爆爭產對小股東唔係壞事
2017/05/22 08:41:52 網誌分類: 經濟
索羅斯加注睇淡美股
據美國證交會（SEC）文件披露，索羅斯增持SPDR標普500認沽期權1.62倍至市值3.047億美元；他同時增持iShares羅素2000ETF認沽期權持倉36%至4.596億美元。表面計數，索羅斯沽空美股跌或損手，標普500指數今年內累升5.7%；追蹤細價股羅素2000指數則累升0.3%。索羅斯在2016年便開始建倉看跌美股，但由於牛市行情的持續，此舉未能給他帶來好處。
近排，鷹君羅氏家族爭產案近排日日新鮮。過往，大家族成員抱着家醜不外揚，今次羅家就在母親節當日上演一場「搶阿媽」，在近年爭產案中都算戲味突出。
股民對羅氏家族甚有認識，第一代是鷹君集團創辦人羅鷹石，但公眾更認識的是第二代的羅嘉瑞、羅旭瑞和羅康瑞，三人都擔任過或仍擔任重要公職，同時在中港商界各有一片天，是政商界都有地位的豪門。
鷹君家族為話事權火併
今次疑似爭產案緣起是羅鷹石的元配杜莉君入禀要求撤換打理家族基金的匯豐信託，聽聞背後涉及家族成員對公司管理權角力，由此不滿管理公司的做法。有中環茶友拆局，從官司層面上分析，今次案件屬民事訴訟，將由法官審理，而且涉事者是受託銀行，就算過去幾日搞出咁煽情嘅場面，可以影響到法官作出裁決。按過去經驗，把爭產鬧大的動機不出幾個，最簡單直接就是洩憤，透過揭露內情令理虧一方面子不好過，甚至日常生活受影響，最激一役當然係龍頭地產公司嘅兄弟火併，搞到家族成員同幾個老臣子要坐監。
茶友話打擊對方形象的另一個作用，就是要施壓，若然對方想保住面子，有可能會講和妥協。過往一些大家族爭產，都曾出現過息事寧人，和解了事的例子。不過，這些講和有些可以解決紛爭，有些則是短暫停火，最後還是要再戰，甚至可能去到股權層面，觸動股權戰。去到上個星期尾，羅老太開腔話打官司係想攞番自己啲嘢，聽口氣係想基金分派資產，若然如此，基金控制嘅股權就會散咗，咁邊個可以話事，可能就要數過飛嘞。
世城系聞風起動
呢次羅氏家族對決，似乎兩個陣營以羅旭瑞同羅嘉瑞分別組成兩個陣營。若從近年往績，羅嘉瑞主持鷹君，表現就好過羅旭瑞嘅世紀城市系，鷹君無論賺錢同派息對相當唔錯，小股東應該都幾滿意。世城系以前好活躍，但自從九七年因為亞洲金融風暴陷入財務危機，到?家成系結構都好複雜，因此令到基金興趣大減，股價缺乏表現。直至最近家族動向受關注，世城係先見活躍，上個星期世紀城市（0355）、百利保（0617）、富豪（0078）都先後創咗一年新高，唔通大家博佢狙擊鷹君得手乎？
中巴被挑機有先例
百億資產爆發八卦味道十足，充滿窺秘心態，不過，從小股東角度，大股東爆發不和好多時唔係壞事，一個例子係中巴（0026）被基金挑機，要求拆骨，背後似乎都係有家族成員不滿大家長，希望引兵入關，結果中巴股價就有得郁吓。好多資產豐厚嘅公司，大股東或管理層手握大權，高薪厚職歎世界，懶理小股東嘅感受，有人出嚟挑吓機，等佢哋反少省吓絕對係好事。
大澳酒店有格調飲食水準要提高
鷹君同世城系手頭都有酒店生意，而且都分拆咗上市，前者有朗廷酒店、後者有富豪信託，若論卡士，當然係朗廷贏兩條街啦，因為單係計佢屬下食肆嘅米芝蓮星，就已經無得比。
本港大孖沙家族幾乎個個都搞酒店，好似三大發展商長實、新地、恒基都有。新加坡過江龍信和屬下嘅酒店集團，月初仲公佈持有大酒店集團百分之五股權，外界才留意信和主席黄志祥，原來是大酒店的董事局成員。
林鄭活化示範作
信和是大型發展商，多年來興建不少酒店，其後把部份三星級酒店分拆成信店獨立上市，其實集團名下還持有不少高級靚酒店權益，包括金鐘港麗酒店和新加坡由舊郵局活化的的FULLERTON酒店。早前，信和擊敗了多個對手，取得海洋公園酒店的發展權。
講到搶眼出風頭，就不能不提信和打理嘅大澳酒店，這家酒店早前獲候任特首林鄭月娥到臨參觀。大澳酒店是古蹟活化項目，另一特別之處是項目以社企形式營運，故此雖然規模不大，在家族營運的酒店中堪稱別樹一幟。早排黃志祥嘅公子黄永光就陪咗未來特首林鄭月娥去參觀呢間酒店。大澳酒店前身係大澳警署，係林鄭做發展局局長嘅時候推出作為活化項目，信和識做搞個唔賺錢嘅社企嚟支持，而且仲搞得幾有格調，所以咁得林鄭歡心。呢間酒店格調一流，但有茶友去食過嘢，就覺得水準仲有改善空間，證明社企要搞高級嘢，的確係有難度嘅。
茶友笑言，林鄭?家要搵財爺，不如諗吓搵黄公子啦，佢識做生意、又做社企咁有心，拉佢入熱廚房，話唔定搞得掂個樓市呢！
陸羽仁
回應 (0)
我要發表