想一舉兩得，但如果大股東撤銷回購、又唔派特別息，咁股價隨時插番低，變成一拍兩散，所以係建議未拍板前，有機會都係食咗胡先穩陣啲。
無綫嘅回購建議變咗半生熟，另一邊廂有線嘅注資大計，賣家九倉嘅主席吳天海呢排都好緊張，再三呼籲小股東通過方案。吳主席貴為打工皇帝，乃挑通眼眉之叻人，佢落足嘴頭當然有原因，因為最怕小股東見今次注資協議自己無乜着數之餘仲要俾人溝淡，把心一橫否決建議，咁就真係一鑊泡。
今次由新世界老闆鄭家純同遠東老虎仔邱達昌揸旗嘅永升入主有線，方案被市場眾口一辭話好辣。中環茶友嘅意見係條件咁辣，大股東底子咁厚就話頂得順，會顧全大局啫，小股東袍金薪酬無收過，自然會問點解要捱義氣先？
根據有線嘅股權重組計劃，將會進行大比例供股，每三股供五股，集資七億零四百萬元。供股價為兩毫一仙，較有線收市價六毫一仙，大幅折讓近六成六。由於大股東九倉表明不會供股，換言之，供股包銷商永升將會取得有線控制權，完成供股、債務資本化、股份分派之後，永升有機會取得有線逾五成股權，即是控股權易手。係呢個方案下，小股東無機會獲得收購離場之餘，仲要面臨供唔供股嘅兩難題，若然唔供股肯定俾人大幅攤薄，變相送咗檔嘢俾人，供嘅話未來呢十零億錢夠唔夠燒好難講，唔夠隨時再伸手，永升班老闆做電視都話有得玩吖，小股東如果要不斷泵水，同供死會有乜分別。如果貨比貨，無綫嘅回購方案肯定筍過有線嘅方案多多聲，咁都俾小股東搞，所以天海哥驚出事唔係無道理㗎。
唔做電視股民無損失
茶友話，有線小股東同買賣雙方嘅考慮好唔同。有線賣家九倉想保住檔嘢顧全面子兼社會責任，辣啲都啃得落；買家個個有頭有面有生意，整檔電視生意做吓，可能賺唔賺錢都無所謂。但小股東兩個好處都無用，相反，如果注資觸礁，有線?家市值11億元，電視生意冚咗旗，公司賣晒家當同上市地位後，都仲可以執得幾多得幾多。而家嘅方案一啲甜頭都無，萬一注資之後發行股份大增，股價插咗落去供股價，衰啲搞埋合股，咁咪仲無「渣嗱」？要留意嘅係新買家對於小股東無做過任何承諾，佢哋作風一向又咁辣，所以批個方案過，抑或寧為玉碎、不作瓦全，真係腦交戰得好緊要喎。
東莞猛人多出咗個殼后
香港商界有潮州幫、福建幫，其實講起嚟廣東人都唔少。早排有茶友就去咗個廣東社團總會嘅活動，見到係股壇好活躍嘅朱李月華原來都係東莞人，仲做咗個會嘅永遠榮譽會長㖭。
社團擺酒送福臨門合桃
香港東莞人多，當中而家官場最威應該係律政司司長袁國強啦，佢做完呢屆又會重回法律界搵真銀。講到股壇，近年嘅風頭躉就係朱太，佢有殼后之稱，係市場非常活躍，係股壇搵到錢，佢都大力支持同鄉活動，當日會展擺酒過百圍，而且菜式都落足料。
茶友仲留意到，當日每位都放咗大盒福臨門嘅合桃同腰果，粗粗哋估計都送咗過千盒。呢個安排唔知福記老闆係咪鄉里呢？福記自從華置主席劉鑾雄少去咗，好似人氣跌咗啲，聽聞老闆同第二代，都諗緊計點樣谷吓個場，當日活動咁多頭面人物出場，脆脆哋送盒貴價零食，真係當廣告都抵番啦！
講開東莞，佢靜咗幾年後產值又再次起飛，去年全市地區生產總值達到6800多億元人民幣，增長達8.1百分點，市政府計劃在未來五年會繼續進行結構調整和轉換，突出園區統籌，希望能夠發展出新的增長動力，同時打造出宜居宜業的環境，迎接阿爺嘅大灣區鴻圖。
陸羽仁
回應 (0)
我要發表